ກບຜ ຈັດກອງປະຊຸມຄົບຄະນະປະຈຳປີ 2018

31/10/2018 00:00 -

(ສພຊ) ລະຫວ່າງວັນທີ 29-30 ຕຸລາ 2018, ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ສພຊ) ຫລັກ 6 ນະຄອນຫລວງວຽງຈັນ, ກໍາມາທິການບັນດາເຜົ່າ (ກບຜ) ສະພາແຫ່ງຊາດ ໄດ້ຈັດກອງປະຊຸມຄົບຄະນະ ກບຜ ປະຈໍາປີ 2018 ໂດຍການເປັນປະທານຂອງທ່ານ ນາງ ບົວພັນ ລີໄກຢາ ປະທານ ກບຜ; ມີບັນດາປະທານ-ຮອງປະທານກໍາມາທິການພາຍໃນ ສພຊ, ປະທານຄະນະສະມາຊິກສະພາແຫ່ງຊາດເພດຍິງ, ຫົວໜ້າຄະນະຮັບຜິດຊອບວຽກງານເຂດເລືອກຕັ້ງຂອງ ສພຊ, ອົງການຈັດຕັ້ງມະຫາຊົນຂັ້ນສູນກາງ, ສະມາຊິກສະພາແຫ່ງຊາດທີ່ເປັນກໍາມະການຂອງ ກບຜ, ຄະນະກົມ, ຄະນະພະແນກ ແລະ ພະນັກງານວິຊາການຂອງ ກບຜ ເຂົ້າຮ່ວມ.

          ທັງນີ້, ກໍເພື່ອສະຫລຸບຕີລາຄາ, ຖອດຖອນບົດຮຽນການເຄື່ອນໄຫວວຽກງານ 1 ປີຜ່ານມາ ແລະ ວາງທິດທາງແຜນການເຄື່ອນໄຫວວຽກງານໃນ 1 ປີຕໍ່ໜ້າ ແລະ ປະກອບຄໍາຄິດຄໍາເຫັນຂອງບັນດາອົງການຈັດຕັ້ງທີ່ກ່ຽວຂ້ອງກັບ ກບຜ ເພື່ອເປັນຂໍ້ມູນພື້ນຖານໃຫ້ແກ່ການສືບຕໍ່ພົວພັນປະສານງານ ໃນການເຄື່ອນໄຫວໃຫ້ມີຄວາມຄ່ອງຕົວ ໂດຍສະເພາະແມ່ນຂໍ້ຕົກລົງວ່າດ້ວຍລະບຽບການປະສານງານ ລະຫວ່າງຄະນະປະຈໍາສະພາແຫ່ງຊາດ ກັບຄະນະປະຈໍາແນວລາວສ້າງຊາດ ແລະ ອົງການຈັດຕັ້ງມະຫາຊົນໃນຕໍ່ໜ້າ.

          ກອງປະຊຸມ ໄດ້ຮັບຟັງບົດສະຫລຸບຕີລາຄາ, ການເຄື່ອນໄຫວວຽກງານປະຈໍາປີ 2018 ແລະ ທິດທາງແຜນການປະຈໍາປີ 2019 ຈາກທ່ານຮອງປະທານ ກບຜ; ການໃຫ້ທັດສະນະຂອງລັດຖະບານໃນການຄົ້ນຄວ້າຄໍາສະເໜີກ່ຽວກັບຊື່ເອີ້ນຊົນເຜົ່າບຣູ ຈາກຮອງລັດຖະມົນຕີກະຊວງພາຍໃນ; ການປະສານສົມທົບວຽກງານ ລະຫວ່າງສູນກາງແນວລາວສ້າງຊາດ ແລະ ສະພາແຫ່ງຊາດ ຈາກຮອງປະທານສູນກາງແນວລາວສ້າງຊາດ; ບົດລາຍງານກ່ຽວກັບໂຄງການສົ່ງເສີມໃຫ້ແມ່ຍິງລາວບັນດາເຜົ່າຢູ່ເຂດຫ່າງໄກສອກຫລີກໄດ້ເຂົ້າເຖິງການສຶກສາໃນທຸກລະດັບ ຈາກຮອງປະທານສູນກາງສະຫະພັນແມ່ຍິງລາວ; ຮັບຟັງບົດລາຍງານກ່ຽວກັບການເຄື່ອນໄຫວວຽກງານປົກປ້ອງສິດ ແລະ ຜົນປະໂຫຍດຂອງກໍາມະກອນ ແລະ ຊາວຜູ້ອອກແຮງງານລາວບັນດາເຜົ່າທີ່ຢູ່ພາຍໃນ ແລະ ຕ່າງປະເທດ ແລະ ການປະສານງານລະຫວ່າງສູນກາງສະຫະພັນກໍາມະບານລາວ ກັບກະຊວງແຮງງານ ແລະ ສະຫວັດດີການສັງຄົມ ມີຂໍ້ຫຍຸ້ງຍາກ ແລະ ຂໍ້ສະດວກແນວໃດ ຈາກປະທານສູນກາງກໍາມະບານລາວ; ບົດລາຍງານກ່ຽວກັບການກະກຽມຈັດຕັ້ງປະຕິບັດກົດໝາຍວ່າດ້ວຍສະຫະພັນນັກຮົບເກົ່າລາວ ຈາກຮອງປະທານສະຫະພັນນັກຮົບເກົ່າແຫ່ງຊາດລາວ ແລະ ຮັບຟັງບົດລາຍງານກ່ຽວກັບການກະກຽມສ້າງຮ່າງກົດໝາຍວ່າດ້ວຍຊາວໜຸ່ມລາວ ຈາກຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ຈາກນັ້ນ, ຜູ້ແທນກອງປະຊຸມກໍໄດ້ພ້ອມກັນສຸມສະຕິປັນຍາຄົ້ນຄວ້າປະກອບຄໍາຄິດຄໍາເຫັນໃສ່ບົດລາຍງານຕ່າງໆ ເພື່ອຊອກເຫັນຜົນງານດ້ານດີ-ດ້ານອ່ອນ ຂໍ້ຄົງຄ້າງ ແລະ ສາເຫດ ເພື່ອວາງວິທີການແກ້ໄຂໃນຕໍ່ໜ້າໃຫ້ແທດເໝາະກັບສະພາບຄວາມເປັນຈິງຫລາຍຂຶ້ນ.

          ປະທານກອງປະຊຸມໄດ້ມີຄໍາເຫັນຕໍ່ກອງປະຊຸມວ່າ: ກອງປະຊຸມຄົບຄະນະບັນດາເຜົ່າປະຈໍາປີ 2018 ໄຂຂຶ້ນໃນທ່າມກາງທີ່ສະພາແຫ່ງຊາດ ພວມສຸມໃສ່ການກະກຽມເນື້ອໃນທຸກດ້ານໃຫ້ແກ່ການດໍາເນີນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ    VIII.  ກອງປະຊຸມຄັ້ງນີ້ ເຖິງວ່າຈະດໍາເນີນພຽງແຕ່ 2 ວັນກໍຕາມ ແຕ່ເຊື່ອໝັ້ນວ່າບັນດາເນື້ອໃນທີ່ໄດ້ນໍາມາສະເໜີຕໍ່ກອງປະຊຸມຄັ້ງນີ້ ຈະໄດ້ມີການຄົ້ນຄວ້າປະກອບຄໍາຄິດຄໍາເຫັນຂອງຜູ້ແທນສາມາດກ້າວໄປເຖິງຄວາມເປັນເອກະພາບ ໃນດ້ານຫລັກການ ເພື່ອເປັນບ່ອນອີງໃຫ້ແກ່ ກບຜ ສືບຕໍ່ນໍາໄປປັບປຸງໃຫ້ສົມບູນ ແລະ ນໍາມາຈັດຕັ້ງປະຕິບັດຕົວຈິງໃນປີຕໍ່ໄປໃຫ້ມີຄວາມຄ່ອງຕົວ ແລະ ມີປະສິດທິພາບ ແລະ ປະສິດທິຜົນສູງກວ່າເກົ່າ.

(ສອນສັກ ວັນວິໄຊ)