ຄະນະຜູ້ແທນສະພາແຫ່ງຊາດສຳເລັດການເຂົ້າຮ່ວມກອງປະຊຸມສຸດຍອດອາຊີ-ປາຊີຟິກ ທີ່ ເນປານ

13/12/2018 00:00 -

(ສພຊ) ໃນລະຫວ່າງວັນທີ 30 ພະຈິກ – 3 ທັນວາ 2018, ຄະນະຜູ້ແທນສະພາແຫ່ງຊາດລາວ ນໍາໂດຍ ທ່ານ ສົມພູ ດວງສະຫວັນ,​ ຄະນະປະຈໍາ, ປະທານກໍາມາທິການວັດທະນະທໍາ-ສັງຄົມ ສະພາແຫ່ງຊາດ ໄດ້ສຳເລັດການເຂົ້າຮ່ວມກອງປະຊຸມສຸດຍອດອາຊີ-ປາຊີຟິກ ປະຈຳປີ 2018 (Asia Pacific Summit 2018) ກັດມັນດູ, ປະເທດ ເນປານ. ກອງປະຊຸມຄັ້ງນີ້ ຈັດຂື້ນໂດຍການຮ່ວມມືກັນລະຫວ່າງສະພາສູງ ແຫ່ງ ເນປານ ກັບ ສະຫະພັນສັນຕິພາບໂລກ (Universal Peace Federation) ພາຍໃຕ້ຫົວຂໍ້:​ “ການແກ້ໄຂສິ່ງທ້າທາຍຂອງໂລກໃນຍຸກປະຈຸບັນ ທີ່ອີງໃສ່ການເພິ່ງພາອາໄສເຊິ່ງກັນ ແລະ ກັນ, ຄຸນຄ່າສາກົນ ແລະ ຄວາມວັດທະນາຖາວອນຮ່ວມກັນ”. ໂດຍມີຈຸດປະສົງແນໃສ່ສົ່ງເສີມສັນຕິພາບ, ຄວາມສາມັກຄີ, ການພັດທະນາ ແລະ ການແກ້ໄຂຂໍ້ຂັດແຍ່ງຕ່າງໆຂອງໂລກ ຢ່າງສັນຕິວິທີ.

ກອງປະຊຸມສຸດຍອດອາຊີ-ປາຊີຟິກຄັ້ງນີ້ ມີ 45 ປະເທດ ໃນພາກພື້ນອາຊີ-ປາຊີຟິກ ຊື່ງມີບຸກຄົນສຳຄັນເຂົ້າຮ່ວມຈາກທຸກພາກສ່ວນຂອງສັງຄົມ ເປັນຕົ້ນ: ປາມຸກລັດ, ຫົວໜ້າລັດຖະບານ, ອະດີດຜູ້ນໍາປະເທດ, ຜູ້ນຳລັດຖະສະພາ, ນັກກົດໝາຍ, ຜູ້ນຳທາງສາດສະໜາ, ນັກທຸລະກິດ ແລະ ຜູ້ນຳອົງການທາງສັງຄົມ ຈຳນວນ 1,500 ຄົນ.

ຄະນະຜູ້ແທນສະພາແຫ່ງຊາດລາວ ໄດ້ເຂົ້າຮ່ວມກອງປະຊຸມດັ່ງກ່າວ ພ້ອມທັງໄດ້ຍາດໂອກາດພົບປະແລກປ່ຽນບົດຮຽນ ແລະ ປຶກສາຫາລືກັບຄະນະຜູ້ແທນກອງປະຊຸມ ກ່ຽວກັບການພັດທະນາແບບຍືນຍົງ, ຄວາມສົມດູນລະຫວ່າງການເຕີບທາງດ້ານເສດຖະກິດ ແລະ ການປົກປັກຮັກສາສິ່ງແວດລ້ອມ, ຫລຸດຜ່ອນຄວາມແຕກໂຕນກັນຂອງລະດັບການພັດທະນາ, ການສົ່ງເສີມການຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍ ແລະ ການປົກຄອງທີ່ດີ.

 

ກອງປະຊຸມໄດ້ປິດລົງໃນຕອນແລງຂອງວັນທີ 2 ທັນວາ 2018 ແລະ ໄດ້ຮັບຮອງເອົາຜົນຂອງກອງປະຊຸມຜ່ານການປະກາດ “ຖະແຫຼງການກັດມັນດູວ່າດ້ວຍສັນຕິພາບ ແລະ ການຮ່ວມມື”.