ສອງກຳມາທິການຂອງ ສພຊ ລາວ-ສສ.ຫວຽດນາມ ເຮັດວຽກຢູ່ແຂວງຄໍາມ່ວນ

15/10/2018 00:00 -

(ສພຊ) ວັນທີ 10 ຕຸລາ 2018 ຜ່ານມາ, ທີ່ຫ້ອງປະຊຸມໃຫຍ່ເບີ I ແຂວງຄໍາມ່ວນ ສະພາແຫ່ງຊາດ (ສພຊ) ໄດ້ເປີດກອງປະຊຸມຕິດຕາມກວດກາ ຂອງສອງກໍາມາທິການການຕ່າງປະເທດ ສພຊ ລາວ ແລະ ສສ. ຫວຽດນາມ ຝ່າຍລາວນຳໂດຍສະຫາຍ ເຄນທອງ ນວນທະວົງ ຮອງປະທານກຳມາທິການການຕ່າງປະເທດ ສພຊ ສປປລາວ ແລະ ຝ່າຍຫວຽດນາມນຳໂດຍສະຫາຍ ຫງວຽນ ແມ໋ງຕວຽນ ຮອງປະທານກຳມາທິການການຕ່າງປະເທດ ສພຊ ສສ.ຫວຽດນາມ; ໂດຍປະຕິບັດຕາມແຜນການເຄື່ອນໄຫວ ເພື່ອຕິດຕາມກວດກາການປະຕິບັດເນື້ອໃນ ຂໍ້ຕົກລົງ ລະຫວ່າງ ສປປລາວ ແລະ ສສ.ຫວຽດນາມ ກ່ຽວກັບການແກ້ໄຂບັນຫາການຍົກຍ້າຍພູມລຳເນົາຕາມລຳພັງໃຈ ແລະ ການແຕ່ງດອງຜິດກົດໝາຍ ຢູ່ແຂວງຄຳມ່ວນ ເຊິ່ງການເຄື່ອນໄຫວຕິດຕາມກວດກາໃນເທື່ອນີ້ ແມ່ນເຄື່ອນໄຫວຕາມແຜນການຂອງສອງປະເທດ ເພື່ອເກັບກຳຂໍ້ມູນໂຕຈິງ ລະຫວ່າງແຂວງຕໍ່ແຂວງ ກໍຄືຂອງສອງປະເທດ ເຊິ່ງເລີ່ມເຄື່ອນໄຫວ ຕິດຕາມກວດກາຢູ່ ສສ.ຫວຽດນາມ ແຕ່ວັນທີ 5-9 ຕຸລາ 2018 ສ່ວນວັນທີ 10 ຕຸລາແມ່ນເຄື່ອນໄຫວເຮັດວຽກຮ່ວມກັບແຂວງຄໍາມ່ວນ ສປປລາວ.

ການເຄື່ອນໄຫວຕິດຕາມກວດກາຄັ້ງນີ້, ສອງກຳມາທິການການຕ່າງປະເທດ ຂອງສອງປະເທດ ຍັງໄດ້ເຂົ້າຢ້ຽມຂໍ່ານັບສະຫາຍ ໂອໄດ ສຸດາພອນ ກຳມະການສູນກາງພັກ, ເລຂາພັກແຂວງ ເຈົ້າແຂວງໆຄໍາມ່ວນ ແລະ ໄດ້ຮ່ວມເຮັດວຽກກັບສະຫາຍ ສົມໃຈ ເພັດສີນວນ ຮອງເລຂາພັກແຂວງ ປະທານສະພາປະຊາຊົນແຂວງ (ສພຂ) ຄຳມ່ວນ ພ້ອມດ້ວຍພະແນກການທີ່ກ່ຽວຂ້ອງ.   ຕາມບົດລາຍງານທີ່ໄດ້ລາຍງານຕໍ່ ຄະນະຕິດຕາມກວດກາໃນເທື່ອນີ້ ມີຄື: ປະຊາຊົນຕັ້ງພູມລໍາເນົາຕາມລໍາພັງໃຈ ແລະ ສ້າງຄອບຄົວຜິດກົດໝາຍຢູ່ເບື້ອງ ສສ.ຫວຽດນາມ ບໍລິເວນຊາຍແດນແຂວງຄໍາມ່ວນ-ກວາງບິ່ງ ຕັ້ງພູມລຳເນົາຕາມລຳພັງໃຈ ມີ 2 ຄອບຄົວ, ຈໍານວນ 2 ຄົນ, ຍິງ 2 ຄົນ ແລະ ແຕ່ງດອງຜິດກົດໝາຍ 18 ຄົນ, ຍິງ 13 ຄົນ; ບໍລິເວນຊາຍແດນແຂວງຄໍາມ່ວນ-ຮ່າຕິງ   ສ້າງຄອບຄົວຜິດກົດໝາຍ 1 ຄົນ; ພ້ອມດຽວກັນນັ້ນ, ປະຊາຊົນຕັ້ງພູມລໍາເນົາຕາມລໍາພັງໃຈ ຢູ່ເບື້ອງ ສປປລາວ ບໍລິເວນຊາຍແດນເມືອງນາກາຍ ແລະ ເມືອງບົວລະພາ-ແຂວງກວາງບິິ່ງ ມີ 6 ຄອບຄົວ, ນັບທັງລູກ ມີຈຳນວນ 32 ຄົນ, ຍິງ 15 ຄົນ ແລະ ສ້າງຄອບຄົວຜິດກົດໝາຍ 37 ຄົນ, ຍິງ 19 ຄົນ; ໂດຍທັງໝົດນີ້ແມ່ນໄດ້ຄົ້ນຄວ້າຕາມຂໍ້ຕົກລົງຂອງສອງຝ່າຍ ລະຫວ່າງລັດຖະບານ ສປປລາວ ແລະ ສສ.ຫວຽດນາມ ໃນປີ 2013 ໃນຈຳນວນດັ່ງກ່າວ, ແມ່ນຍັງອະນຸຍາດໃຫ້ຢູ່ ສປປລາວ ໄດ້ ສ່ວນການພິຈາລະນາໃຫ້ສັນຊາດນັ້ນ ຕ້ອງພາຍຫລັງລັດຖະບານສອງປະເທດຕົກລົງກັນອີກເທື່ອໜຶ່ງ. ຈາກນັ້ນ, ແມ່ນໄດ້ແລກປ່ຽນຄຳຄິດເຫັນ, ຂໍ້ມູນຕ່າງໆເຊິ່ງກັນ ແລະ ກັນ ທັງນີ້, ກໍເພື່ອຄວາມເປັນເອກະພາບກ່ຽວກັບຂໍ້ມູນຕ່າງໆ ເພື່ອເປັນບ່ອນອີງ ແລະ ຄວາມສະດວກໃນການແກ້ໄຂບັນຫາດັ່ງກ່າວໃນຕໍ່ໜ້າ.