ພິທີອັດກອງປະຊຸມຄົບຄະນະ ກບຜ ປະຈຳປີ 2018

07/11/2018 00:00 -

(ສພຊ) ກອງປະຊຸມຄົບຄະນະຂອງກໍາມາທິການບັນດາເຜົ່າ (ກບຜ) ໄດ້ອັດລົງໃນວັນທີ 30 ຕຸລາ 2018 ພາຍຫລັງທີ່ດໍາເນີນມາເປັນເວລາ 2 ວັນເຕັມ ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6) ນະຄອນຫລວງວຽງຈັນ, ໂດຍການເປັນປະທານຂອງທ່ານ ນາງ ບົວພັນ ລີໄກຢາ ກໍາມະການຄະນະປະຈໍາ, ປະທານກໍາມາທິການບັນດາເຜົ່າ (ກບຜ) ສະພາແຫ່ງຊາດ (ສພຊ); ມີບັນດາທ່ານສະມາຊິກສະພາແຫ່ງຊາດ ທີ່ເປັນກໍາມະການຂອງກໍາມາທິການບັນດາເຜົ່າ ຈາກ 18 ເຂດເລືອກຕັ້ງ, ສະມາຊິກສະພາປະຊາຊົນແຂວງ (ສສຂ) ຈໍານວນໜຶ່ງທີ່ສັງກັດໃນຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ຂອງສະພາປະຊາຊົນແຂວງ (ສພຂ), ປະທານ-ຮອງປະທານກໍາມາທິການພາຍໃນ ສພຊ, ປະທານຄະນະສະມາຊິກສະພາແຫ່ງຊາດເພດຍິງ, ຮອງລັດຖະມົນຕີກະຊວງພາຍໃນ, ຮອງປະທານສະຖາບັນວິທະຍາສາດ-ສັງຄົມແຫ່ງຊາດ, ຮອງປະທານສູນກາງແນວລາວສ້າງຊາດ, ຮອງປະທານສະຫະພັນນັກຮົບເກົ່າແຫ່ງຊາດລາວ, ຮອງປະທານສູນກາງສະຫະພັນແມ່ຍິງລາວ, ຮອງຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ຮອງປະທານສູນກາງສະຫະພັນກໍາມະບານລາວ ແລະ ບັນດາທ່ານຫົວໜ້າ-ຮອງຫົວໜ້າກົມ, ຫົງໜ້າ-ຮອງຫົວໜ້າພະແນກ ພ້ອມດ້ວຍພະນັກງານຊ່ວຍວຽກພາຍໃນກໍາມາທິການບັນດາເຜົ່າ ແລະ ບັນດາເຂດເລືອກຕັ້ງເຂົ້າຮ່ວມທັງໝົດ 89 ທ່ານ ຍິງ 40 ທ່ານ.

          ກອງປະຊຸມໄດ້ຮັບຟັງ, ພິຈາລະນາ ແລະ ຕົກລົງຮັບຮອງເອົາບັນຫາສໍາຄັນຕ່າງໆ ເປັນຕົ້ນແມ່ນກອງປະຊຸມໄດ້ຮັບຮອງ ແລະ ເຫັນດີເປັນເອກະພາບໂດຍພື້ນຖານ ຕໍ່ບົດສະຫລຸບການເຄື່ອນໄຫວ ປະຈໍາປີ 2018 ແລະ ທິດທາງແຜນການ ປະຈໍາປີ 2019 ຂອງກໍາມາທິການບັນດາເຜົ່າ ເຊິ່ງໄດ້ຍົກໃຫ້ເຫັນຜົນງານດ້ານດີໃນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນໃນຖານະເປັນເສນາທິການໃຫ້ແກ່ ສພຊ ແລະ ຄະນະປະຈໍາ ສພຊ ໃນຂົງເຂດວຽກງານບັນດາເຜົ່າ, ສາສະໜາ ແລະ ວຽກງານອື່ນໆ ທີ່ຢູ່ໃນຄວາມຮັບຜິດຊອບ, ພ້ອມກັນນັ້ນ ກໍຊີ້ໃຫ້ເຫັນດ້ານອ່ອນ ແລະ ຂໍ້ຄົງຄ້າງຈໍານວນໜຶ່ງທີ່ຈະໄດ້ສຸມໃສ່ແກ້ໄຂໃນຕໍ່ໜ້າ ໂດຍການສະຫລຸບສັງລວມຂອງ ກບຜ ແລະ ການປະກອບຄໍາເຫັນທີ່ອຸດົມສົມບູນ ຈາກຜູ້ແທນກອງປະຊຸມ; ປະທານກອງປະຊຸມ ໄດ້ສະແດງຄວາມຍ້ອງຍໍຊົມເຊີຍພາກສ່ວນຕ່າງໆ ໃນກອງປະຊຸມຄົບຄະນະກໍາມາທິການບັນດາເຜົ່າ ປະຈໍາປີ, ບັນດາເນື້ອໃນບົດລາຍງານທັງໝົດລ້ວນແຕ່ເປັນການສະໜອງຂໍ້ມູນສໍາຄັນໃຫ້ແກ່ ກບຜ ເພື່ອລາຍງານຕໍ່ກອງປະຊຸມຄະນະປະຈໍາສະພາແຫ່ງຊາດ ແລະ ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດຊຸດທີ VIII ທັງເປັນບ່ອນອີງໃນການລົງຕິດຕາມກວດກາ ໃນຂອບເຂດຄວາມຮັບຜິດຊອບຂອງ ກບຜ; ກອງປະຊຸມໄດ້ຮັບຟັງການສັງລວມ, ຊີ້ແຈງຂອງທ່ານປະທານ ກບຜ ໃນນາມປະທານກອງປະຊຸມຕໍ່ກັບບັນຫາທີ່ຜູ້ແທນຍົກຂຶ້ນ ເພື່ອຄວາມເປັນເອກະພາບກັນ ແລະ ເປັນທິດທາງຈັດຕັ້ງປະຕິບັດໃນຕໍ່ໜ້າ ນອກຈາກນັ້ນ, ກອງປະຊຸມຍັງໄດ້ຮຽກຮ້ອງມາຍັງ ກບຜ, ສະມາຊິກສະພາແຫ່ງຊາດ ທີ່ເປັນກໍາມະການຂອງ ກບຜ ແລະ ພາກສ່ວນກ່ຽວຂ້ອງ ຈົ່ງໄດ້ນໍາເອົາທິດທາງແຜນການ ປະຈໍາປີ 2019 ຂອງ ກບຜ ທີ່ກອງປະຊຸມໄດ້ຮັບຮອງ ພ້ອມທັງນໍາເອົາເນື້ອໃນຜົນສໍາເລັດຂອງກອງປະຊຸມຄົບຄະນະໃນເທື່ອນີ້ໄປຜັນຂະຫຍາຍ ແລະ ຈັດຕັ້ງປະຕິບັດໃຫ້ປາກົດຜົນເປັນຈິງ ໂດຍສ້າງເປັນແຜນການ, ແຜນງານກິດຈະກໍາເຄື່ອນໄຫວລະອຽດໃນແຕ່ລະໄລຍະ ແລ້ວສະຫລຸບຕີລາຄາຜົນທີ່ໄດ້ຮັບ, ດ້ານດີ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ເພື່ອເປັນຂໍ້ມູນພື້ນຖານໃຫ້ແກ່ການຈັດກອງປະຊຸມຄົບຄະນະໃນຄັ້ງຕໍ່ໄປ ແລະ ຈົ່ງເຊີດຊູໜ້າທີ່ການເມືອງຂອງຕົນໃຫ້ສູງຂຶ້ນກວ່າເກົ່າ, ເພີ່ມທະວີການປະສານສົມທົບ ເພື່ອພ້ອມກັນສ້າງຜົນງານອັນໃໝ່ທີ່ໃຫຍ່ຫລວງກວ່າເກົ່າ.

(ສອນສັກ ວັນວິໄຊ)