ກອງປະຊຸມເຝິກອົບຮົມການສ້າງວິທະຍາກອນໃຫ້ ສພຊ ແລະສພຂ

18/10/2018 00:00 -

(ສພຊ) ລະຫວ່າງວັນທີ 15-16 ຕຸລາ 2018, ສະຖາບັນຄົ້ນຄວ້ານິຕິກໍາ ສະພາແຫ່ງຊາດ (ສພຊ) ໄດ້ຈັດກອງປະຊຸມເຝິກອົບຮົມການສ້າງວິທະຍາກອນໃຫ້ແກ່ ສພຊ ແລະ ສະພາປະຊາຊົນຂັ້ນແຂວງ (ສພຂ) ທີ່ທ່າລາດ ເມືອງແກ້ວອຸດົມ ແຂວງວຽງຈັນ ໂດຍການເປັນປະທານຂອງທ່ານ ຄໍາເຜີຍ ປານມະໄລທອງ ຫົວໜ້າສະຖາບັນຄົ້ນຄວ້ານິຕິກໍາ ສພຊ; ເຂົ້າຮ່ວມມີທ່ານ ສຸບັນ ສະວະບຸດ ຮອງເລຂາທິການ ສພຊ, ມີບັນດາສະມາຊິກສະພາແຫ່ງຊາດ (ສສຊ) ເພດຍິງ, ຄະນະເລຂາທິການ ສພຂ, ສະມາຊິກສະພາປະຊາຊົນຂັ້ນແຂວງ (ສສຂ) ຈາກ 16 ແຂວງ, ບັນດາຊ່ຽວຊານຈາກ ສສ.ຫວຽດນາມ ແລະ ບັນດາຄະນະກົມ, ສູນ, ພະນັກງານວິຊາການຂອງສະຖາບັນຄົ້ນຄວ້ານິຕິກໍາ ສພຊ ເຂົ້າຮ່ວມ.

    ກອງປະຊຸມ ໄດ້ຮັບຟັງການສະເໜີບົດຮຽນທັກສະການເປັນນັກວິທະຍາກອນຂອງ ສພຊ ແລະ ສພຂ; ສ້າງຄວາມເຂົ້າໃຈໃຫ້ແກ່ຜູ້ແທນ ແນະນໍາໂຄງການໂດຍສັງເຂບ; ວິທີການສ້າງຄູສາດ ໃນເວລາເຝິກອົບຮົມຜູ້ແທນ; ການເຝິກອົບຮົມເອົາຜູ້ຮຽນເປັນໃຈກາງ, ຂັ້ນຕອນຮຽນ 4 ບາດກ້າວ; ທັກສະໃນການສະເໜີບົດຂອງນັກວິທະຍາກອນ ແລະ ວິທີການຈໍານວນໜຶ່ງ ໃນການດຶງດູດການມີສ່ວນຮ່ວມຂອງຜູ້ເຂົ້າຮ່ວມ. ຫລັງຈາກນັ້ນ, ກໍໄດ້ແບ່ງສໍາມະນາກອນອອກເປັນກຸ່ມ ພ້ອມທັງຊ່ວຍກັນຄົ້ນຄວ້າໃນຫົວຂໍ້ຕ່າງໆ ທີ່ກ່ຽວຂ້ອງກັບການປະຕິບັດວຽກງານຂອງ ສສຊ ແລະ ສສຂ ໂດຍໃຫ້ຜູ້ຕາງໜ້າແຕ່ລະກຸ່ມຂຶ້ນສະເໜີບົດຂອງຕົນ ພ້ອມກັນປະຕິບັດຕົວຈິງ, ປະເມີນ ແລະ ຕີລາຄາພາກປະຕິບັດຕົວຈິງ.

    ໂອກາດດັ່ງກ່າວ, ຫົວໜ້າສະຖາບັນຄົ້ນຄວ້ານິຕິກໍາສະພາແຫ່ງຊາດ ໄດ້ມີຄຳເຫັນວ່າ: ການເຝິກອົບຮົມຄັ້ງນີ້ ແມ່ນແນໃສ່ສ້າງ ແລະ ພັດທະນາແຫລ່ງວິທະຍາກອນປະຈໍາ ສພຊ ແລະ ສພຂ ໃຫ້ມີຄວາມເຂັ້ມແຂງກໍາໄດ້ພື້ນຖານ ແລະ ທັກສະຕ່າງໆ ໃນການເຝິກອົບຮົມ ພ້ອມກັບເພີ່ມທະວີການເປັນເສນາທິການທີ່ເຂັ້ມແຂງໃຫ້ແກ່ຄະນະປະຈໍາສະພາແຫ່ງຊາດ ແລະ ສພຂ ໃຫ້ມີປະສິດທິພາບຍິ່ງຂຶ້ນ ຫວັງວ່າບັນດານັກວິທະຍາກອນ ແລະ ນັກສໍາມະນາກອນຈະແລກປ່ຽນຄໍາຄິດຄໍາເຫັນນໍາກັນໃນການເຝິກອົບຮົມໃນຄັ້ງນີ້ ໃຫ້ເລິກເຊິ່ງ ປະກອບສ່ວນເຂົ້າໃນການສະໜອງຂໍ້ມູນ, ຄວາມຄິດ, ຄວາມເຫັນ, ທັດສະນະໃຫ້ແກ່ການເຝິກອົບຮົມການສ້າງນັກວິທະຍາກອນໃຫ້ແກ່ ສພຊ ແລະ ສພຂ ຢູ່ ສປປລາວ.

(ສອນສັກ ວັນວິໄຊ)