ກອງ​ປະຊຸມ​ສະ​ໄໝສາມັນ​ເທື່ອ​ທີ 3 ຂອງ​ສະພາ​ແຫ່ງ​ຊາດ ຊຸດ​ທີ VII ​ໄດ້ດຳ​ເນີນ​ມາ​ເປັນ​ເວລາ  14 ວັນ, ​ໃນ​ວັນ​ທີ 9 ກໍລະກົດ 2012 ພາຍ​ໄຕ້​ການ​ເປັນ​ປະທານ​ຂອງ​ທ່ານ ສົມ​ພັນ​ ​ແພງຄຳ​ມີ , ຮອງ​ປະທານ​ສະພາ​ແຫ່ງ​ຊາດ.ກອງ​ປະຊຸມ​ໄດ້​ຮັບ​ຟັງ​ການສະ​ເໜີກ່ຽວກັບ​ການ​ປຸງ​ປຸງ​ກົດໝາຍວ່າ​ດ້ວຍ​ການ​ດຳ​ເນີນ​ຄະດີ​ອາຍາ ຈາກ​ທ່ານ ​ຄຳ​ສານ​ ສຸວົງ​ ຫົວໜ້າອົງການ​ໄອ​ຍາ​ການ​ປະຊາຊົນ​ສູງ​ສຸດ.

ຮ່າງ​ກົດໝາຍສະບັບ​ປັບປຸງ​ຄືນໃໝ່​ເກືອບໝົດ​ໂດຍ​ໄດ້ສັບຊ້ອນ​ພາກ,ໝວດ ​ແລະ ​ເນື້ອ​ໃນ ຂອງ​ແຕ່​ລະ​ມາດຕາ​ຄືນ​ໃໝ່ຊຶ່ງ​ກົດໝາຍວ່າ​ດ້ວຍ​ການ​ດຳ​ເນີນ​ຄະດີ​ອາຍາ ສະບັບ​ປະຈຸ​ບັນ​ມີ 12 ພາກ, 8 ໝວດ, 122 ມາດຕາ,ຮ່າງ​ກົ​ດໝາຍສະບັບ​ປັບປຸງ​ປະກອບ​ມີ 15 ພາກ, 31 ໝວດ  275 ມາດຕາ,ມີ​ເນື້ອ​ໃນ​ຂຽນ​ໃໝ່ 147 ມາດຕາ, ປັບປຸງ 114 ມາດຕາ, ຮັກສາ​ເນື້ອ​ໃນ​ເກົ່າ 14 ມາດຕາ,​ເນື້ອ​ໃນ​ພື້ນຖານ​ຂອງ​ກົດໝາຍສະບັບ​ປັງ​ປຸງ​ສ່ວນ​ຫຼາຍຍັງ​ແມ່ນ​ຮັກສາ​​ໄວ້ຄື​ເກົ່າ ​ແຕ່​ໄດ້​ມີ​ການ​ຜັນ​ຂະຫຍາຍ​​ໄດ້​ບາງ​ເນື້ອໃນ ຂອງ​ມາດຕາ​ໃຫ້​ລະອຽດຈະ​ແຈ້ງ​ຕື່ມ ​ແລະ ​ໄດ້​ແຍກ​ເນື້ອ​ໃນ​ບາງ​ມາດຕາ​ໃໝ່​ເຂົ້າ​ຕື່ມ​ຫຼາຍກວ່າ​ເຄິ່ງໜຶ່ງ ​ເພື່ອ​ໃຫ້​ມີ​ຄວາມ​ຄົບ​ຖ້ວນ,ລະອຽດ, ຈະ​ແຈ້ງ ​ແລະ ສາມາດ​ເປັນ​ບ່ອນ​ອິງ​ໃນ​ການຈັດ​ຕັ້ງ​ປະຕິບັດ​​ໃຫ້​ແກ່​ບັນດາ​ອົງການ​ທີ່​ມີ​ສິດ​ອຳນາດ​ໃນ​ການ​ດຳ​ເນີນ​ຄະດີ​ອາຍາ ​ແລະ ບັນດາຜູ້​ເຂົ້າ​ຮ່ວມ​ໃນ​ການ​ດຳ​ເນີນ​ຄະດີ​ ທັງ​ເປັນ​ການ​ກຳນົດ​ໃຫ້​ຊອດ​ຄ່ອງ ກັບ​ສະພາບ​ຄວາມ​ເປັນ​ຈິງ​ຂອງ​ປະ​ເທດ​ເຮົາ ​ແລະ ການ​ສາກົນ, ການ​ຄົ້ນຄວ້າ ​ແລະ ປັບປຸງ​ກົດໝາຍ​ໃນ​ຄັ້ງນີ້​ເນື້ອ​ແທ້​ກໍ່​ແມ່ນ​ການ​ຫັນປ່ຽນທາງ​ດ້ານ​ທິດ​ສະ​ດີ ​ແລະ ພຶດຕິ​ກຳ, ​ແມ່ນ​ການ​ປັງ​ປຸງ​ທາງ​ດ້ານ​ແນວ​ຄວາມ​ຄິດ​ຄວາມ​ຮັບ​ຮູ້​ໃໝ່​ໄປ​ພ້ອມ​ກັບ​ການ​ສ້າງ​ກົນ​ໄກ, ວິທີ​ການ ,ມາດ​ຕະການ​ຂັ້ນ​ຕອນ, ການ​ດຳ​ເນີນ​ຄະດີ​ອາຍາ​ໃຫ້​ຖືກຕ້ອງ​ສອດ​ຄ່ອງກັບ​ສະພາບ​ຄວາມ​​ເປັນ​ຈິງ​ຂອງ​ ສປປ ລາວ ​ແລະ ສາກົນ, ກົດໝາຍວ່າ​ດ້ວຍ​ການ​ດຳ​ເນີນ​ຄະດີ​ອາຍາ​ໄດ້​ຖືກ​ຮັບ​ຮັບຮອງ​ປະກາດ​ໃຊ້​ຕາມ​ສະບັບ​ທີ 30 /ສປສ, ລົງ​ວັນ​ທີ 2 ທັນວາ 1989 ​ແລະ ​ໄດ້​ຖືກ​ປັງ​ປຸງ​ໃນ​ປີ 2004  ຕາມ​ສະບັບ​ເລກທີ 01/ ສພຊ ,ລົງ​ວັນ​ທີ 15  ພຶດສະພາ 2004 ນັບ​ແຕ່​ໄດ້​ຮັບ​ການ​ປັງ​ປຸງ​ມາ​ຮອດ​ປະຈຸ​ບັນ​ເປັນ​ເວລາ 7 ປີ , ການ​ປັງ​ປຸງກົດໝາຍວ່າ​ດ້ວຍ​ການ​ດຳ​ເນີນ​ຄະດີ​ອາ​ຍາ​ສະບັບ​ນີ້​ໄດ້​ເລີ່​ມມາ​ແຕ່​ທ້າຍ​ປີ 2010. ຈາກ​ນັ້ນ​ບັນດາ ສສຊ  ​ເຂດ​ເລືອກ​ຕັ້ງ​ຕ່າງໆ​ໄດ້​ປະກອບ​ຄຳ​ເຫັນ ​ແລະ ຕັ້ງຄຳ​ຖາມ ​ເຈາະ​ຈີມ​ໃນ​ກົດໝາຍດັ່ງກ່າວ​ເພື່ອ​​ແນ​ໃສ່ ການ​ດຳ​​ເນີນຄະດີ​ອາຍາ​ດ້ວຍ​ຄວາມ​​ໂປງ​ໃສ່, ຍຸດຕິ​ທຳ ​ແລະ ມີ​ຄວາມ​ປະສິດທິພາບ, ມີ​ປະສິດທິ​ຜົນ ​ເປັນ​ຕົ້ນ​ແມ່ນ​ດ້ານ​ໂຄງ​ຮ່າງ, ການຈັດ​ວາງ​ພາດ,ໝວດ ​ແລະ ມາດຕາ, ຂັ້ນ​ຕອນ​ນຳ​ໃຊ້ ​ແລະ  ສະກັດ​ກັ້ນ​ການ​ດຳ​ເນີນ​ຄະດີ​ອາຍາ​ເຊິ່ງມີ​ຄວາມ​ສຳຄັນ​ຫຼາຍ​ເພາະ​ມັນ​ຕິດ​ພັນ​ກັບ​ອິດສະຫຼະພາບ ​ແລະ ​ເສລີພາບ ຂອງ​ພົນລະ​ເມືອງ​ທີ່​ໄດ້​ກຳນົດ​​ໄວ້,ການ​ກຳນົດ​ເວລາ​ໃນ​ການ​ພິຈາລະນາ​ຂອງ​ສານ​ແຕ່​ລະ​ຂັ້ນ​ການ​ກຳນົດ​ລະບຽບ​ໂທດ​ປະຫານ​ຊີວິດ, ການ​ຮື້​ຟື້ນ​ຄະດີ​ຕາມ​ຄຳ​ສັ່ງ​ສານ ​ແລະ ບັນຫາ​ອຶ່ນໆ. ການ​ຄົ້ນຄວ້າ​ປະກອບ​ຄຳ​ເຫັນ​ໃສ່​ຮ່າງ​ກົດໝາຍວ່າ​ດ້ວຍ​ການ​ດຳ​ເນີນ​ຄະດີ​ອາ​ຍາ​ສະບັບ​ປັງ​ປຸງ​ຈຳ​ດຳ​ເນີນ​ເປັນ​ເວລາ 2 ວັນ ( 9-10 ​ເດືອນ​ກໍລະກົດ).