ທ່ານ ​ດຣ . ​ໄຊ​ສົມ​ພອນ ພົມວິຫານ , ຮອງ​ປະທານ​ສະພາ​ແຫ່ງ​ຊາດ​ລາວ ​ໄດ້​ໃຫ້​ກຽດ​ຕ້ອນຮັບ​ການ​ເຂົ້າ​ຢ້ຽມ​ຄຳນັບ ​ຂອງ​ທ່ານ ດິ້ງຕຽນ​ຢຸງ, ຫົວໜ້າ​ອົງ ການ​ກວດ​ສອບ​ແຫ່ງ​ລັດ ສສ ຫວຽດນາມ ​ແລະ ຄະນະ ໃນວັນທີ 27 ເມສາ 2012 ນີ້ ຢູ່​ທີ່​ສະພາ​ແຫ່ງ​ຊາດ​ ໃນ​ໂອກາດ​ທີ່​ເດີນທາງ​ມາຢ້ຽມຢາມ ແລະ ​ເຮັດ​ວຽກ​ຢູ່ ສປປ ລາວ​​ ແຕ່​ວັນ​ທີ 25-27 ​ເມສາ 2012

ຕາມ​ຄຳ​ເຊີນ​ຂອງ​ທ່ານ ດຣ . ບົວ​ສີ ລໍ​ວັນ​ໄຊ , ປະທານ​ອົງການ​ກວດ​ສອບ​ແຫ່ງ​ລັດ ສປປ ລາວ .ທ່ານຮອງປະທານສະພາແຫ່ງຊາດ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ການເດີນທາງມາຢ້ຽມຢາມ ແລະ ເຮັດວຽກ ຮ່ວມກັບຄະນະຜູ້ແທນອົງການ ກວດສອບແຫ່ງລັດ ສປປ ລາວ ຂອງ ທ່ານຫົວໜ້າອົງການກວດສອບແຫ່ງລັດ ສສ ຫວຽດນາມ ແລະ ຄະນະ ໃນຄັ້ງນີ້ ຊຶ່ງເປັນການປະກອບ ສ່ວນສຳຄັນ ເຂົ້າໃນການເສີມຂະຫຍາຍສາຍພັວພັນມິດຕະພາບ ຄວາມສາມັກຄີພິເສດ ແລະ ການຮ່ວມມື ຮອບດ້ານ ລະຫວ່າງ ລາວ - ຫວຽດນາມ ໂດຍສະເພາະ ແມ່ນການ ພົວພັນຮ່ວມມື ລະຫວ່າງ ສອງອົງການ ກວດສອບແຫ່ງລັດ ລາວ - ຫວຽດນາມ