ກຳມາທິການ ປກຊ-ປກສ ຈັດກອງປະຊຸມ ຄະນະປະສານງານຮ່ວມກັບ 2 ກະຊວງກ່ຽວຂ້ອງ

08/11/2018 00:00 -

(ສພຊ) ໃນຕອນເຊົ້າວັນຈັນທີ 5 ພະຈິກຜ່ານມາ ທີ່ສະພາແຫ່ງຊາດ (ສພຊ) ໄດ້ມີກອງປະຊຸມຄະນະປະສານງານລະຫວ່າງ ກໍາມາທິການປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ສະພາແຫ່ງຊາດ ນໍາໂດຍ  ພົຈວ. ຄຳສຸກ ວີອິນທະວົງ ປະທານກໍາມາທິການ ປກຊ-ປກສ ກັບກະຊວງປ້ອງກັນຊາດ ແລະ ກະຊວງປ້ອງກັນຄວາມສະຫງົບ ໂດຍການເປັນປະທານຂອງ  ນໍາໂດຍ ພົຕ. ອ່ອນສີ ແສນສຸກ ຮອງລັດຖະມົນຕີ, ຫົວໜ້າຄະນະປະສານງານກະຊວງປ້ອງກັນປະເທດ ແລະ ພົຕ. ສົມຫວັງ ທຳມະສິດ ຮອງລັດຖະມົນຕີ, ຫົວໜ້າຄະນະປະສານງານກະຊວງປ້ອງກັນຄວາມສະຫງົບ ພ້ອມດ້ວຍຄະນະ ແລະ ພາກສ່ວນກ່ຽວຂ້ອງ.

        ກອງປະຊຸມຄັ້ງນີ້,  ເປັນການສະຫລຸບຖອດຖອນບົດຮຽນການປະສານງານລະຫວ່າງກໍາມາ ທິການ ປກຊ-ປກສ ກັບຄະນະປະສານງານກະຊວງປ້ອງກັນປະເທດ ແລະ ກະຊວງປ້ອງກັນຄວາມ ສະຫງົບໃນໄລຍະຜ່ານມາ ເພື່ອສາມາດເຫັນໄດ້ດ້ານດີ-ດ້ານອ່ອນ ຊອກຫາວິທີແກ້ໄຂ ແລະ ຜ່ານທິດທາງແຜນການໃນປີ 2019 ແລະ ຜ່ານເອກະສານທີ່ພົວພັນຈໍານວນໜຶ່ງ ເປັນຕົ້ນບົດສະຫລຸບການປະສານງານຮ່ວມກັນລະຫວ່າງກໍາມາທິການ ແລະ 2 ກະຊວງ ເຊິ່ງເຫັນໄດ້ເຖິງການ ພົວພັນປະສານງານຂອງທັງສາວພາກສ່ວນ ແລະ ຄຽງຄູ່ຈຸດດີນັ້ນ ຍັງມີຂໍ້ຄົງຄ້າງທີ່ຕ້ອງເອົາໃຈໃສ່ຄື ການແລກປ່ຍນຂໍ້ມູນ-ຂ່າວສານກັບ 2 ກະຊວງ ແມ່ນຍັງບໍ່ທັນໂລ່ງລຽນ, ວ່ອງໄວ, ທັນເວລາ ດ້ານໜຶ່ງກໍຍ້ອນການປະຕິບັດຫລັກການຜ່ານປະຕູດຽວ; ການຈັດກອງປະຊຸມຄະນະປະສານງານ ໃນການພົວພັນວຽກງານລະຫວ່າງກໍາມາທິການ ປກຊ-ປກສ ກັບ 2 ກະຊວງ ແມ່ນບໍ່ທັນໄດ້ຕາມບົດ ບັນທຶກທີ່ໄດ້ຕົກລົງກັນ 6 ເດືອນເທື່ອໜຶ່ງ. ນອກຈາກນັ້ນ ກໍໄດ້ວາງທິດທາງແຜນການເຄື່ອນໄຫວ ວຽກງານຄະນະປະສານງານ 3 ພາກສ່ວນ ທ້າຍປີ 2018 ແລະ ປີ 2019 ເພື່ອເປັນການສືບຕໍ່ພົວ ພັນປະສານງານເຊິ່ງກັນ ແລະ ກັນ ຕາມບົດບັນທຶກຂອງຄະນະປະສານງານທີ່ໄດ້ເຊັນນໍາກັນໃຫ້ມີ ຄຸນນະພາບ, ດ້ານໜຶ່ງກໍເປັນການຊຸກຍູ້, ຊ່ວຍເຫລືອ ແລະ ອໍານວຍຄວາມສະດວກໃຫ້ແກ່ການ ເຄື່ອນໄຫວປະຕິບັດໜ້າທີ່ໃຫ້ຖືກຕ້ອງ, ສອດຄ່ອງຕາມລະບຽບກົດໝາຍ ບໍ່ກ້າວກ່າຍວຽກງານ ບົດບາດຂອງກັນ ແລະ ກັນ ເຊິ່ງວ່າງອອກ 3 ດ້ານຄື: ດ້ານນິຕິກໍາ ແລະ ກົດໝາຍ, ດ້ານການ ຕິດຕາມ-ກວດກາການປະຕິບັດກົດໝາຍ ແລະ ການພົວພັນປະສານງານທົ່ວໄປ.

(ສົມນຶກ ແກ້ວໄຊຍະຈັກ)