ກບຜ ຍົກລະດັບຄວາມສາມາດທາງດ້ານວຽກງານຊົນເຜົ່າ ແລະສາສະໜາ

25/10/2018 00:00 -

(ສພຊ) ລະຫວ່າງວັນທີ 22-25 ຕຸລາ 2018, ທີ່ສະໂມສອນເມືອງວັງວຽງ ແຂວງວຽງຈັນ ກໍາມາທິການບັນດາເຜົ່າ (ກບຜ) ສະພາແຫ່ງຊາດ ໄດ້ຈັດກອງປະຊຸມເຝິກອົບຮົມຍົກລະດັບຄວາມສາມາດທາງດ້ານວຽກງານຊົນເຜົ່າ ແລະ ສາສະໜາໃຫ້ແກ່ສະມາຊິກສະພາແຫ່ງຊາດ (ສສຊ) ທີ່ສັງກັດໃນຄະນະກໍາມະການຂອງ ກບຜ ໂດຍການເປັນປະທານຂອງທ່ານ ນາງ ບົວພັນ ລີໄກຢາ ປະທານ ກບຜ ສະພາແຫ່ງຊາດ, ເຂົ້າຮ່ວມມີບັນດາຮອງປະທານສະພາປະຊາຊົນຂັ້ນແຂວງ, ຕາງໜ້າຄະນະໂຄສະນາອົບຮົມສູນກາງພັກ, ກະຊວງພາຍໃນ, ສູນກາງແນວລາວສ້າງຊາດ, ກົມໃຫຍ່ສັນຕິບານ, ຜູ້ຕາງໜ້າແຕ່ລະສາສະໜາ ແລະ ພະນັກງານວິຊາການທີ່ກ່ຽວຂ້ອງ.

        ທັງນີ້, ກໍເພື່ອຮຽນຮູ້ ແລະ ເຂົ້າໃຈທາງດ້ານທິດສະດີ, ຫລັກການ ກ່ຽວກັບການຕິດຕາມກວດກາຕາມພາລະບົດບາດ, ສິດ ແລະ ໜ້າທີ່ຂອງຕົນ; ເພື່ອເຂົ້າໃຈບົດບາດ, ບາງຫລັກທໍາຄໍາສອນ, ຫລັກພະວິໄນຕ່າງໆ ແລະ ພິທີກໍາທາງສາສະໜາ ຂອງແຕ່ລະສາສະໜາທີ່ເຄີຍໄດ້ເຄື່ອນໄຫວຢູ່ໃນເຂດຕົນຮັບຜິດຊອບ ໃຫ້ແຈ້ງຂຶ້ນກວ່າເກົ່າ; ພ້ອມທັງຮຽນຮູ້ພາລະບົດບາດ, ສິດ ແລະ ໜ້າທີ່ຂອງຂະແໜງການຕ່າງໆ ໃນການຄຸ້ມຄອງ ແລະ ປົກປ້ອງຂອງແຕ່ລະອົງການ ແຕ່ຂັ້ນສູນກາງລົງຮອດທ້ອງຖິ່ນ ໃຫ້ເປັນອັນລະອຽດ ແລະ ຈະແຈ້ງກວ່າເກົ່າ ແລະ ເພື່ອສາມາດຊຸກຍູ້, ຕິດຕາມກວດກາ ແລະ ແກ້ໄຂສະພາບທີ່ເກີດຂຶ້ນໄດ້ຢ່າງຮອບຄອບ ແລະ ທັນເວລາ. ນອກນັ້ນ, ບັນດາທ່ານທີ່ເຂົ້າຮ່ວມກອງປະຊຸມຈະໄດ້ຮັບຟັງການລາຍງານໂດຍສັງເຂບຈານທ່ານ ຄໍາຈັນ ໂສຕາປະເສີດ ຮອງປະທານກໍາມາທິການບັນດາເຜົ່າສະພາແຫ່ງຊາດ, ຮັບຟັງການສະເໜີນະໂຍບາຍຂອງພັກຕໍ່ວຽກງານສາສະໜາ; ການຄຸ້ມຄອງວຽກງານສາສະໜາ ຢູ່ ສປປລາວ (ດໍາລັດ 315/ລບ); ບົດບາດຂອງແນວລາວສ້າງຊາດ ຕໍ່ວຽກງານສາສະໜາ; ບົດບາດຂອງກົມໃຫຍ່ສັນຕິບານ ຕໍ່ວຽກງານສາສະໜາ; ຄວາມຮູ້ທົ່ວໄປກ່ຽວກັບສາສະໜາ, ຫລັກຄໍາສອນ ແລະ ພິທີກໍາຕ່າງໆ ຂອງແຕ່ລະສາສະໜາ.

        ໂອກາດດັ່ງກ່າວ ປະທານກອງປະຊຸມ ໄດ້ມີຄໍາເຫັນບາງຕອນສໍາຄັນວ່າ: ປັດຈຸບັນ ລັດຖະບານແຫ່ງ ສປປລາວ ໄດ້ຮັບຮູ້ການເຄື່ອນໄຫວທີ່ຖືກຕ້ອງຕາມກົດໝາຍຂອງບັນດາສາສະໜາ ແລະ ຄວາມເຊື່ອຕ່າງໆ ເປັນຕົ້ນສາສະໜາພຸດ, ຄຣິດສະຕຽນ, ອິດສະລາມ ແລະ ບາຮາຍ; ໃນນີ້ ສະພາແຫ່ງຊາດເວົ້າລວມ, ເວົ້າສະເພາະ ກບຜ ແມ່ນເປັນເສນາທິການໃນການຕິດຕາມກວດກາ, ການຈັດຕັ້ງ, ການເຄື່ອນໄຫວຂອງແຕ່ລະສາສະໜາ ແລະ ການຄຸ້ມຄອງວຽກງານສາສະໜາຂອງລັດ ນັບທັງຢູ່ຂັ້ນສູນກາງ, ທ້ອງຖິ່ນໃຫ້ແກ່ການນໍາ ແລະ ວິຊາການສະພາປະຊາຊົນແຂວງ ເມື່ອເຫັນໄດ້ແນວນັ້ນ ມັນຮຽກຮ້ອງໃຫ້ທຸກຄົນຈໍາເປັນຕ້ອງໄດ້ມີຄວາມເປັນເອກະພາບກັນ, ໃຫ້ມີຄວາມເຂົ້າໃຈຢ່າງເລິກເຊິ່ງຕໍ່ວຽກງານສາສະໜາ, ເພື່ອສາມາດເກັບກໍາໄດ້ສະພາບດ້ານດີທີ່ຄວນພ້ອມກັນສົ່ງເສີມ ແລະ ດ້ານຫຍໍ້ທໍ້ທີ່ຕ້ອງໄດ້ເອກະພາບໃນຮູບການ, ວິທີການແກ້ໄຂຂອງແຕ່ລະສາສະໜາໃນໄລຍະຜ່ານມາ ແລະ ອະນາຄົດຕໍ່ໄປ ເພື່ອເຕົ້າໂຮມກໍາລັງແຮງສັງລວມຂອງແຕ່ລະສາສະໜາ ປະກອບສ່ວນເຂົ້າໃນການສ້າງສາພັດທະນາປະເທດຊາດຂອງພວກເຮົາ ນັບມື້ເຂັ້ມແຂງພາຍໃຕ້ການນໍາພາຂອງພັກ, ສອດຄ່ອງກັບລັດຖະທໍາມະນູນ ແລະ ກົດໝາຍ.