ສຳເລັດເຝິກອົບຮົມຍົກລະດັບ ຄວາມສາມາດທາງດ້ານວຽງການຊົນເຜົ້າ ແລະສາສະໜາ

31/10/2018 00:00 -

(ສພຊ) ໃນວັນທີ 24 ຕຸລາ 2018 ທີ່ສະໂມສອນເມືອງວັງວຽງ ແຂວງວຽງຈັນ ໄດ້ມີພິທີປິດກອງປະຊຸມເຝິກອົບຮົມຍົກລະດັບຄວາມສາມາດທາງດ້ານວຽກງານຊົນເຜົ່າ ແລະ ສາສະໜາ ໃຫ້ແກ່ສະມາຊິກສະພາປະຊາຊົນແຂວງ (ສສຂ) ທີ່ຮັບຜິດຊອບວຽກງານບັນດາເຜົ່າ ຢ່າງເປັນທາງການ ໂດຍການເປັນປະທານຂອງທ່ານ ນາງ ບົວພັນ ລີໄກຢາ ກໍາມະການຄະນະປະຈໍາ, ປະທານກໍາມາທິການບັນດາເຜົ່າສະພາແຫ່ງຊາດ; ເຂົ້າຮ່ວມມີບັນດາຮອງປະທານສະພາປະຊາຊົນຂັ້ນແຂວງ (ສພຂ), ຕາງໜ້າຄະນະໂຄສະນາອົບຮົມສູນກາງພັກ, ກະຊວງພາຍໃນ, ສູນກາງແນວລາວສ້າງຊາດ, ກົມໃຫຍ່ສັນຕິບານ, ຕາງໜ້າແຕ່ລະສາສະໜາທັງ 6 ສາສະໜາຄື: ຄຣິສຕະຈັກ-ຂ່າວປະເສີດ, ຄຣິສຕະຈັກຄະນະວັນເສົາ, ກາໂຕລິກ, ພຸດ, ອິດສະລາມ ແລະ ບາຮາຍ ຕະຫລອດຮອດພະນັກງານວິຊາການທີ່ຮັບຜິດຊອບວຽກງານຊົນເຜົ່າ ແລະ ສາສະໜາ ທັງສູນກາງ ແລະ ເຂດເລືອກຕັ້ງ.

          ຕະຫລອດໄລຍະເວລາ 3 ວັນ ຜູ້ເຂົ້າຮ່ວມກອງປະຊຸມໄດ້ຮັບຟັງການສະເໜີຄວາມຮູ້ທົ່ວໄປກ່ຽວກັບຫລັກທໍາຄໍາສອນຂອງບັນດາສາສະໜາ ໃນ ສປປລາວ ແລະ ການສະເໜີກ່ຽວກັບທັດສະນະຂອງພັກຕໍ່ກັບວຽກງານສາສະໜາ, ດຳລັດວ່າດ້ວຍການຄຸ້ມຄອງການເຄື່ອນໄຫວຂອງບັນດາສາສະໜາ ຕິດພັນກັບຄວາມເຂົ້າໃຈດ້ານພາລະບົດບາດຂອງສູນກາງແນວລາວສ້າງຊາດເວົ້າລວມ, ເວົ້າສະເພາະ ກົມສາສະໜາຂອງສູນກາງແນວລາວສ້າງຊາດ ຕໍ່ກັບວຽກງານສາສະໜາ ແລະ ກໍາໄດ້ພາລະບົດບາດຂອງກົມໃຫຍ່ສັນຕິບານຂອງກະຊວງປ້ອງກັນຄວາມສະຫງົບ ໃນການເຄື່ອນໄຫວເກັບກໍາປາກົດການຫຍໍ້ທໍ້ທີ່ເກີດຂຶ້ນຈາກບາງສາສະໜາຢູ່ບັນດາແຂວງ ໃນບັນດາເຜົ່າທີ່ຢູ່ຫ່າງໄກສອກຫລີກ ແລະ ອື່ນໆ. ພ້ອມກັນນີ້, ຜູ້ເຂົ້າຮ່ວມກອງປະຊຸມ ຍັງໄດ້ຄົ້ນຄວ້າເປັນກຸ່ມ ເພື່ອແລກປ່ຽນຄໍາຄິດຄໍາເຫັນຢ່າງເລິກເຊິ່ງ, ດ້ວຍເຫດ ແລະ ຜົນຂອງບັນຫາທີ່ປາກົດຂຶ້ນໃນໄລຍະຜ່ານມາ ທັງໄດ້ສົນທະນາກັນ ຍົກໃຫ້ເຫັນກົນໄກການປະສານງານກັບພາກສ່ວນກ່ຽວຂ້ອງ ເປັນຕົ້ນອໍານາດການປົກຄອງ, ເຈົ້າໜ້າທີ່ ແລະ ສພຂ ກ່ຽວກັບການຄຸ້ມຄອງ ແລະ ການຕິດຕາມກວດກາເຄື່ອນໄຫວຂອງບັນດາສາສະໜາໂດຍຖືກຕ້ອງຕາມດໍາລັດ 315 ສອດຄ່ອງກັບລັດຖະທໍາມະນູນ ແລະ ກົດໝາຍ ເຊິ່ງບົດສະເໜີ ແລະ ການສົນທະນາຕ່າງໆດັ່ງກ່າວ ລ້ວນແຕ່ມີຄວາມສໍາຄັນ ເປັນການເພີ່ມຄວາມເຂົ້າໃຈເພີ່ມຕື່ມ ຈາກຄວາມຮັບຮູ້ ແລະ ຄວາມເຂົ້າໃຈໃນໄລຍະຜ່ານມາ.

          ໃນກອງປະຊຸມ ຍັງໄດ້ຮັບຟັງຄໍາເຫັນຊີ້ນໍາຂອງປະທານກອງປະຊຸມ ດັ່ງນີ້: ເພື່ອເຮັດໃຫ້ການຄຸ້ມຄອງວຽກງານສາສະໜາຕ່າງໆ ດໍາເນີນການເຄື່ອນໄຫວໄປຕາມຫລັກທໍາຄໍາສອນທີ່ດີງາມຂອງທຸກສາສະໜາເຫລົ່ານັ້ນ ຂໍສະເໜີມາຍັງບັນດາທ່ານການນໍາຂອງ ສພຂ ຈົ່ງສືບຕໍ່ນໍາເອົາເນື້ອໃນຈິດໃຈຂອງກອງປະຊຸມໃນຄັ້ງນີ້ ໄປຄົ້ນຄວ້າພິຈາລະນາ ແລະ ນໍາໄປຈັດຕັ້ງຜັນຂະຫຍາຍເປັນແຜນກິດຈະກໍາອັນລະອຽດ ເພື່ອໃຫ້ສອດຄ່ອງກັບສະພາບຄວາມເປັນຈິງຂອງເຂດເລືອກຕັ້ງຕົນໃຫ້ເກີດດອກອອກຜົນເທື່ອລະກ້າວ; ຂໍໃຫ້ຖືວ່າວຽກງານເຜົ່າ ແລະ ສາສະໜາ ເປັນສ່ວນໜຶ່ງທີ່ສໍາຄັນຂອງເຂດເລືອກຕັ້ງຕົນ ໃນການປະຕິບັດສິດເປັນຕົວແທນແຫ່ງລັດ ແລະ ຜົນປະໂຫຍດຂອງປະຊາຊົນບັນດາເຜົ່າທີ່ແທ້ຈິງ.

          ກອງປະຊຸມຄັ້ງນີ້ ໄດ້ຮັບການສະໜັບສະໜູນທຶນຈັດກອງປະຊຸມຈາກໂຄງການລຸກຊໍາບວກ ສະຕິບຕຸງ ແລະ ຕາງໜ້າແຕ່ລະສາສະໜາຍັງໄດ້ມອບເງິນຊ່ວຍເຫລືອດັ່ງນີ້:, ຄຣິສຕຈັກ-ຂ່າວປະເສີດ ມອບ 15 ລ້ານ, ໂຣມັນກາໂຕລິກ ມອບ 4 ລ້ານກີບ, ຄຣິສຕຈັກຄະນະວັນເສົາ ມອບ 1 ລ້ານກີບ ແລະ ສາສະໜາພຸດ ມອບປຶ້ມກ່ຽວກັບພະທໍາຄໍາສອນ ແລະ ປະຫວັດຄວາມເປັນມາຂອງສາສະໜາພຸດ ລວມເປັນມູນຄ່າຫລາຍລ້ານກີບ.

(ທຸງໄຊ ວິໄລພອນ)