ຜົນສຳເລັດກອງປະຊຸມຄົບຄະນະ ກສຕສ ປະຈຳປີ 2018

22/10/2018 00:00 -

(ສພຊ) ວັນທີ 18 ຕຸລາຜ່ານມາ, ທີ່ສູນປະຊຸມ ແລະ ເຝິກອົບຮົມສາກົນ (ICTC) ນະຄອນຫລວງວຽງຈັນ, ກໍາມາທິການ​ເສດຖະກິດ ​ເຕັກ​​ໂນ​ໂລ​ຊີ ​ແລະ ສິ່ງ​ແວດ​ລ້ອມ (ກສຕສ) ສະພາແຫ່ງຊາດ (ສພຊ) ໄດ້ເປີດກອງປະຊຸມຄົບຄະນະປະຈໍາປີ 2018 ຂອງຕົນ ໂດຍການເປັນປະທານຂອງທ່ານ ບຸນປອນ ສີສຸລາດ ປະທານກໍາມາທິການດັ່ງກ່າວ; ເຂົ້າຮ່ວມມີທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ; ມີບັນດາທ່ານຮອງລັດຖະມົນຕີ, ຮອງປະທານກໍາມາທິການ, ສະມາຊິກ​ສະພາ​ແຫ່ງ​ຊາດ ທີ່ເປັນກໍາ​ມະ​ການຂອງ ​ກສຕສ, ຫົວໜ້າ-ຮອງ​ຫົວໜ້າກົມ ​ແລະ ພາກສ່ວນກ່ຽວຂ້ອງເຂົ້າຮ່ວມ​.

ທ່ານ ບຸນປອນ ສີສຸລາດ ໄດ້ມີຄໍາເຫັນກ່າວເປີດກອງ​ປະຊຸມ ມີບາງຕອນວ່າ: ກອງ​ປະຊຸມຄັ້ງນີ້ ແມ່ນ​ມີ​ລັກສະນະ​ແລກປ່ຽນທັດສະນະ, ປຶກສາ​ຫາລື​ຮ່ວມ​ກັນ​ຂອງ​ກໍາມະການຂອງກຳມາທິການ ກ່ຽວ​ກັບ​ບັນຫາ​ພົ້ນ​ເດັ່ນທີ່​ເກີດຂຶ້ນ​ຢູ່​ໃນ​ສັງຄົມ ທີ່​ຕິດ​ພັນ​ກັບ​ວຽກ​ງານໃນ​ຂົງ​ເຂດເສດຖະກິດ​, ຫົວ​ຂໍ້ ​ແລະ ​ເນື້ອ​ໃນ ​ທີ່ຈະ​ເຂົ້າ​ຜ່ານ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 6 ຂອງ​ ສພຊ ຊຸດ​ທີ VIII ທີ່​ຈະ​ຈັດ​ຂຶ້ນ​ໃນ​ເດືອນພະຈິກນີ້; ຫົວ​ຂໍ້​ສໍາຄັນ​ທີ່​ຈະ​ຍົກ​ຂຶ້ນມາລາ​ຍງານ ​ແລະ ປຶກສາ​ຫາລື​ຮ່ວມ​ກັນ ໃນກອງປະຊຸມຄັ້ງນີ້​​ຄື: ຮັບ​ຟັງ​ການ​ລາຍງານກ່ຽວກັບການຄົ້ນຄວ້າອອກນິຕິກຳຜັນຂະຫຍາຍນະໂຍບາຍຈັດຕັ້ງປະຕິບັດໂຄງການສົ່ງເສີມການຜະລິດເຂົ້າ ແລະ ການລ້ຽງສັດ ເພື່ອຄໍ້າປະກັນສະບຽງອາຫານ ແລະ ການຜະລິດເປັນສິນຄ້າຂອງລັດຖະບານ ຈາກກະຊວງກະສິກຳ ແລະ ປ່າໄມ້; ​ຮັບ​ຟັງ​ການສະຫລຸບຕີ​ລາຄາ ​ການ​ເຄື່ອນ​ໄຫວ​ວຽກງານ ປະ​ຈໍາປີ 2018 ​ແລະ ​ທິດທາງແຜນການ​ເຄື່ອນ​ໄຫວ ປະ​ຈໍາປີ 2019 ​ຂອງ​ ກສຕສ ສະພາແຫ່ງຊາດ;

ສໍາລັບສະພາບການກໍ່ສ້າງ ແລະ ສ້ອມແປງເສັ້ນທາງ ຈະໄດ້ຮັບຟັງການຊີ້ແຈງຈາກລັດຖະບານໃນວາລະກອງປະຊຸມສະໄໝສາມັນຂອງສະພາແຫ່ງຊາດ ໃນເດືອນພະຈິກນີ້ ແລະ ຮ່າງ​ກົດໝາຍ​ຈຳນວນ 4 ສະບັບຄື: ຮ່າງກົດໝາຍວ່າດ້ວຍທີ່ດິນ (ສະບັບປັບປຸງ); ຮ່າງກົດໝາຍວ່າດ້ວຍການລົດໄຟ (ສ້າງໃໝ່); ຮ່າງກົດໝາຍວ່າດ້ວຍລາຍເຊັນເອເລັກໂຕຣນິກ (ສ້າງໃໝ່) ແລະ ຮ່າງກົດໝາຍວ່າດ້ວຍຄວາມປອດໄພດ້ານລັງສີ (ສ້າງໃໝ່) ແມ່ນຈະ​ນໍາ​ເຂົ້າພິຈາລະນາໃນ​ກອງ​ປະຊຸມ​ສະ​ໄໝສາມັນ​ເທື່ອ​ທີ 6 ຂອງ ສພຊ ​ຊຸດ​ທີ VIII ແລະ ບັນຫາ​ອື່ນ​ໆ​ທີ່​ບັນດາ​ທ່ານ​ໃຫ້​ຄວາມ​ສົນ​ໃຈ. ດັ່ງນັ້ນ, ຈຸດປະສົງ​ຂອງ​ກອງ​ປະຊຸມ​ດັ່ງກ່າວ​ນີ້ ​ແມ່ນ​​ເພື່ອ​ໃຫ້​ພວກ​ເຮົາຮັບ​ຮູ້​, ​ເຂົ້າ​ໃຈ ​ແລະ ມີ​ເວລາ​ຄົ້ນ​ຄວ້າ ປະກອບ​ຄວາມ​ເຫັນ​ໃສ່ບັນຫາ​ທີ່​ພົ້ນ​ເດັ່ນ​ໃນ​ຂົງ​ເຂດ​ເສດຖະກິດ ​ແລະ ບັນດາ​ເນື້ອ​ໃນ​ສຳຄັນ​ທີ່​ຈະເອົາ​ເຂົ້າ​ຜ່ານ ໃນ​ກອງ​ປະຊຸມ​ສະ​ໄໝ​ສາມັນ​ຂອງ​ສະພາ​ແຫ່ງ​ຊາດ ເວົ້າ​ລວມ​ແລ້ວ​ ແມ່ນ​ເພື່ອ​ໃຫ້​ມີ​ຄວາມ​ເປັນ​ເອກະ​ພາບ​ກັນ.

   ໃນກອງປະຊຸມ, ໄດ້ຮັບຟັງການໂອ້ລົມຈາກທ່ານຮອງປະທານສະພາແຫ່ງຊາດ ຜູ້​ຊີ້​ນໍາວຽກ​ງານ​ເສດຖະກິດ, ວັດທະນະທຳ-​ສັງຄົມ ​ແລະ ​ແຜນການ, ການ​ເງິນ ​ແລະ ການກວດ​ສອບ ເຊິ່ງທ່ານ ໄດ້ມີບາງຄໍາຄິດຄໍາເຫັນ ເພື່ອເປັນທິດໃນການຄົ້ນຄວ້າ, ຄິດຫງໍາ ດັ່ງນີ້:

1. ກ່ຽວກັບພາລະບົດບາດນິຕິບັນຍັດຂອງສະພາແຫ່ງຊາດ ກໍຄືການສ້າງ ແລະ ປັບປຸງກົດໝາຍ. ກອງປະຊຸມຄັ້ງປະຖົມມະລືກຂອງ ສພຊ ຊຸດທີ VIII ໄດ້ຮັບຮອງເອົາແຜນການສ້າງ ແລະ ປັບປຸງກົດໝາຍ ທັງໝົດ 105 ສະບັບ, ໃນນີ້ ຂົງ​ເຂດ​ເສດຖະກິດມີ 55 ສະບັບ, ສ້າງ​ໃໝ່ 30 ສະບັບ ​ແລະ ປັບປຸງ 25 ສະບັບ. ນອກ​ຈາກ​ນີ້ ​ການ​ຜັນ​ຂະຫຍາຍ​ບາງ​ມາດ​ຕາ​ຂອງ​ກົດໝາຍອອກ​ເປັນ​ນິຕິ​ກໍາ​ໃຕ້​ກົດໜາຍ​ໃນ​ຂົງ​ເຂ​ດ​ເສດຖະກິດ ມີທັງໜົດ 43 ກົດໝາຍ 257 ມາດຕາ ເຊິ່ງຜັນ​ຂະຫຍາຍສໍາ​ເລັດແຕ່ 92 ມາດຕາ, ​ຍັງ​ຄ້າງ 165 ມາດຕາ ທີ່ຂະແໜງການກ່ຽວຂ້ອງ​ຕ້ອງ​ໄດ້​ສືບ​ຕໍ່​ຜັນ​ຂະຫຍາຍ​ອອກ​ເປັນ​ນິຕິ​ກຳ​ໃຕ້ກົດໝາຍ, ສະມາ​ຊິກ​ສະພາ​​ແຫ່ງ​ຊາດ​ໃນຂົງ​ເຂດ​ເສດຖະກິດ ຕ້ອງໄດ້ເອົາໃຈໃສ່ສືບຕໍ່ຊຸກຍູ້ຕິດຕາມການຄົ້ນຄວ້າອອກນິຕິກຳດັ່ງກ່າວ ໃຫ້ທັນກັບຄວາມຮຽກຮ້ອງຕ້ອງການຂອງວຽກງານຕົວຈິງ. ດັ່ງນັ້ນ, ຈຶ່ງສະເໜີໃຫ້ບັນດາທ່ານນໍາ​ໄປຄົ້ນຄວ້າ ​ແລະ ພິຈາລະນາຢ່າງເລິກເຊິ່ງແຕ່ລະກົດໝາຍ ເພື່ອຄວາມເປັນເອກະພາບກັນໃນການປະກອບຄໍາ​ຄິດຄໍາເຫັນໃນເວລາດໍາເນີນກອງປະຊຸມສະໄໝສາມັນຂອງສະພາແຫ່ງຊາດ; ສະເໜີໃຫ້ເອົາໃຈໃສ່ຄົ້ນຄວ້າ ແລະ ລົງເລິກຕື່ມອີກ ກ່ຽວກັບດ້ານໂຄງສ້າງຂອງກົດໝາຍ ແມ່ນຖືກຕ້ອງສອດຄ່ອງກັບລະບຽບການສ້າງນິຕິກໍາ, ການກຳນົດໝວດ, ມາດຕາຂອງກົດໝາຍໃຫ້ເໝາະສົມ, ສໍາລັບເນື້ອໃນ ຕ້ອງໄດ້ສ່ອງແສງເຖິງການຜັນຂະຫຍາຍແນວທາງນະໂຍບາຍຂອງພັກ, ລັດ ເປັນຕົ້ນແມ່ນສອດຄ່ອງກັບການຈັດຕັ້ງປະຕິບັດ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ x ຂອງພັກ ກໍຄືແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII; ກົດໝາຍທີ່ສ້າງໃໝ່ ແລະ ປັບປຸງໃໝ່ນີ້ ຕ້ອງໄດ້ຮັບປະກັນສິດຜົນປະໂຫຍດອັນຊອບທໍາຂອງປະຊາຊົນ ແລະ ຮັບປະກັນວ່າຈະນໍາໃຊ້ໄດ້ຢ່າງຍາວນານ (​ໃຫ້​ພະຍາຍາມ​ຫລີກ​ເວັ້ນກໍ​ລະ​ນີສ້າງຂຶ້ນ ແລະ ປະກາດໃຊ້ບໍ່ດົນແລ້ວຕ້ອງປັບປຸງໃໝ່).

2. ສະເໜີບັນດາທ່ານກໍາມະການເອົາໃຈໃສ່ຕື່ມບາງບັນຫາດັ່ງນີ້: ຕໍ່ການສະຫລຸບການປະຕິບັດແຜນການໃນປີຜ່ານມານັ້ນ ໂດຍສະເພາະແມ່ນບັນດາໜ້າວຽກທີ່ຢູ່ໃນຂົງເຂດການຕິດຕາມກວດກາຂອງ ກສຕສ  ໄດ້ຕາມຄາດໝາຍທີ່ວາງໄວ້ຫລືບໍ່, ການຕີລາຄາຜົນໄດ້ຮັບຖືກຕ້ອງກັບສະພາບຄວາມເປັນຈິງແລ້ວຫລືບໍ່, ການຕີລາຄາດ້ານອ່ອນຂໍ້ຄົງຄ້າງ ກໍຄືສາເຫດທີ່ກ່າວມານັ້ນ ເໝາະສົມແລ້ວຫລືບໍ່; ກ່ຽວກັບແຜນປີ 2019 ແມ່ນໃຫ້ບັນດາທ່ານຄົ້ນຄວ້າເບິ່ງການກຳນົດຄາດໝາຍ ຕົວເລກມະຫາພາກຕ່າງໆ ຖືກກັບທ່າແຮງ ແລະ ຄວາມອາດສາມາດຕົວຈິງຂອງປະເທດເຮົາແລ້ວບໍ່, ເປັນຕົ້ນແມ່ນຕົວເລກການເຕີບໂຕທາງດ້ານເສດຖະກິດ GDP (ລັດຖະບານວາງບໍ່ໃຫ້ຫລຸດ 7%), ຕົວເລກການລົງທຶນ, ລາຍຮັບ, ລາຍຈ່າຍ, ການຂາດດຸນ ແລະ ຄາດໜາຍອື່ນໆ. ນອກນັ້ນ ເບິ່ງຄືນການກຳນົດຊັດສ່ວນ, ໂຄງປະກອບທາງດ້ານເສດຖະກິດມະຫາພາກ ແທດເໝາະກັບສະພາບການພັດທະນາ ແລະ ທ່າແຮງຄວາມອາດສາມາດຂອງປະເທດເຮົາແລ້ວຫລືບໍ່, ປະຊາຊົນບັນດາເຜົ່າ ໄດ້ຮັບຜົນປະໂຫຍດຈາກການລົງທຶນພັດທະນານັ້ນບໍ່ ແລະ ສ່ວນແຜນການທີ່ວາງໄວ້ຂອງ 7 ກະຊວງທີ່ຢູ່ໃນຄວາມຮັບຜິດຊອບຂອງກໍາມາທິການພວກເຮົານັ້ນ ບັນດາທ່ານເຫັນວ່າເໝາະສົມແລ້ວຫລືບໍ່, ແທດເໝາະກັບສະພາບການພັດທະນາເສດຖະກິດ-ສັງຄົມແລ້ວຫລືບໍ່, ອັນສໍາຄັນແມ່ນໃຫ້ຮັບປະກັນໄປຕາມທິດພັດທະນາແບບຍືນຍົງ.

3. ບັນຫາສຸດທ້າຍ ແມ່ນການປະຕິບັດພາລະບົດບາດຕິດຕາມກວດກາຂອງສະພາແຫ່ງຊາດ ໃນການຕິດຕາມກວດການີ້ ແມ່ນປະຕິບັດຕາມກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ເຊິ່ງກໍາມະການພວກເຮົາ ກໍຄືສະມາຊິກສະພາແຫ່ງຊາດແຕ່ລະທ່ານ ຈະຕ້ອງໄດ້ຕິດຕາມ ກວດກາການປະຕິບັດລັດຖະທໍາມະນູນ, ກົດໝາຍ, ຕິດຕາມກວດກາການປະຕິບັດມະຕິຂອງສະພາ ແຫ່ງຊາດ, ມະຕິຂອງຄະນະປະຈໍາສະພາແຫ່ງຊາດ, ການປະຕິບັດໜ້າທີ່ວຽກງານ ກໍຄືອໍານາດການປົກຄອງແຕ່ລະຄັ້ງ ໄດ້ເຮັດຖືກຕ້ອງສອດຄ່ອງກັບລັດຖະທໍາມະນູນ, ກົດໝາຍ ແລະ ລະບຽບການທີ່ມີແລ້ວບໍ່. ບັນຫາສໍາຄັນອີກອັນໜຶ່ງກ່ຽວກັບການຕິດຕາມກວດການີ້ ກໍແມ່ນການຕິດຕາມກວດກາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງລັດຖະບານ ກໍຄືຂອງແຕ່ລະທ້ອງຖິ່ນ ໄປຕາມແຜນການທີ່ວາງໄວ້ຫລືບໍ່. ຕິດຕາມກວດກາການປະຕິບັດບັນດາໂຄງການ, ກິດຈະການຂະໜາດໃຫຍ່ ກໍຄືກິດຈະການທີ່ສົ່ງຜົນກະທົບໂດຍກົງເຖິງການດໍາລົງຊີວິດຂອງປະຊາຊົນບັນດາເຜົ່າ, ເປັນຕົ້ນແມ່ນໂຄງການສ້າງເຂື່ອນໄຟຟ້ານໍ້າຕົກ, ໄຟຟ້າພະລັງຄວາມຮ້ອນ, ໂຄງການທີ່ມີຜົນກະທົບຕໍ່ສັງຄົມ ທໍາມະຊາດ ແລະ ສິ່ງແວດລ້ອມ. ນອກຈາກນັ້ນ ຕ້ອງໄດ້ຕິດຕາມກວດກາບັນຫາຕ່າງໆ ທີ່ມີຜົນກະທົບໂດຍກົງຕໍ່ການດໍາລົງຊີວິດຂອງປະຊາຊົນບັນດາເຜົ່າ, ເປັນຕົ້ນແມ່ນບັນຫາການຄົ້ນຄວ້າອອກນິຕິກຳ ຜັນຂະຫຍາຍນະໂຍບາຍໂຄງການສົ່ງເສີມຜະລິດເຂົ້າ ແລະ ການລ້ຽງສັດ ເພື່ອຄໍ້າປະກັນສະບຽງອາຫານ ແລະ ການຜະລິດເປັນສິນຄ້າ ທີ່ສະພາແຫ່ງຊາດໄດ້ຮັບຮອງເອົາແລ້ວ.

ບັນຫາທີ່ກ່າວມາຂ້າງເທິງນັ້ນ, ກະຊວງກ່ຽວຂ້ອງ ​ແລະ ຂະ​ແໜງການ ໄດ້ປະສານສົມທົບກັບອໍານາດ​ການ​ປົກຄອງ​ທ້ອງ​ຖິ່ນ ຈັດຕັ້ງປະຕິບັດ ແລະ ມີມາດຕະການແກ້ໄຂບັນຫາຄືແນວໃດ, ສະມາຊິກ​ສະພາ​ແຫ່ງ​ຊາດ​ພວກ​ເຮົາ ​ກໍ​ຄວນ​ໄດ້​ຊຸກ​ຍູ້​ຕິດຕາມແຕ່ລະໄລຍະ. ນອກຈາກການປະຕິບັດສາມພາລະບົດບາດຂອງສະພາແຫ່ງຊາດແລ້ວ ໃຫ້ບັນດາທ່ານເອົາໃຈໃສ່ຄົ້ນຄວ້າເຊື່ອມຊຶມ ແລະ ກໍາແໜ້ນພາລະບົດບາດ, ສິດໜ້າທີ່ຂອງກໍາມາທິການ ເພື່ອໃຫ້ສາມາດປະຕິບັດພາລະບົດບາດເປັນເສນາທິການຂອງສະພາແຫ່ງຊາດໄດ້ຢ່າງເຕັມສ່ວນ. ພ້ອມກັນນັ້ນ ກໍເອົາໃຈໃສ່ກ່ຽວກັບການປະສານສົມທົບວຽກງານພາຍໃນກໍາມະການ ກໍຄືລະຫວ່າງ ກສຕສ ກັບບັນດາກໍາມາທິການອື່ນ ພາຍໃນສະພາແຫ່ງຊາດ, ຄະນະກຳມະການກ່ຽວຂ້ອງຂອງສະພາປະຊາຊົນແຂວງ, ກໍຄືກັບກະຊວງ (7 ກະຊວງ) ທີ່ກໍາມາທິການພວກເຮົາຮັບຜິດຊອບ ເພື່ອແລກປ່ຽນຂໍ້ມູນ-ຂ່າວສານນໍາກັນເປັນປົກກະຕິ.

(ສົມນຶກ ແກ້ວໄຊຍະຈັກ)