ຜົນສຳເລັດກອງປະຊຸມຄົບຄະນະປະຈຳປີ 2018 ຂອງຄະນະ ສສຊ ເພດຍິງ

22/10/2018 00:00 -

(ສພຊ)​ ພາຍຫລັງດໍາເນີນມາເປັນມາເວລາ 2 ວັນ ໃນວັນທີ 18 ຕຸລາ 2018 ກອງປະຊຸມຄົບຄະນະປະຈຳປີ 2018 ຂອງຄະນະສະມາຊິກສະພາແຫ່ງຊາດ (ສສຊ) ເພດຍິງ ໄດ້ອັດລົງດ້ວຍຜົນສຳເລັດອັນຈົບງາມ ທີ່ຫ້ອງປະຊຸມເລຂາທິການສະພາແຫ່ງຊາດ (ຫລັກ 6), ນະຄອນຫລວງວຽງຈັນ ໂດຍການເປັນປະທານຂອງທ່ານ ນາງ ທັດສະດາພອນ ແສງສຸລິຍາ ປະທານຄະນະ ສສຊ ເພດຍິງ; ເຂົ້າຮ່ວມມີທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ ທັງເປັນຜູ້ຊີ້ນຳຄະນະ ສສຊ ເພດຍິງ, ບັນດາທ່ານປະທານ-ຮອງປະທານກຳມາທິການ, ກຳມະການຄະນະ ສສຊ ເພດຍິງ ປະຈຳ 18 ເຂດເລືອກຕັ້ງໃນທົ່ວປະເທດ, ໜ່ວຍສະມາຊິກສະພາປະຊາຊົນເພດຍິງ ແຂວງຜົ້ງສາລີ ແລະ ໄຊສົມບູນ, ຫົວໜ້າ-ຮອງຫົວໜ້າກົມຈາກສະພາແຫ່ງຊາດ ແລະ ສູນກາງສະຫະພັນແມ່ຍິງລາວ, ພະນັກ ງານວິຊາການຈາກກົມຄະນະ ສສຊ ເພດຍິງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ 40 ກວ່າທ່ານ.

ກອງປະຊຸມຄັ້ງນີ້, ໄດ້ເຫັນດີເປັນເອກະພາບໂດຍພື້ນຖານ ຕໍ່ບົດສະຫລຸບການເຄື່ອນໄຫວວຽກງານປີ 2018 ແລະ ກອງປະຊຸມຍັງໄດ້ສະເໜີປັບປຸງຄືນບາງເນື້ອໃນຂອງບົດສະຫລຸບ; ທິດທາງແຜນການເຄື່ອນໄຫວວຽກງານປີ 2019 ຂອງຄະນະ ສສຊ ເພດຍິງ ແລະ ກຳມະການຄະນະ ສສຊ ເພດຍິງ ແຕ່ຍັງສະເໜີໃຫ້ເພີ່ມບາງບັນຫາ, ເຫັນດີສືບຕໍ່ການຕິດຕາມກວດກາ ເປັນຕົ້ນການຄ້າມະນຸດ, ການແຕ່ງດອງທີ່ບໍ່ຖືກຕ້ອງຕາມກົດໝາຍ, ການໄປອອກແຮງງານຢູ່ຕ່າງປະເທດທີ່ບໍ່ຖືກກົດໝາຍ ແລະ ເຫັນດີໃຫ້ຄະນະ ສສຊ ເພດຍິງ ກໍຄືກຳມະການຄະນະ ສສຊ ເພດຍິງ ສືບຕໍ່ຕິດຕາມກວດກາ ແລະ ຊຸກຍູ້ກ່ຽວກັບວຽກງານການສົ່ງເສີມໃຫ້ເພດຍິງ ເຂົ້າໃນຕຳແໜ່ງຕັດສິນບັນຫາທຸກຂັ້ນ ໂດຍປະສານສົມທົບກັບສະຫະພັນແມ່ຍິງລາວ ຢູ່ສູນກາງ ແລະ ທ້ອງຖິ່ນ.

        ໃນຕອນທ້າຍຂອງກອງປະຊຸມ, ທ່ານ ນາງ ສີໃສ ລືເດດມູນສອນ ໄດ້ມີຄຳເຫັນໂອ້ລົມຕໍ່ກອງປະຊຸມ ວ່າ: ກອງປະຊຸມຄັ້ງນີ້ ແມ່ນປະຕິບັດຕາມພາລະບົດບາດ, ສິດ ແລະ ໜ້າທີ່ ຂອງຄະນະ ສສຊ ເພດຍິງ ທີ່ໄດ້ກຳນົດໄວ້ໃນກົດໝາຍວ່າດ້ວຍສະພາແຫ່ງຊາດ ແລະ ເປັນການຕີລາຄາຄືນ ກ່ຽວກັບການຈັດຕັ້ງການເຄື່ອນໄຫວວຽກງານໃນ 1 ປີຜ່ານມາ  ແລະ ທິດທາງແຜນການຂອງຄະນະ ສສຊ ເພດຍິງ ໃນ 1 ປີຕໍ່ໜ້າ ແລະ ເຊື່ອໝັ້ນວ່າພາຍຫລັງສຳເລັດກອງປະຊຸມແລ້ວ ບັນດາທ່ານຈະໄດ້ນຳເອົາບົດຮຽນທີ່ໄດ້ປຶກສາຫາລື, ສົນທະນາແລກປ່ຽນຄຳຄິດຄຳເຫັນເຊິ່ງກັນ ແລະ ກັນ ແລະ ແຜນການ ເຄື່ອນໄຫວໃນຕໍ່ໜ້າ ໄປໝູນໃຊ້ເຂົ້າໃນການຈັດຕັ້ງປະຕິບັດວຽກງານຕົວຈິງຂອງແຕ່ລະທ່ານ ກໍຄືຂອງແຕ່ລະເຂດເລືອກຕັ້ງ ໃຫ້ເກີດດອກອອກຜົນເປັນຮູບປະທຳ.

(ນາງ ສຸພາວັນ ຫອມສະນິດ)