ກຕທ ສຳເລັດການເຝິກອົບຮົມວຽກງານການຕ່າງປະເທດ

31/10/2018 00:00 -

(ສພຊ) ພາຍຫລັງດໍາເນີນມາເປັນເວລາ 2 ວັນ, ໃນວັັນທີ 25 ຕຸລາ 2018 ກອງປະຊຸມເຝິກອົບຮົມຍົກລະດັບຄວາມສາມາດດ້ານວຽກງານການຕ່າງປະເທດໃຫ້ແກ່ພະນັກງານສະພາແຫ່ງຊາດ ໄດ້ອັດລົງດ້ວຍຜົນສຳເລັດອັນຈົບງາມ ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ເຄນທອງ ນວນທະສິງ ຮອງປະທານກຳມາທິການການຕ່າງປະເທດ (ກຕທ) ສະພາແຫ່ງຊາດ, ເຂົ້າຮ່ວມມີບັນດາທ່ານຮອງເລຂາທິການສະພາແຫ່ງຊາດ, ບັນດາຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ 50 ກວ່າທ່ານ.

ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮຽນຮູ້ກ່ຽວກັບການຈໍລະຈອນເອກະສານຜ່ານປະຕູດຽວ; ນິຕິກຳຂອງຄະນະປະຈຳສະພາແຫ່ງຊາດ ວ່າດ້ວຍການຂໍອະນຸມັດ ແລະ ການຂໍລາຍເຊັນ; ການເຄື່ອນ ໄຫວວຽກງານຂອງຄະນະມິດຕະພາບລັດຖະສະພາ ລະຫວ່າງສະພາແຫ່ງຊາດລາວ ກັບລັດຖະສະພາຕ່າງປະເທດ; ບົດຮຽນການເຄື່ອນໄຫວວຽກງານການຕ່າງປະເທດ ໃນຂອບພົວພັນສອງຝ່າຍຂອງສະພາແຫ່ງຊາດ; ບົດຮຽນການເຄື່ອນໄຫວວຽກງານການຕ່າງປະເທດ ຂອງສະພາແຫ່ງຊາດໃນຂອບພົວພັນຫລາຍຝ່າຍ; ຂັ້ນຕອນການຄົ້ນຄວ້າໃຫ້ສັດຕະຍາບັນແກ່ສົນທິສັນຍາ ແລະ ສັນຍາສາກົນ ກ່ອນນຳເຂົ້າຜ່ານກອງປະຊຸມຄະນະປະຈຳສະພາແຫ່ງຊາດ ພິຈາລະນາ; ການສ້າງ ແລະ ປະຕິບັດສົນທິສັນຍາ ແລະ ສັນຍາສາກົນຂອງລັດຖະບານ ໃນໄລຍະຜ່ານມາ ແລະ ບົດຮຽນກ່ຽວກັບການສ້າງເອກະສານ ແລະ ການຂຽນບົດຄຳເຫັນຮັບໃຊ້ໃຫ້ແກ່ການນຳ.

ໃນຕອນທ້າຍກອງປະຊຸມ, ທ່ານ ເຄນທອງ ນວນທະສິງ ໄດ້ມີຄໍາເຫັນວ່າ: ຜ່ານການເຂົ້າຮ່ວມກອງປະຊຸມທີ່ມີຄວາມໝາຍຄວາມສຳຄັນນີ້ ເຫັນວ່າການສະເໜີບົດ, ການປະກອບຄຳຄິດຄຳເຫັນ  ແລະ ການແລກປ່ຽນບົດຮຽນລະຫວ່າງນັກວິທະຍາກອນ ແລະ ນັກສຳມະນາກອນ ແມ່ນເຕັມໄປດ້ວຍບັນຍາກາດອັນຟົດຟື້ນ,  ມີເນື້ອໃນທີ່ອຸດົມສົມບູນ, ຄົບຖ້ວນ ແລະ ພະນັກງານວິຊາການພາຍໃນສະພາແຫ່ງຊາດ ກໍຄືສຳມະນາກອນ ໄດ້ຮຽນຮູ້ເຊື່ອມຊຶມບັນດາເນື້ອໃນຈິດໃຈກອງປະຊຸມເຝິກອົບຮົມ; ທ່ານຍັງໄດ້ຮຽກຮ້ອງໃຫ້ສຳມະນາກອນທັງຫລາຍ ຈົ່ງນຳເອົາບົດຮຽນດັ່ງກ່າວໄປຈັດຕັ້ງຜັນຂະຫຍາຍເຂົ້າໃນວຽກງານຕົວຈິງ ໃຫ້ເກີດດອກອອກຜົນ ແລະ ມີປະສິດທິພາບສູງຍິ່ງໆຂຶ້ນ.

(ນາງ ອານິຕາ ມ່ວນສະຫວັດ)