ລະດົມຄວາມຄິດໃສ່ຮ່າງກົດໝາຍວ່າດ້ວຍ ທະນາຄານທຸລະກິດ

31/10/2018 00:00 -

(ສພຊ) ວັນທີ 30 ຕຸລາຜ່ານມາ, ທີ່ສູນຮ່ວມມືສາກົນ ແລະ ເຝິກອົບຮົມ (ICTC) ນະຄອນຫລວງວຽງຈັນ, ກໍາມາທິການແຜນການ, ​ການເງິນ ແລະ ການກວດສອບ (ກຜງສ) ສະພາແຫ່ງຊາດ ແລະ ພາກສ່ວນທີ່ກ່ຽວຂ້ອງ ໄດ້ຈັດກອງປະຊຸມລະດົມຄວາມຄິດເຫັນຕໍ່ຮ່າງກົດໝາຍວ່າດ້ວຍທະນາຄານທຸລະກິດ ກ່ອນນໍາເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII, ໂດຍການເປັນປະທານຂອງທ່ານ ວິໄລວົງ ບຸດດາຄໍາ ຄະນະປະຈໍາສະພາແຫ່ງຊາດ, ປະທານ ກຜງສ; ເຂົ້າຮ່ວມມີບັນດາປະທານ-ຮອງປະທານກໍາມາທິການ, ຮອງຜູ້ວ່າການທະນາຄານ ແຫ່ງ ສປປລາວ, ສະມາຊິກສະພາແຫ່ງຊາດ ທີ່ເປັນກຳມະການຂອງ ກຜງສ, ຄະ​ນະ​ກຳ​ມະການເສດຖະກິດ ແຜນການ-ການເງິນ ສະພາປະຊາຊົນຂັ້ນແຂວງ (ສພຂ), ບັນດາກະຊວງ ແລະ ອົງການກ່ຽວຂ້ອງ ປະກອບມີ: ກະຊວງການເງິນ, ກະຊວງອຸດສາຫະກໍາ ແລະ ການຄ້າ, ກະຊວງຍຸຕິທໍາ, ອົງການກວດສອບແຫ່ງລັດ, ອົງການກວດກາລັດຖະບານ, ສະຖາບັນຄົ້ນຄວ້າເສດຖະກິດແຫ່ງຊາດ, ສະພາ​ອຸດ​ສາ​ຫະ​ກຳ​ ແລະ ການ​ຄ້າແຫ່ງຊາດ ແລະ ບັນດາທະນາຄານທຸລະກິດ ພ້ອມດ້ວຍພາກສ່ວນທີ່ກ່ຽວຂ້ອງ ລວມທັງຫມົດ 117 ທ່ານ.

ຈຸດປະສົງຂອງກອງປະຊຸມຄັ້ງນີ້ ເພື່ອເປັນການເປີດກວ້າງລະດົມຄວາມຄິດຄວາມເຫັນໃສ່ ເນື້ອໃນຂອງ​ຮ່າງກົດໝາຍວ່າດ້ວຍທະນາຄານທຸລະກິດ ໃຫ້ຖືກຕ້ອງ ແລະ ສອດຄ່ອງກັບການຈັດຕັ້ງປະຕິບັດຕົວຈິງ ແລະ ສະ​ພາບຄວາມເປັນຈິງຂອງສັງຄົມໃນໄລຍະໃໝ່ ເນື່ອງຈາກວ່າກົດໝາຍສະບັບນີ້ ເປັນກົດໝາຍທີ່ມີຄວາມສຳຄັັນ ດັ່ງນັ້ນ, ຈຶ່ງມີຄວາມຈໍາເປັນຕ້ອງໄດ້ມີການລະດົມຄວາມຄິດຄວາມເຫັນຈາກຫລາຍພາກສ່ວນ ປະກອບໃສ່; ເພື່ອເປັນຂໍ້ມູນພື້ນຖານໃນການຄົົ້ນຄວ້າປັບປຸງຮ່າງກົດໝາຍດັ່ງກ່າວ ໃຫ້ມີເນື້ອ​ໃນຄົບ​ຖ້ວນ​ ແລະ ສົມບູນຍິ່ງຂຶ້ນ ກ່ອນນຳສະເໜີໃຫ້ຄະນະປະຈຳສະພາແຫ່ງຊາດພິຈາລະນາ ແລ້ວນຳເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດຊຸດທີ VIII.

ໃນພິທີໄຂກອງປະຊຸມ, ທ່ານ ວິໄລວົງ ບຸດດາຄໍາ ໄດ້ມີຄໍາເຫັນບາງຕອນວ່າ: ກອງປະຊຸມສຳມະນາຮ່າງກົດໝາຍວ່າດ້ວຍທະນາຄານທຸລະກິດຄັ້ງນີ້ ຖືວ່າເປັນກອງປະຊຸມຄັ້ງທໍາອິດທີ່ສຳມະນາຮ່ວມກັນລະຫວ່າງບັນດາສະມາຊິກສະພາແຫ່ງຊາດທີ່ເປັນກຳມະການຂອງ ກຜງສ, ຄະນະກຳມະການເສດຖະກິດ ແຜນການ, ການເງິນ ຂອງສະພາປະຊາຊົນຂັ້ນແຂວງ, ບັນດາກະຊວງ ອົງການທີ່ກ່ຽວຂ້ອງ, ທະນາຄານ ແຫ່ງ ສປປລາວ ແລະ ບັນດາຜູ້ຕາງໜ້າທະນາຄານທຸລະກິດ. ຈຸດ ປະສົງຂອງກອງປະຊຸມ ແມ່ນເພື່ອເປັນການກະກຽມຄວາມພ້ອມທາງດ້ານເນື້ອໃນຮອບດ້ານ ຂອງຮ່າງກົດໝາຍວ່າດ້ວຍທະນາຄານທຸລະກິດ ກ່ອນນຳເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດຊຸດທີ VIII, ໃນຮ່າງກົດໝາຍສະບັບປັບປຸງນີ້ ແມ່ນໄດ້ປັບປຸງຈາກສະບັບປີ 2006 ເຊິ່ງເຫັນວ່າໄດ້ຈັດຕັັ້ງປະຕິບັດເປັນເວລາ 12 ປີຜ່ານມາ, ປັດຈຸບັນ ມີທະນາຄານທຸລະກິດທັງໝົດ ຈໍານວນ 43 ແຫ່ງ, ໃນນັ້ນ ສາຂາທະນາຄານທຸລະກິດຕ່າງປະເທດ ມີຈໍານວນ 19 ແຫ່ງ. ພ້ອມກັນນັ້ນ ຕາໜ່າງການບໍລິການຂອງທະນາຄານທຸລະກິດ ກໍໄດ້ມີການຂະຫຍາຍຕົວຢ່າງກວ້າງຂວາງໃນຂອບເຂດທົ່ວປະເທດ, ຍອດເງິນຝາກຂອງທະນາຄານທຸລະກິດ ກວມເອົາ 56,05% ຂອງ GDP ແລະ ຍອດສິນເຊື່ອ ກວມເອົາ 49,27% ຂອງ GDP (ຂໍ້ມູນຈາກບົດລາຍງານເສດຖະກິດ ປີ  2017), ຜະລິດຕະພັນ ກໍມີຄວາມຫລາກຫລາຍ ແລະ ທັນສະໄໝ, ຫັນສູ່ການບໍລິການຜ່ານລະບົບເອເລັກໂຕຣນິກໃຫ້ຫລາຍຂຶ້ນ ເປັນຕົ້ນແມ່ນການໃຫ້ບໍລິການ, ການຊຳລະຄ່າສິນຄ້າ, ຄ່າບໍລິການ ແລະ ພັນທະອາກອນຕ່າງໆ ເຊິ່ງເປັນການປະກອບສ່ວນສຳຄັນເຂົ້າໃນການຊຸກຍູ້ການພັດທະນາເສດຖະກິດ-ສັງຄົມ ໂດຍລວມຂອງປະເທດ.

 ສະນັ້ນ, ເຫດຜົນໃນການປັບປຸງກົດໝາຍວ່າດ້ວຍທະນາຄານທຸລະກິດນີ້ ແມ່ນມີຫລາຍບັນ ຫາທີ່ມີຄວາມຈໍາເປັນຕ້ອງໄດ້ປັບປຸງຄືນໃໝ່ ເປັນຕົ້ນ: ການປັບປຸງກົນໄກການສ້າງຕັ້ງທະນາຄານທຸລະກິດ ໃຫ້ສອດຄ່ອງກັບລະບົບປະຕູດຽວ ຕາມກົດໝາຍວ່າດ້ວຍການສົ່ງເສີມການລົງທຶນ; ກຳນົດທຶນຈົດທະບຽນຂອງທະນາຄານທຸລະກິດ ແລະ ເງິນລົງທຶນຕໍ່າສຸດຂອງສາຂາທະນາຄານທຸລະກິດຕ່າງປະເທດຄືນໃໝ່; ປັບປຸງໂຄງປະກອບການຈັດຕັ້ງ, ກົນໄກການບໍລິຫານ ແລະ ການຄວບຄຸມພາຍໃນຂອງທະນາຄານທຸລະກິດ; ສ້າງກົນໄກການຄຸ້ມຄອງທະນາຄານທຸລະກິດ ຂອງທະນາຄານແຫ່ງ ສປປລາວ; ປັບປຸງວິທີການແກ້ໄຂບັນຫາທະນາຄານທຸລະກິດ ທີ່ຢູ່ໃນພາວະວິກິດ ແລະ ການລົ້ມລະລາຍ. ຕໍ່ບັນຫາດັ່ງກ່າວ ຈຶ່ງຮຽກຮ້ອງໃຫ້ບັນດາທ່ານຜູ້ແທນກອງປະຊຸມ ຈົ່ງໄດ້ເອົາໃຈໃສ່ຄົ້ນຄວ້າ, ສົນທະນາ, ແລກປ່ຽນຄໍາຄິດຄໍາເຫັນຢ່າງກວ້າງຂວາງ  ແລະ ເລິກເຊິ່ງ ຕໍ່ຮ່າງກົດໝາຍວ່າດ້ວຍ ທະນາຄານທຸລະກິດ ເພື່ອໃຫ້ເນື້ອໃນກົດໝາຍດັ່ງກ່າວມີຄວາມລະອຽດ, ຈະແຈ້ງຮັດກຸມ ເໝາະກັບສະພາບການພັດທະນາເສດຖະກິດ-ສັງຄົມຂອງປະເທດ, ສອດຄ່ອງກັບການເຊື່ອມໂຍງປະຊາຄົມເສດຖະກິດອາຊຽນ ແລະ ສາກົນ.

(ສົມນຶກ ແກ້ວໄຊຍະຈັກ)