ປະທານ ກວທສ ເຄື່ອນໄຫວຕິດຕາມ ກວດກາວຽກງານ ຢູ່ແຂວງຊຽງຂວາງ

07/11/2018 00:00 -

(ສພຊ) ລະຫວ່າງວັນທີ 22-26 ຕຸລາ 2018, ທ່ານ ສົມພູ ດວງສະຫວັນ ກໍາມະການຄະນະປະຈໍາ, ປະທານກໍາມາທິການວັດທະນະທໍາ-ສັງຄົມ (ກວທສ) ສະພາແຫ່ງຊາດ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ, ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນພັດທະນາຂອງບັນດາຂະແໜງການ ປະຈໍາປີ 2018 ໂດຍສະເພາະບັນດາຕົວເລກຄາດໝາຍໃນຂົງເຂດວັດທະນະທໍາ-ສັງຄົມ ຕາມທີ່ໄດ້ກໍານົດໄວ້ໃນມະຕິກອງປະຊຸມສະໄໝສາມັນເທື່ອທີ 4 ແລະ 5 ຂອງສະພາແຫ່ງຊາດຊຸດທີ VIII ຂອງບັນດາຂະແໜງການໃນຂົງເຂດວັດທະນະທໍາ-ສັງຄົມ ຢູ່ແຂວງຊຽງຂວາງ ແລະ ໄຊສົມບູນ.

ໂອກາດດັ່ງກ່າວ ຄະນະ ໄດ້ລົງເຄື່ອນໄຫວປະຊຸມຮ່ວມກັບການນໍາຂອງແຂວງຊຽງຂວາງ ໂດຍການຕ້ອນຮັບຂອງທ່ານ ບົວສອນ ສີນວນທອງ, ຄະນະປະຈໍາພັກແຂວງ, ຮອງເຈົ້າແຂວງໆຊຽງຂວາງ, ມີບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ບັນດາພະແນກການທີ່ກ່ຽວຂ້ອງຂອງແຂວງເຂົ້າຮ່ວມ.

ທ່ານ ບົວສອນ ສີນວນທອງ ໄດ້ລາຍງານ ຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ 6 ເດືອນຕົ້ນປີ  ແລະ ທິດທາງວຽກງານຈຸມສຸມ 6 ເດືອນທ້າຍປີ 2018 ຂອງແຂວງຊຽງຂວາງ ໂດຍໄດ້ຍົກໃຫ້ເຫັນດ້ານດີ ຜົນສໍາເລັດ,  ຂໍ້ຄົງຄ້າງ, ສິ່ງທ້າທາຍ ແລະ ມາດຕະການແກ້ໄຂໃນຕໍ່ໜ້າ.

ຈາກນັ້ນ, ທ່ານ ສົມພູ ດວງສະຫວັນ ໄດ້ມີຄໍາເຫັນ ໂດຍໄດ້ເນັ້ນໃຫ້ທຸກຂະແໜງການຂອງແຂວງ ສືບຕໍ່ເອົາໃຈໃສ່ ໃນການຈັດຕັ້ງປະຕິບັດລັດຖະທໍາມະນູນ, ກົດໝາຍ, ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ໂດຍສະເພາະບັນດາຄາດໝາຍທີ່ສະພາແຫ່ງຊາດຮັບຮອງເອົາໃນມະຕິກອງປະຊຸມສະພາແຫ່ງຊາດ ສະບັບເລກທີ 75/ສພຊ, 76/ສພຊ ແລະ 81/ສພຊ ເຊິ່ງຂະແໜງສຶກສາທິການ ແລະ ກິລາ ມີ 15 ຄາດໝາຍ, ຂະແໜງສາທາລະນະສຸກ ມີ 10 ຄາດໝາຍ, ຂະແໜງແຮງງານ ແລະ ສະຫວັດດີການສັງຄົມ ມີ 4 ຄາດໝາຍ, ຂະແໜງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ມີ 4 ຄາດໝາຍ ໂດຍສະເພາະເປົ້າໝາຍທີ່ຍັງບໍ່ບັນລຸ ເປັນຕົ້ນອັດຕາເຂົ້າຮຽນໃໝ່ຊຸດທິຊັ້ນປະຖົມສຶກສາ ໃຫ້ບັນລຸ 97%, ຊັ້ນມັດທະຍົມຕອນຕົ້ນ ໃຫ້ບັນລຸ 100%, ອັດຕາປະລະການຮຽນຂອງນັກຮຽນຊັ້ນປະຖົມສຶກສາ ໃຫ້ຫລຸດລົງຍັງເຫລືອ 1,7%, ຊັ້ນມັດທະຍົມຕອນຕົ້ນ ບໍ່ໃຫ້ເກີນ 5%, ເພີ່ມທະວີຄວາມເອົາໃຈໃສ່ ວຽກງານໂຄສະນາສຸຂະສຶກສາ, ໂພຊະນາການ ແລະ ວຽກງານແມ່ ແລະ ເດັກ, ອັດຕາສ່ວນການຕາຍຂອງເດັກນ້ອຍລຸ່ມ 5 ປີ ໃຫ້ບັນລຸ 39/1.000, ອັດຕາສ່ວນການຕາຍຂອງແມ່ໃຫ້ຍັງເຫລືອ 185/100.000, ອັດຕາສ່ວນການເກີດມີແພດຊ່ວຍໃຫ້ບັນລຸ 98,2%, ອັດຕາສ່ວນການສັກຢາກັນພະຍາດ ໃຫ້ບັນລຸ 90%, ອັດຕາສ່ວນການຊົມໃຊ້ນໍ້ສະອາດ ໃຫ້ບັນລຸ 85% ແລະ ອັດຕາສ່ວນການຊົມໃຊ້ວິດຖ່າຍ ໃຫ້ບັນລຸ 83,2%, ພັດທະນາສີມືແຮງງານໃຫ້ໄດ້ 4.261 ຄົນ, ຈັດຫາວຽກເຮັດງານທຳ ໃຫ້ໄດ້ 3.000 ຄົນ, ສຸມໃສ່ປະຕິບັດນະໂຍບາຍຕໍ່ຜູ້ທີ່ມີຜົນງານ ແລະ ຄຸນງາມຄວາມດີ ໃນພາລະກິດປະຕິວັດ ໃຫ້ໄດ້ຈຳນວນ 319 ທ່ານ, ສູ້ຊົນກວາດກູ້ລະເບີດອອກຈາກພື້ນທີ່ການພັດທະນາໃຫ້ໄດ້ປະມານ 700 ເຮັກຕາ ແລະ ຊ່ວຍເຫລືອຜູ້ໄດ້ຮັບຜົນກະທົບຈາກລະເບີດບໍ່ທັນແຕກ ໃຫ້ໄດ້ 50 ຄົນ, ຂະຫຍາຍຕາໜ່າງໂທລະໂຄ່ງປະຈຳບ້ານ ໃຫ້ໄດ້ 13 ບ້ານ ໃນທົ່ວແຂວງ, ສ້າງຄອບຄົວວັດທະນະທຳໃຫ້ໄດ້  1.700 ຄອບຄົວ, ບ້ານວັດທະນະທໍາ ໃຫ້ໄດ້ 10 ບ້ານ.

ນອກນີ້ ທ່ານປະທານ ກວທສ ຍັງໄດ້ລົງເຄື່ອນໄຫວເຮັດວຽກຮ່ວມກັບການນໍາ ແລະ ບັນດາຂະແໜງການຕ່າງໆ ຢູ່ເມືອງໝອກ ແລະ ເມືອງພູກູດ, ພ້ອມນັ້ນ ຍັງໄດ້ເດີນທາງລົງໄປຢ້ຽມຢາມ ແລະ ຊຸກຊູ້ວຽກງານສັກຢາກັນພະຍາດ ຢູ່ສຸກສາລາ, ບັນດາບ້ານຈຸດສຸມ ແລະ ໄດ້ມອບເຄື່ອງຊ່ວຍເຫລືອຈໍານວນໜຶ່ງ ໃຫ້ບັນດາສຸກສາລາ ແລະ ບ້ານຈຸດສຸມດັ່ງກ່າວ.