11/10/2018 00:00 -

(ສພຊ) ໃນວັນ​ທີ 3 ຕຸ​ລາ 2018, ທີ່ເຮືອນພັກທູດຍີ່ປຸ່ນປະຈໍາລາວ, ທ່ານ ທາເກຊິ ຮິກິຮາຣາ (Takeshi HIKIHARA) ເອກ​ອັກ​ຄະ​ລາ​ຖະ​ທູດຍີ່​ປຸ່ນ ​ປະ​ຈຳ​ ສ​ປ​ປລາວ ໄດ້ຕາງໜ້າໃຫ້ລັດຖະບານຍີ່ປຸ່ນ ປະດັບຫລຽນ The Order of the Rising Sun, Gold and Silver Star ໃຫ້ທ່ານ​ ສົມ​ພູ ດວງ​ສະ​ຫວັນ ປະ​ທານ​ກຳ​ມາ​ທິ​ການ​ວັດ​ທະ​ນະ​ທຳ-ສັງ​ຄົມ (ກວທສ) ສະ​ພາ​ແຫ່ງ​ຊາດ ທີ່ມີຜົນງານປະກອບສ່ວນໃນການສົ່ງເສີມການຮ່ວມມືລະຫວ່າງສອງປະເທດລາວ ແລະ ຍີ່ປຸ່ນ, ເຂົ້າຮ່ວມມີທ່ານ ນາງ ແສງ​ເດືອນ ຫລ້າ​ຈັນ​ທະ​ບູນ ລັດ​ຖະ​ມົນ​ຕີ​ກະ​ຊວງສຶກ​ສາ​ທິ​ການ ແລະ ກິ​ລາ, ພ້ອມ​ດ້ວຍ​ບັນ​ດາ​ແຂກ​ຖືກເຊີນ.

ໃນ​ພິ​ທີ​, ​ທ່ານ ທາ​ເກ​ຊິ ຮິ​ກິ​ຮາ​ຣະ ໄດ້​ກ່າວ​ສະ​ແດງ​ຄວາມ​ຍິນ​ດີກັບທ່ານ ສົມ​ພູ ດວງ​ສະ​ຫວັນ ທີ່​ໄດ້ຮັບການປະດັບຫລຽນດັ່ງກ່າວ ເຊິ່ງທ່ານໄດ້ມີ​ສ່ວນ​ຮ່ວມທີ່​ສຳ​ຄັນໃນ​ການ​ເສີມ​ສ້າງສາຍ​ພົວ​ພັນ​ມິດ​ຕະ​ພາບ ແລະ ການ​ແລກ​ປ່ຽນການ​ພົວ​ພັນ​ຮ່ວມ​ມືດ້ານ​ລັດ​ຖະ​ສະ​ພ​າ ລະ​ຫວ່າງ ສ​ປ​ປລາວ ແລະ ຍີ່​ປຸ່ນ.

​​​ທ່ານ ສົມ​ພູ ດວງ​ສະ​ຫວັນ ປະ​ຕິ​ບັດໜ້າ​ທີ່​ເປັນ​ປະ​ທານຄະ​ນະ​ມິດ​ຕະ​ພາບລັດ​ຖະ​ສະ​ພາ ລາວ-ຍີ່​ປຸ່ນ ​ແຕ່​ປີ 2011-2016 ເຊິ່ງໄດ້​ປະ​ກອບ​ສ່ວນ​ອັນ​ສຳ​ຄັນເຂົ້າ​ໃນ​ການ​ສົ່ງ​ເສີມ​ການ​ຮ່ວມ​ມືລະ​ຫວ່າງສອງ​ປະ​ເທດ ໂດຍ​ຜ່ານ​ການ​ແລກ​ປ່ຽນບົດຮຽນຢ່າງ​ຕັ້ງ​ໜ້າ ກັບ​ສະ​ມາ​ຊິກ​ສະ​ພາ​ແຫ່ງ​ຊາດຂອງຢີ່​ປຸ່ນ, ທ່ານຍັງ​ໄດ້​ສະ​ໜັບ​ສະ​ໜູນ ແລະ ມີ​ສ່ວນ​ຮ່ວມຢ່າງ​ຫ້າວ​ຫັນ​ໃນ​ຫລາຍ​ກິດ​ຈະ​ກໍາ​ທາງ​ດ້ານ​ວັດ​ທະ​ນະ​ທຳ ແລະ ງານ​ຕ້ອນ​ຮັບ​ຕ່າງໆ ທີ່​ຈັດ​ຂຶ້ນ​ໂດຍສະ​ຖານ​ທູດ ແລະ ບັນດາອົງການອື່ນໆ ທີ່​ກ່ຽວ​ຂ້ອງ​ກັບຍີ່​ປຸ່ນ.