ກອງປະຊຸມຄົບຄະນະ ກຜງສ ປະຈຳປີ 2018

07/11/2018 00:00 -

(ສພຊ) ກອງປະຊຸມຄົບຄະນະຂອງກຳມາທິການແຜນການ, ການເງິນ ແລະ ການກວດສອບ (ກຜງສ) ສະພາແຫ່ງຊາດ ປະຈຳປີ 2018 ໄດ້ດຳເນີນລະຫວ່າງວັນທີ 30 ຕຸລາ-2 ພະຈິກ 2018, ທີ່ສູນການຮ່ວມ ມືສາກົນ ແລະ ການເຝິກອົບຮົມ (ICTC),  ນະຄອນຫລວງວຽງຈັນ ໂດຍການເປັນປະທານຂອງທ່ານ ວິໄລວົງ ບຸດດາຄຳ ປະທານ ກຜງສ, ເຂົ້າຮ່ວມມີທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ, ມີບັນດາປະທານ-ຮອງປະທານ ກຜງສ; ຮອງລັດຖະມົນຕີກະຊວງແຜນການ ແລະ ການລົງທຶນ, ຮອງລັດ ຖະມົນຕີກະຊວງການເງິນ, ຮອງປະທານອົງການກວດສອບແຫ່ງລັດ, ຮອງຫົວໜ້າອົງການກວດກາລັດຖະ ບານ, ຮອງຜູ້ວ່າການທະນາຄານ ແຫ່ງ ສປປລາວ ແລະ ຫົວໜ້າ-ຮອງຫົວໜ້າກົມ ພ້ອມດ້ວຍພະນັກງານວິ ຊາການຊ່ວຍວຽກເຂົ້າຮ່ວມ 148 ທ່ານ.

ທັງນີ້ກໍເພື່ອກວດຄືນ ແລະ ຄົ້ນຄວ້າປຶກສາຫາລືທິດທາງແຜນການກ່ຽວກັບການຈັດຕັ້ງປະຕິບັດພາ ລະບົດບາດຂອງ ກຜງສ ໃນຖານະທີ່ເປັນອົງການເສນາທິການໃຫ້ແກ່ກອງປະຊຸມສະພາແຫ່ງຊາດ ແລະ ຄະນະປະຈຳສະພາແຫ່ງຊາດ ໃນການຈັດຕັ້ງປະຕິບັດວຽກງານຂອງສະພາແຫ່ງຊາດ ຕາມສິດ ແລະ ໜ້າທີ່ ທີ່ໄດ້ກຳນົດໄວ້ໃນກົດໝາຍວ່າ ດ້ວຍສະພາແຫ່ງຊາດ ອັນໃດທີ່ເຮັດໄດ້ຢ່າງຕັ້ງໜ້າ ແລະ ຄວນເສີມ ຂະຫຍາຍ, ອັນໃດຍັງຂາດຕົກບົກຜ່ອງ ແລະ ຄວນໄດ້ພ້ອມກັນ ຫາວິທີປັບປຸງແກ້ໄຂ ແນໃສ່ຍົກສູງຄຸນນະ ພາບ ແລະ ປະສິດທິຜົນ ໃນການເຄື່ອນໄຫວວຽກງານໃຫ້ສູງຂຶ້ນ ແລະ ເພື່ອຄົ້ນຄວ້າປະກອບຄຳຄິດຄຳເຫັນ ໃສ່ບົດສະຫລຸບຂອງກຳມາທິການ, ບົດລາຍງານກ່ຽວກັບແຜນພັດທະນາເສດຖະກິດ-ສັງຄົມ, ບົດລາຍງານ ກ່ຽວກັບງົບປະມານແຫ່ງລັດ. ບົດລາຍງານຂອງອົງການກວດສອບ; ເພື່ອເປັນການກະກຽມຄວາມພ້ອມ ແລະ ສາມາດຮັບປະກັນໄດ້ທາງດ້ານເນື້ອໃນຂອງກົດໝາຍທີ່ຂຶ້ນກັບຄວາມຮັບຜິດຊອບຂອງ  ກຜງສ  ທີ່ຈະນຳສະ ເໜີເຂົ້າຜ່ານກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII.

ກອງປະຊຸມໄດ້ຮັບຟັງການສະຫລຸບຕີລາຄາ ການຈັດຕັ້ງການເຄື່ອນໄຫວວຽກງານຂອງ ກຜງສ ປະຈຳປີ 2018 ແລະ ສະເໜີທິດທາງແຜນການປີ 2019; ບົດລາຍງານກ່ຽວກັບຮ່າງບົດສະຫລຸບການ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 8 ເດືອນ ແລະ ຄາດຄະເນໝົດປີ 2018 ແລະ ທິດທາງແຜນການ ປີ 2019; ບົດລາຍງານກ່ຽວກັບຮ່າງບົດສະຫລຸບການຈັດຕັ້ງປະຕິບັດແຜນງົບປະມານ ແຫ່ງລັດ 8 ເດືອນ ແລະ ຄາດຄະເນ ໝົດປີ 2018 ແລະ ທິດທາງແຜນການປີ 2019; ບົດລາຍງານກ່ຽວ ກັບບົດສະຫລຸບການຈັດຕັ້ງປະຕິບັດວຽກງານຂອງອົງການກວດສອບແຫ່ງລັດ ໝົດປີ 2018 ແລະ ທິດທາງແຜນການປີ 2019, ລາຍງານຜົນການການກວດສອບບົດສະຫລຸບຂາດຕົວການຈັດຕັ້ງປະຕິບັດ ແຜນງົບປະມານແຫ່ງລັດ ປີ 2017; ບົດລາຍງານຜົນການກວດກາຕາມບັນຊີຂອງອົງການກວດສອບແຫ່ງ ລັດ ກ່ຽວກັບໂຄງການລົງທຶນຂອງລັດ; ບົດລາຍງານ ແລະ ປະກອບຄຳຄິດຄຳເຫັນໃສ່ບັນດາເນື້ອໃນຂອງ ກົດໝາຍວ່າດ້ວຍທະນາຄານທຸລະກິດ ທີ່ຈະນຳເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII.

ໃນກອງປະຊຸມໄດ້ພ້ອມກັນຄົ້ນຄວ້າປະກອບຄຳຄິດຄຳເຫັນຢ່າງກົງໄປກົງມາຕໍ່ແຕ່ລະບົດລາຍງານ ເພື່ອຄວາມເປັນເອກະພາບໃນຫລັກການ ເພື່ອເປັນບ່ອນອີງໃຫ້ແກ່ ກຜງສ ນຳໄປປັບປຸງໃຫ້ສົມບູນ ແລະ ນຳ ມາຈັດຕັ້ງປະຕິບັດຕົວຈິງໃຫ້ມີຄວາມຄ່ອງຕົວ ມີປະສິດທິພາບ ແລະ ປະສິດທິຜົນສູງກວ່າເກົ່າ.