ຫົວໜ້າຄະນະຮັບຜິດຊອບວຽກງານເຂດເລືອກຕັ້ງ ເຄື່ອນໄຫວວຽກງານຢູ່ແຂວງບໍ່ແກ້ວ

22/10/2018 00:00 -

(ສພຊ), ສະພາປະຊາຊົນແຂວງ (ສພຂ) ບໍ່ແກ້ວ ແລະ ອົງການປົກຄອງແຂວງບໍ່ແກ້ວ ກ່ຽວກັບການສ້າງ ແລະ ຈັດຕັ້ງປະຕິບັດນິຕິກໍາໃຕ້ກົດໝາຍ ຈໍານວນ 5 ສະບັບ, ທາບທາມໂຄງປະກອບການຈັດຕັ້ງ ແລະ ບຸກຄະລາກອນ ຂອງ ສພຂ ບໍ່ແກ້ວ ຊຸດທີ II, ໂດຍການເປັນປະທານຂອງທ່ານ ພົງສະເໜ່ ຍຸຕິທໍາ ຫົວໜ້າຄະນະຮັບຜິດຊອບວຽກງານເຂດເລືອກຕັ້ງ ສພຊ; ເຂົ້າຮ່ວມມີທ່ານ ຈອມສີ ລັດຕະນະປັນ ຮອງເຈົ້າແຂວງໆບໍ່ແກ້ວ, ມີບັນດາທ່ານ ສສຂ ບໍ່ແກ້ວ, ພະແນກພາຍໃນແຂວງ, ຄະນະຈັດຕັ້ງແຂວງ, ຫ້ອງວ່າການແຂວງ, ແນວລາວສ້າງຊາດແຂວງ, ຄະນະເລຂາທິການ ແລະ ພະນັກງານ-ລັດຖະກອນ ສພຂ ບໍ່ແກ້ວ ເຂົ້າຮ່ວມທັງໝົດ 19 ທ່ານ ຍິງ 10 ທ່ານ.

ທ່ານ ພົງສະເໜ່ ຍຸຕິທຳ ໄດ້ສະເໜີຈຸດປະສົງ ແລະ ວິທີການທາບທາມໂຄງປະກອບການຈັດຕັ້ງ ແລະ ບຸກຄະລາກອນຂອງ ສພຂ ບໍ່ແກ້ວ ຊຸດທີ II ຕາມແບບຟອມທີ່ຄະນະຮັບຜິດຊອບວຽກງານເຂດເລືອກຕັ້ງກະກຽມໃຫ້. ພ້ອມກັນນັ້ນ ບັນດາທ່ານສະມາຊິກສະພາປະຊາຊົນແຂວງ (ສສຂ), ພະແນກການ, ອົງການທຽບເທົ່າພະແນກການ, ແນວລາວສ້າງຊາດ ກໍໄດ້ໃຊ້ສິດປະຊາທິປະໄຕ ເພື່ອທາບທາມ ແລະ ປະກອບຄໍາຄິດຄໍາເຫັນໃສ່ແບບຟອມທີ່ຄະນະຮັບຜິດຊອບຈັດໃຫ້ແບບປິດລັບ. ໃນໂອກາດດັ່ງກ່າວທ່ານ ນາງ ສີແກ້ວ ມິ່ງບຸບຜາ ສສຂ, ຮອງປະທານຄະນະກໍາມະການວັດທະນະທໍາສັງຄົມ ແລະ ບັນດາເຜົ່າ (ຄວສຜ) ໄດ້ລາຍງານຫຍໍ້ກ່ຽວກັບການສ້າງ ແລະ ຈັດຕັ້ງປະຕິບັດນິຕິກໍາໃຕ້ກົດໝາຍຈໍານວນ 5 ສະບັບໃນໄລຍະຜ່ານມາ; ໃນບົດລາຍງານໄດ້ຍົກໃຫ້ເຫັນດ້ານດີ ແລະ ຜົນສຳເລັດການຈັດຕັ້ງປະຕິບັດວຽກງານຜ່ານມາ, ດ້ານອ່ອນ, ຂໍ້ຄົງຄ້າງ ແລະ ຂໍ້ສະເໜີຈໍານວນໜຶ່ງຕໍ່ຄະນະຮັບຜິດຊອບວຽກງານເຂດເລືອກຕັ້ງ ສພຊ; ພາຍຫລັງສໍາເລັດກອງປະຊຸມຄັ້ງປະຖົມມະລືກຂອງ ສພຂ ບໍ່ແກ້ວ ຊຸດທີ I ເປັນຕົ້ນມາ ບັນດາໂຄງປະກອບກົງຈັກການຈັດຕັ້ງກໍໄດ້ຮັບການສ້າງ ແລະ ປັບປຸງ ຕາມພາລະບົດບາດ, ສິດ ແລະ ໜ້າທີ່ ຕາມທີ່ໄດ້ກໍານົດໃນລັດຖະທໍາມະນູນ ແລະ ກົດໝາຍ, ໄລຍະຜ່ານມາ ຄະນະປະຈໍາ ສພຂ ບໍ່ແກ້ວ ໄດ້ສ້າງຕັ້ງຂະແໜງການຊ່ວຍວຽກອອກເປັນ 10 ຂະແໜງການ ແລະ ໄດ້ບັນຈຸ, ສັບຊ້ອນບຸກຄະລາກອນເຂົ້າໃສ່ແຕ່ລະຕໍາແໜ່ງງານ ທີ່ຖືກຕ້ອງສອດຄ່ອງກັບວິຊາສະເພາະທີ່ໄດ້ຮຽນມາ. ສໍາລັບນິຕິກໍາໃຕ້ກົດໝາຍ 5 ສະບັບ ທີ່ທາງຄະນະຮັບຜິດຊອບວຽກງານເຂດເລືອກຕັ້ງ ສພຊ ໄດ້ສ້າງ ແລະ ນໍາມາສະເໜີຕໍ່ກອງປະຊຸມຄັ້ງນີ້, ຜ່ານມາຄະນະປະຈໍາ ສພຂ ໄດ້ສ້າງນິຕິກໍາໃຕ້ກົດໝາຍໄດ້ 2 ສະບັບຄື: ມະຕິ ຂອງຄະນະປະຈໍາ ສພຂ ບໍ່ແກ້ວ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງໜ່ວຍສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ ແລະ ມະຕິ ຂອງຄະນະປະຈໍາ ສພຂ ບໍ່ແກ້ວ ວ່າດ້ວຍການຈັດຕັ້ງ ແລະ ການເຄື່ອນໄຫວວຽກງານຂອງຂະແໜງຊ່ວຍວຽກຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ. ຈາກນັ້ນ, ທ່ານຫົວໜ້າຄະນະຮັບຜິດຊອບວຽກງານເຂດເລືອກຕັ້ງ ໄດ້ອະທິບາຍ, ຊີ້ແຈງຕໍ່ຂໍ້ສະເໜີຂອງ ສສຂ ບໍ່ແກ້ວ ແລະ ສະເໜີການສ້າງ ແລະ ຈັດຕັ້ງປະຕິບັດນິຕິກໍາໃຕ້ກົດໝາຍ ຈຳນວນ 5 ສະບັບ ເຊິ່ງ 2 ສະບັບທີ່ໄດ້ຮັບຮອງ ແລະ ຈັດຕັ້ງປະຕິບັດໄປແລ້ວນັ້ນ ແມ່ນໃຫ້ສືບຕໍ່ຈັດຕັ້ງປະຕິບັດໃຫ້ໄດ້ຮັບຜົນດີຂຶ້ນຕື່ມ; ສ່ວນຈໍານວນ 3 ສະບັບຄື: ຂໍ້ຕົກລົງຮ່ວມ ວ່າດ້ວຍການພົວພັນລະຫວ່າງ ສພຂ ກັບອົງການປົກຄອງແຂວງ, ມະຕິ ຂອງຄະນະປະຈໍາ ສພຂ ບໍ່ແກ້ວ ວ່າດ້ວຍການດໍາເນີນກອງປະຊຸມຂອງ ສພຂ ແລະ ມະຕິ ຂອງຄະນະປະຈໍາ ສພຂ ບໍ່ແກ້ວ ວ່າດ້ວຍການພົບປະປະຊາຊົນຂອງ ສພຂ ແມ່ນໃຫ້ຄະນະປະຈໍາ ສພຂ ສືບຕໍ່ສ້າງນິຕິກໍາດັ່ງກ່າວ ເພື່ອນໍາໄປຈັດຕັ້ງປະຕິບັດໃຫ້ໄດ້ຮັບຜົນດີເທື່ອລະກ້າວ.