ລາຍການ

ເຂົ້າສູ່ລະບົບ



ຈຳນວນຜູ້ເຂົ້າເບິ່ງເວັບໄຊ

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
ເລີ່ມນັບຈາກວັນທີ 28/02/2011

ສະພາຮັບຮອງຮ່າງກົດໝາຍວ່າດ້ວຍສະຫະພັນແມ່ຍິງ

ກອງປະຊຸມສະໄຫມສາມັນເທື່ອທີ 5 ຂອງສະພາແຫ່ງຊາດ ຊຸດທີ VII, ​ໃນ​ວັນ​ທີ 23 ກໍລະກົດ 2013 ກອງ​ປະຊຸມ​ໄດ້​ດຳ​ເນີນ​ມາ​ເປັນ​ມື້ທີ 12 ​ໂດຍ​ການເປັນ​ປະທານ​ຂອງທ່ານ ສົມ​ພັນ ​ແພງ​ຄຳ​ມີ ຮອງປະທານ​ສະພາ​ແຫ່​ງຊາດ. ວາລະ​ກອງ​ປະຊຸມທ່ານ ນາງ ສີ​ໃສ ລື​ເດດ​ມູນ​ສອນ ປະທານ​ຄະນະ​ບໍລິຫານ​ງານ​ສູນ​ ກາງ​ສະຫະພັນ​ແມ່​ຍິງ​ລາວ​ໄດ້ຂຶ້ນ ສະ​ເຫ​ນີຮ່າງ​ກົດໝາຍວ່າດ້ວຍ ​ສະຫະພັນ​ແມ່​ຍິງ​ລາວ ເຊິ່ງປະກອບ​ມີ 11 ພາກ, 7 ຫມວດ ​ແລະ 54 ມາດຕາ,

ຈຸດປະສົງຂອງ​ກົດຫມາຍ​ສະບັບ​ນີ້ກໍ່​ເພື່ອກຳນົດ​ຫລັກການ, ລະບຽບການ, ມາດ​ຕະການ​ກ່ຽວ​ກັບການຈັດຕັ້ງ, ການ​ເຄື່ອນ​ໄຫວ, ການ​ຄຸ້ມ​ຄອງ ​ແລະ ການ​ຕິດຕາມ​ກວດກາ​ວຽກ​ງານ​ຂອງ​ສະຫະພັນ​ແມ່ຍິງ ​ເພື່ອ​ຮັບປະກັນ​ໃຫ້ການ​ຈັດຕັ້ງປະຕິບັດ​ຕາມພາລະ​ບົດບາດ, ສິດ, ຫນ້າ​ທີ່ ​ແລະ ພັນທະ​ຂອງ​ຕົນ​ຢ່າງ​ມີປະສິດທິ​ຜົນ ​ແນ​ໃສ່​ຍົກ​ສູງຄວາມ​ຮັບຜິດຊອບ​ຂອງ​ລັດ, ອົງການ​ແນວ​ລາວ​ສ້າ​ງຊາດ, ອົງການ​ຈັດຕັ້ງສະຫະພັນ​ແມ່ຍິງ, ອົງການ​ຈັດຕັ້ງມະຫາຊົນອື່ນ,ສັງຄົມ, ຄອບຄົວ​ຕໍ່​ການພັດທະນາ, ການ​ປົກ​ປ້ອງ​
ສິດ ​ແລະ ຜົນ​ປະ​ໂຫຍ​ດອັນ​ຊອບທຳ​ຂອງ​ສະມາຊິກ​ສະຫະພັນ​ແມ່ຍິງ​ແລະແມ່ຍິງ​ລາວ​ບັນດາ​ເຜົ່າ​ໃນ​ທົ່ວ​ປະ​ເທດ, ປະກອບ​ສ່ວນ​ເຂົ້າ​ໃນ​ພາລະກິດປົກ​ປັກ​ຮັກສາ​ແລະ ສ້າງສາພັດທະນາ​ປະ​ເທດ​ຊາດ. ຊຶ່ງເຫດຜົນ ​ແລະຄວາມ​ຈຳ​ເປັນໃນ​ການສະ​ເຫ​ນີ ອອກ​ກົດໝາຍສະບັບ​ນີ້ ແມ່ນ​ເພື່ອ​ຜັນ​ຂະຫຍາຍ​ແນວທາງ​ນະ​ໂຍບາຍ​ຂອງ​ພັກ,​ແຜນ
​ພັດທະນາ​ເສດຖະກິດ-ສັງຄົມ​ຂອງ​ລັດ ​ແລະບັນດາ​ນິຕິ​ກຳ​ຕ່າງໆ​ກ່ຽວ​ກັບ​ການຈັດຕັ້ງ ​ແລະ ການ​ເຄື່ອນ​ໄຫວ​ຂອງ​ສະຫະພັນ​ແມ່ຍິງ​ແຕ່ລະ​ຂັ້ນ, ​ເພື່ອ​ເປັນ​ບ່ອນ​ອີງ​ໃຫ້ແກ່​ການ​ປັບປຸງ​ການຈັດຕັ້ງ, ສະມາຊິກ​ສະຫະພັນ​ແມ່ຍິງ​ໃຫ້​ມີ​ຄວາມ​ໜັກ​ແຫນ້ນ​ເຂັ້ມ​ແຂງ, ​ເຕີບ​ໃຫຍ່ຂະຫຍາຍຕົວ​ທາງ​ດ້ານ​ປະລິມານ ​ແລະ ຄຸນ​ນະພາ​ບທັງ​​ເປັນ​ການ
​ເພີ່ມ​ຄວາມ​ສັກສິດ​ໃນ​ການ​ນຳພາ-ຄຸ້ມ​ຄອງ​ການ​ເຄື່ອນ​ໄຫວ​ວຽກ​ງານ​ຂອງ​ສະຫະພັນ​ແມ່ຍິງ​ດ້ວຍ​ກົດຫມາຍ.

ທ່ານປະທານ ກໍ່​ໄດ້​ໃຫ້​ທິດຊີ້ນຳ​ໃນ​ການ​ປະກອບ​ຄຳ​ເຫັນແກ່ ສສຊ ​ເພື່ອ​ເຮັດ​ໃຫ້ການ​ປະກອບ​ຄຳ​ເຫັນ​ໃສ່​ຮ່າງ​ກົດໝາຍ​ດັ່ງກ່າວ​ມີ​ຄວາມ​ສອດຄ່ອງ ​ແລະ​ຖືກ​ກັບ​ສະພາ​ບຕົວຈິງ ​ເຊິ່ງທ່ານ​ໄດ້​ສະ​ເໜີ​ໃຫ້​ລົງ​ເລິກ 5 ບັນຫາ​ຄື: ​1. ​ໂຄງ​ປະກອບ ​ແລະ​ເນື້ອ​ໃນ​ຕົ້ນຕໍ​ຂອງຮ່າງ​ກົດຫມາຍ​ສະ​ບັບນີ້ວ່າ​ເຫມາະ​ສົມ​ແລ້ວ ຫລື ບໍ່ ຫລືຄວນ​
ຈະ​ປັບປຸງ​ແນວ​ໃດ; 2.  ນະ​ໂຍບາຍຂອງ​ລັດ​ກ່ຽວ​ກັບ​ວຽກງານ​ແມ່ຍິງ​ທີ່​ໄດ້​ກຳນົດ​ໄວ້​ໃນມາດຕາ  4 ​ເຫັນ​ວ່າເຫມາະ​ສົມແລ້ວ​ບໍ່, ຄວນ​ຈະ​ເພີ່ມ ຫລື ຕັດບັນຫາ​ໃດ; 3. ຫລັກການ​ເຄື່ອນ​ໄຫວຂອງ​ສະຫະພັນ​ແມ່ຍິງ​ລາວ​ທີ່​ໄດ້​ກຳນົດ​ໄວ້​ໃນ​ມາດຕາ 5 ທ່ານມີ​ຄຳ​ເຫັນ​ແນວ​ໃດ; 4. ຄວາມ​ຮັບຜິດຊອບຂອງ​ລັດ, ສັງຄົມແລະຄອບຄົວຕໍ່​ແມ່ຍິງ
​ທີ່​ໄດ້​ກຳນົດ​ໄວ້​ໃນມາດຕາ 30, ມາດຕາ​ 31ແລະມາດຕາ 32 ທ່ານມີ​ຄວາມ​ເຫັນ​ແນວ​​ໃດ ​ແລະ 5. ການ​ຖື​ເອົາ​ວັນ​ທີ 20​ ກໍລະ​ກົດ​ເປັນວັນ​ສ້າງຕັ້ງສະຫະພັນ​ແມ່ຍິງ ລາວ ​ແລະ ​ເປັນ​ວັນ​ພັກທາງລັດຖະການ​ຂອງ​ແມ່ຍິງ​ລາວທ່ານ​ມີ​ຄຳ​ເ​ຫັນ​ແນວ​ໃດ.

ຈາກ​ນັ້ນ, ບັນດາ​ທ່ານ ສສຊ ​ແຕ່ລະ​ເຂດ​ເລືອກ​ຕັ້ງກໍ່​ໄດ້​ສຸມ​ໃສ່​ປະກອບ​ຄຳ​ເຫັນ​ໃສ່​ຮ່າງ​ກົດຫມາຍ​ດັ່ງກ່າວ ​ໂດ​ຍສ່ວນຫລາຍ​ແລ້ວ​ແມ່ນ​ໄດ້​ເຫັນ​ດີ​ໃນການ​ຖື​ເອົາ​ວັນ​ທີ 20 ກໍລະກົດ ​ເປັນ​ວັນ​ສ້າງຕັ້ງສະຫະພັນ​ແມ່ຍິງລາວ ​ແລະ  ​ເປັນ​ວັນພັກທາງ​ລັດຖະການ​ຂອງ​ແມ່ຍິງລາວ ​ແລະ ນອກຈາກ​ການ​ປະກອບ​ຄຳ​ເຫັນ​ຕາມ​ທິດ​ຊີ້ນຳ​ຂອງ​

ທ່ານປະທານ​ກອງ​ປະຊຸມ​ແລ້ວ ສສຊ ກໍ່​ໄດ້​ປະກອບ​ຄໍາ​ເຫັນຕື່ມ​ອີກ​ບາງ​ມາດ​ຕາ​ເຊັ່ນ: ທ່ານນາງ ອຳ​ໄພ​ວອນ ລ້ອມ​ບຸນ​ແພງ ສສຊ ​ເຂດ​ເລືອກ​ຕັ້ງທີ 8 ​ແຂວງ​ຫົວພັນໄດ້​ສະ​ເຫ​ນີຕື່ມ​ໃນ​ມາດຕາ 20 ຂໍ້ 4​ ທີ່​ວ່າ ປະຕິ​ບັດ​ພັນທະ​ອື່ນ​ຕາມ​ທີ່​ໄດ້​ກຳນົດ​ໄວ້​ໃນ​ລະບຽບ​ກົດຫມາຍ​ໃຫ້​ຕື່ມ​ໃສ່​ວ່າທີ່​ໄດ້​ກຳນົດ​ໃນລັດຖະທຳ​ມະນູນ ​ແລະ ກົດຫມາຍ,​ ທ່ານ ນາງ ຈັນທະ​ບູນ ​ໂພ​ສະ​ລາດ ສສຊ ​ເຂດ​ເລືອກ ຕັ້ງທີ 10 ​ແຂວງ​ວຽງ​ຈັນ​ໄດ້​ສະ​ເຫ​ນີ​ໃຫ້​ແຍກ​ສິດ ​ແລະຫນ້າ​ທີ່ຂອງ​ຮອງ​ປະທານ ​ແລະ ກຳມະ​ການ​ໃນ​ຄະນະ​ບໍລິຫານ​ງານສະຫະພັນ​ແມ່ຍິງ​ລາວ​ໃນມາດຕາ 14 ອອກ​ຈາກ​ກັນ, ທ່ານ ທອງ​ດີ ພັບ​ບົວ​ວອນ ສສຊ ​ເຂດ​ເລືອກ​ຕັ້ງທີ 7 ​ແຂວງ​ໄຊຍະ​ບູລີ ​ໄດ້​ສະ​ເຫ​ນີຂໍ​ເພີ່ມ​ໃນມາດຕາ 43 ອີກ​ຫນຶ່ງ​ຂໍ້​ຄື ສຶກສາ​ອົບຮົມ​ການ​ເມືອງ​-​ແນວ​ຄິດ​ໃນ​ກາ​ນຮ່ວມ​ຊີວິດ​ການເມືອງ​ຂອງ​ສະຫະພັນແມ່ຍິງ​ ​ແລະ  ຄັດ​ເລືອກ​ເອົາ​ມະຫາຊົນກ້າວຫນ້າ​ເຂົ້າ​ເປັນ​ສະມາຊິກ​ອົງການ​ສະຫະພັນ​ແມ່ຍິງ​ໃນ​ຂັ້ນຂອງ​ຕົນ.ຕາງໜ້າຄະນະອະນຸກຳມະການກົດໝາຍໄດ້ໃຫ້ຄຳຊີ້ແຈງ ແລະ ຕອບຂໍ້ຂ້ອງໃຈແກ່ ສສຊ ເພື່ອໃຫ້ມີຄວາມກະຈ່າງແຈ້ງຂຶ້ນຕື່ມ ເຊິ່ງໄດ້ກ່າວວ່າ: ການປະກອບຄຳເຫັນຂອງບັນດາທ່ານ ສສຊ ແມ່ນເປັນປະໂຫຍດຫລາຍຢ່າງຕໍ່ກັບຮ່າງກົດໝາຍສະບັບນີ້ ແລະ ຄຳເຫັນເຫລົ່ານັ້ນມີທັງຂໍ້ສະເໜີ ແລະ ຂໍ້ຊັກຖາມໃນນີ້ຂໍຊີ້ແຈງຂໍ້ຊັກຖາມ

ທີ່ວ່າ ກົດໝາຍສະບັບນີ້ໄດ້ກວມເອົາຄະນະກຳມາທິການສົ່ງເສີມຄວາມກ້າວໜ້າຂອງແມ່ຍິງບໍ່ ?, ກົດໝາຍສະບັບນີ້ ບໍ່ໄດ້ກວມເອົາເນື່ອງຈາກວ່າ ໃນປະຈຸບັນຄະນະກຳມາທິການ ດັ່ງກ່າວໄດ້ແຍກໄປຂຶ້ນກັບຫ້ອງວ່າ ການລັດຖະບານແຕ່ຈຸດປະສົງ ແລະເປົ້າໝາຍລວມກໍ່ຍັງຄືກັນກໍ່ຄືການປົກປ້ອງສິດຜົນປະໂຫຍດຂອງແມ່ຍິງ ແລະ ເດັກນ້ອຍ, ນອກນີ້ ທ່ານຜູ້ຕາງໜ້າກໍ່ຍັງຊີ້ແຈງບັນຫາອື່ນໆຕື່ມອີກ, ຫລັງຈາກນັ້ນ ບັນດາທ່ານ ສສຊ ກໍ່ສືບຕໍ່ປະກອບຄຳເຫັນໃສ່ຮ່າງກົດໝາຍດັ່ງກ່າວ.

ພາຍຫລັງການປະກອບຄຳເຫັນຂອງ ສສຊແລະການຊີ້ແຈງ ຂອງທ່ານຜູ້ຕາງໜ້າຄະນະອະນຸກຳມະການກົດໝາຍ, ທ່ານປະທານກໍ່ໄດ້ສະຫລຸບສັງລວມ ການປະກອບຄຳເຫັນໃສ່ຮ່າງກົດໝາຍດັ່ງກ່າວວ່າ: ເຫັນວ່າບັນ ຍາກາດປະກອບຄຳເຫັນມີຄວາມຫຼາກຫຼາຍ ແລະ ມີຄວາມຄົບຖ້ວນ ພ້ອມກັນນີ້ ບັນດາຄະນະອະນຸກຳມະການກົດ ໝາຍກໍ່ໄດ້ຊີ້ແຈງຢ່າງເລິກເຊິ່ງ ແລະ ກົງໄປກົງມາ ແລະ ໄດ້ສະຫລຸບວ່າດ້ານໂຄງປະກອບການຈັດວາງຖືກຕ້ອງ, ກ່ຽວກັບເນື້ອໃນຫລາຍທ່ານກໍ່ໃຫ້ຮັກສາໄວ້ດັ່ງນັ້ນ ສະເໜີໃຫ້ຄະນະຮັບຜິດຊອບຄົ້ນຄວ້າປັບປຸງຄືນໃໝ່ໃຫ້ເໝາະສົມ ຈົ່ງນຳເອົາຄຳເຫັນຂອງ ສສຊ ທີ່ປະກອບໃສ່ຮ່າງກົດໝາຍດັ່ງກ່າວ ເພື່ອປັບປຸງຮ່າງກົດໝາຍສະບັບນີ້ ໃຫ້ຮັດກຸມກວ່າເກົ່າ.ພ້ອມນີ້ ທີ່ປະຊຸມຍັງໄດ້ລົງຄະແນນສຽງຮັບຮອງເອົາຮ່າງກົດໝາຍວ່າດ້ວຍສະຫະ ພັນແມ່ຍິງລາວດ້ວຍຄະແນນສຽງເປັນສ່ວນຫລາຍ.

 


ການເລືອກຕັ້ງ ສສຊ ຊຸດທີVII

ບົດຄວາມ ກ່ຽວກັບ ຢາເສບຕິດ
You are here: