ຄະນະ ສສຊ ເພດຍິງ ເປີດກອງປະຊຸມຄົບຄະນະປະຈຳປີ 2018

18/10/2018 00:00 -

(ສພຊ) ລະຫວ່າງວັນທີ 17-18 ຕຸລາ 2018, ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6), ນະຄອນຫລວງວຽງຈັນ ຄະນະສະມາຊິກສະພາແຫ່ງຊາດ (ສສຊ) ເພດຍິງ ໄດ້ເປີດກອງປະຊຸມຄົບຄະນະປະຈໍາປີ 2018 ໂດຍການເປັນປະທານຂອງທ່ານ ນາງ ທັດສະດາພອນ ແສງສຸລິຍາ, ປະທານຄະນະ ສສຊ ເພດຍິງ; ເຂົ້າຮ່ວມມີທ່ານ ນາງ ສວນສະຫວັນ ວິຍະເກດ ຄະນະປະຈໍາສະພາແຫ່ງຊາດ, ເລຂາທິການສະພາແຫ່ງຊາດ; ມີບັນດາທ່ານປະທານ-ຮອງປະທານກຳມາທິການ, ກຳມະການຄະນະ ສສຊ ເພດຍິງ ປະຈຳເຂດເລືອກຕັ້ງໃນທົ່ວປະເທດ, ໜ່ວຍສະມາຊິກສະພາປະຊາຊົນເພດຍິງ ແຂວງຜົ້ງສາລີ ແລະ ໄຊສົມບູນ, ຫົວໜ້າ-ຮອງຫົວໜ້າກົມຈາກສະພາແຫ່ງຊາດ ແລະ ຫ້ອງການສູນກາງສະຫະພັນແມ່ຍິງລາວ ແລະ ພະນັກງານ-ວິຊາການທີ່ກ່ຽວຂ້ອງເຂົ້າຮ່ວມ 40 ກວ່າທ່ານ.

ທັງນີ້, ເພື່ອສະຫລຸບຕີລາຄາຄືນສະພາບການເຄື່ອນໄຫວວຽກງານຂອງຄະນະ ສສຊ ເພດຍິງ ໃນ 1 ປີຜ່ານມາ ແລະ ທິດທາງແຜນການ 1 ປີໃນຕໍ່ໜ້າ ແລະ ບົດລາຍງານຜົນການຕິດຕາມກວດກາຢູ່ພາກເໜືອ, ກາງ ແລະ ໃຕ້ ຂອງຄະນະ ສສຊ ເພດຍິງ, ຮຽນຮູ້ເຕັກນິກ ແລະ ການປະກອບຄຳເຫັນກ່ຽວກັບການຮັບຮອງເອົາກົດໝາຍໃນຂົງເຂດວຽກງານແມ່ຍິງ ແລະ ເດັກ, ຮັບຟັງການລາຍງານຜົນຂອງການຕິດຕາມກວດກາວຽກງານຄ້າມະນຸດເພດຍິງ ຢູ່ແຂວງຫລວງນໍ້າທາ, ຜົນຂອງການຕິດຕາມກວດກາການມີສ່ວນຮ່ວມ ແລະ ກົນໄກການປະສານງານລະຫວ່າງກຳມະການຄະນະ ສສຊ ເພດຍິງ ກັບພາກສ່ວນທີ່ກ່ຽວຂ້ອງໃນເຂດເລືອກຕັ້ງທີ 12 ແຂວງຄຳມ່ວນ ແລະ ຖອດຖອນບົດຮຽນ ແລະ ແລກປ່ຽນຄຳເຫັນຂອງ ສສຊ ເພດຍິງ ຕໍ່ວຽກງານທັງໝົດ.

ທ່ານ ນາງ ທັດສະດາພອນ ແສງສຸລິຍາ ໄດ້ຮຽກຮ້ອງມາຍັງບັນດາຜູ້ເຂົ້າຮ່ວມໃນກອງປະຊຸມຄັ້ງນີ້, ຈົ່ງພ້ອມກັນສຸມທຸກສະຕິປັນຍາ, ຄວາມຮູ້ ແລະ ປະສົບການ ໃນການປຶກສາຫາລື, ປະກອບຄຳຄິດຄຳເຫັນໃສ່ເອກະສານຕ່າງໆ ໃຫ້ມີເນື້ອໃນຄົບຖ້ວນສົມບູນ, ສ່ອງແສງເຖິງດ້ານດີ, ດ້ານອ່ອນ, ຂໍ້ຄົງຄ້າງ ແລະ ວິທີແກ້ໄຂ ແນໃສ່ເຮັດໃຫ້ວຽກງານຂອງຄະນະ ສສຊ ເພດຍິງ ມີຄຸນນະພາບ ແລະ ປະສິດທິພາບສູງ, ສອດຄ່ອງກັບແນວທາງນະໂຍບາຍຂອງພັກ-ລັດ, ຮັບໃຊ້ໜ້າທີ່ການເມືອງ ແລະ ຜົນປະໂຫຍດອັນແທ້ຈິງຂອງຊາດ ກໍຄືການຈັດຕັ້ງຜັນຂະຫຍາຍວຽກງານຂອງ ສສຊ ເພດຍິງ ໃນໄລຍະໃໝ່.

ກອງປະຊຸມຄັ້ງນີ້, ໄດ້ຮັບຟັງບົດສະຫລຸບການເຄື່ອນໄຫວວຽກງານຂອງຄະນະ ສສຊ ເພດຍິງ ປີ 2018 ແລະ ທິດທາງແຜນການປີ 2019 ແລະ ບົດລາຍງານຜົນການຕິດຕາມກວດກາຢູ່ພາກເໜືອ, ກາງ ແລະ ໃຕ້ ຈາກທ່ານ ນາງ ທະວີໄສ ພະສະຖານ ຮອງປະທານຄະນະ ສສຊ ເພດຍິງ; ຜົນການຕິດຕາມກວດກາວຽກງານການຄ້າມະນຸດເພດຍິງ ຢູ່ແຂວງຫລວງນໍ້າທາ ຈາກທ່ານ ນາງ ເກສອນ ແສງຍະວົງ ກຳມະການຄະນະ ສສຊ ເພດຍິງ, ຮອງປະທານກຳມະການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນແຂວງຫລວງນໍ້າທາ; ກອງປະຊຸມຍັງຈະໄດ້ຮັບຟັງຜົນການຕິດຕາມກວດກາການມີສ່ວນຮ່ວມ ແລະ ກົນໄກການປະສານງານ ລະຫວ່າງຄະນະ ສສຊ ເພດຍິງ ກັບພາກສ່ວນທີ່ກ່ຽວຂ້ອງໃນເຂດເລືອກຕັ້ງ, ເຕັກນິກ ແລະ ການປະກອບຄຳເຫັນກ່ຽວກັບການຮັບຮອງເອົາກົດໝາຍໃນຂົງເຂດວຽກງານແມ່ຍິງ ແລະ ເດັກ ແລະ ຮ່າງມະຕິກອງປະຊຸມຄົບຄະນະປະຈຳປີ 2018 ຂອງຄະນະ ສສຊ ເພດຍິງ; ຈາກນັ້ນ, ບັນດາຜູ້ເຂົ້າຮ່ວມໄດ້ສົນທະນາປະກອບຄຳຄິດຄຳເຫັນໃສ່ບັນດາເນື້ອໃນຕ່າງໆຢ່າງກົງໄປກົງມາ.

 (ນາງ ສຸພາວັນ ຫອມສະນິດ)