ຮອງຫົວໜ້າຄະນະຮັບຜິດຊອບວຽກງານເຂດເລືອກຕັ້ງ ເຄື່ອນໄຫວວຽກງານຢູ່ ແຂວງອັດຕະປື

31/10/2018 00:00 -

(ສພຊ)​ ວັນທີ 22 ຕຸລາ 2018, ທ່ານ ຄໍາສິງ ໄຊສົມແພງ ຮອງຫົວໜ້າຄະນະຮັບຜິດຊອບວຽກງານເຂດເລືອກຕັ້ງ ສະພາແຫ່ງຊາດ (ສພຊ) ພ້ອມດ້ວຍຄະນະ ໄດ້ເຄື່ອນໄຫວເຮັດວຽກ ແລະ ເປີດກອງປະຊຸມຮ່ວມກັບສະພາປະຊາຊົນແຂວງ (ສພຂ) ອັດຕະປື ກ່ຽວກັບການທາບທາມໂຄງປະກອບກົງຈັກການຈັດຕັ້ງ ແລະ ບຸກຄະລາກອນຂອງ ສພຂ ອັດຕະປື ຊຸດທີ II, ການສ້າງ ແລະ ຈັດຕັ້ງປະຕິບັດນິຕິກຳລຸ່ມກົດໝາຍ 5 ສະບັບ; ເຂົ້າຮ່ວມມີທ່ານ ນາງ ມີນາພອນ ໄຊສົມພູ ຮອງເຈົ້າແຂວງໆອັດຕະປື, ທ່ານ ເພັດແກ້ວ ເຮືອງປັນຍາ ປະທານ ສພຂ, ມີບັນດາທ່ານສະມາຊິກສະພາປະຊາຊົນແຂວງ 5 ຕົວເມືອງ ແລະ ຫົວໜ້າພະແນກການທີ່ກ່ຽວຂ້ອງເຂົ້າຮ່ວມ.

         ກອງປະຊຸມ ໄດ້ມີຄຳເຫັນປຶກສາຫາລືກ່ຽວກັບວິທີການທາບທາມໂຄງປະກອບກົງຈັກການຈັດຕັ້ງ ແລະ ບຸກຄະລາກອນຂອງສະພາປະຊາຊົນແຂວງ ຊຸດທີ II. ພ້ອມນັ້ນ, ຄະນະຮັບຜິດຊອບວຽກງານເຂດເລືອກຕັ້ງ ສພຊ ໄດ້ສະເໜີຈຸດປະສົງຂອງການສ້າງ ແລະ ຈັດຕັ້ງປະຕິບັດນິຕິກຳລຸ່ມກົດໝາຍ ຈຳນວນ 5 ສະບັບຄື: ມະຕິຂອງຄະນະປະຈຳສະພາປະຊາຊົນແຂວງ ວ່າດ້ວຍການພົບປະປະຊາຊົນຂອງສະມາຊິກສະພາປະຊາຊົນແຂວງ, ຂໍ້ຕົກລົງຮ່ວມວ່າດ້ວຍການພົວພັນ ລະຫວ່າງ ສພຂ ກັບອົງການປົກຄອງແຂວງ, ມະຕິຂອງຄະນະປະຈຳ ສພຂ/ນະຄອນຫລວງ ວ່າດ້ວຍລະບຽບການດຳເນີນກອງປະຊຸມ ສພຂ/ນະຄອນຫລວງ, ມະຕິຂອງຄະນະປະຈຳ ສພຂ/ນະຄອນຫລວງ ວ່າດ້ວຍການຈັດຕັ້ງ ແລະ ການເຄື່່ອນໄຫວວຽກງານຂອງຂະແໜງຊ່ວຍວຽກຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ, ມະຕິຂອງຄະນະປະຈຳ ສພຂ/ນະຄອນຫລວງ ວ່າດ້ວຍການຈັດຕັ້ງ ແລະ ການເຄື່ອນໄຫວວຽກງານ ຂອງໜ່ວຍສະມາຊິກສະພາປະຊາຊົນແຂວງ/ນະຄອນຫລວງ ປະຈຳເຂດເລືອກຕັ້ງເມືອງ/ນະຄອນ.

ທັງນີ້, ກໍເພື່ອເປັນການປະກອບຄຳຄິດຄຳເຫັນ ແລະ ປຶກສາຫາລືຮ່ວມກັບບັນດາທ່ານທີ່ເຂົ້າຮ່ວມກອງປະຊຸມ ເພື່ອເຮັດໃຫ້ນິຕິກຳລຸ່ມກົດໝາຍໄດ້ຮັບການຈັດຕັ້ງປະຕິບັດໃນຕໍ່ໜ້າ ລວມທັງໂຄງປະກອບກົງຈັກຂອງ ສພຂ ຊຸດທີ II ໃຫ້ປາກົດຜົນເປັນຈິງ ແລະ ຈະໄດ້ຮັບຮູ້ເຊື່ອມຊຶມພາລະບົດບາດ ແລະ ກົນໄກການປະສານງານ ລະຫວ່າງ ສພຂ ກັບອົງການປົກຄອງແຂວງ ເຮັດໃຫ້ວຽກງານດີຂຶ້ນເທື່ອລະກ້າວ; ພ້ອມນັ້ນ ຈະໄດ້ພ້ອມກັນຊອກຫາວິທີການ ແລະ ທິດທາງ ເພື່ອເຮັດໃຫ້ໂຄງປະກອບກົງຈັກການຈັດຕັ້ງຂອງ ສພຂ ສອດຄ່ອງກັບສະພາບ ແລະ ໜ້າທີ່ການເມືອງ ແນໃສ່ສ້າງໃຫ້ ສພຂ ກາຍເປັນຕົວແທນແຫ່ງສິດ, ອໍານາດ ແລະ ຜົນປະໂຫຍດຂອງປະຊາຊົນຂັ້ນທ້ອງຖິ່ນຢ່າງແທ້ຈິງ.

(ວິນັດ ສີສຸລາດ)