ສປປລາວ ປະກາດໃຊ້ກົດໝາຍແລ້ວ 139 ສະບັບ

13/12/2018 00:00 -

ໃນ​ໂອກາດ​ເຂົ້າ​ຮ່ວມ​ກອງ​ປະຊຸມ​ສະ​ໄໝສາມັນ​ເທື່ອ​ທີ 6 ຂອງ​ສະພາ​ແຫ່ງ​ຊາດ ​ຊຸດ​ທີ VIII, ​ໃນ​ວັນ​ທີ 28 ພະຈິກ ຜ່ານ​ມາ, ທ່ານ ສາຍທອງ ​ແກ້ວ​ດວງ​ດີ ປະທານ​ກໍາມາ​ທິການ​ກົດໝາຍ ສະພາ​ແຫ່ງ​ຊາດ ​ໄດ້​ໃຫ້​ສໍາພາດ​ຕໍ່ສື່​ມວນ​ຊົນ ກ່ຽວກັບ​ການ​ເຄື່ອນ​ໄຫວ​ຈັດ​ຕັ້ງ​ປະຕິບັດ​ພາລະ​ບົດ​ບາດ​ໄລຍະ​ເຄິ່ງສະ​ໄໝ  ​ແລະ ທິດ​ທາງ​ການ​ເຄື່ອນ​ໄຫວ​ແຕ່​ນີ້ຮອດ​ປີ 2020 ຂອງ​ກຳມາ​ທິການ​ ວ່າ: ກຳມາທິການກົດໝາຍ ໄດ້ນຳກົດໝາຍເຂົ້າພິຈາລະນາຮັບຮອງເອົາໃນກອງປະຊຸມສະໄໝສາມັນ ເທື່ອທີ 2 ຮອດເທື່ອທີ 6 ຂອງສະພາແຫ່ງຊາດ ຊຸດທີ VIII ມີຈໍານວນ 64 ສະບັບ, ເທົ່າກັບ 60 ສ່ວນຮ້ອຍ ຂອງແຜນການສ້າງ ແລະ ປັບປຸງກົດໝາຍ 5 ປີ, ສ້າງໃໝ່ 27 ສະບັບ, ປັບປຸງ 37 ສະບັບ ຊຶ່ງມີ 5 ຂົງເຂດ ຄື:

  1. ຂົງເຂດການປົກຄອງ ແລະ ຍຸຕິທໍາ ມີ 18 ສະບັບ, ສ້າງໃໝ່ 3 ສະບັບ, ປັບປຸງ 15 ສະບັບ ສໍາເລັດ 85,71 ສ່ວນຮ້ອຍ;
  2. ຂົງເຂດເສດຖະກິດ ມີ 29 ສະບັບ, ສ້າງໃໝ່ 14 ສະບັບ, ປັບປຸງ 15 ສະບັບ ສໍາເລັດ 52,72 ສ່ວນຮ້ອຍ;
  3. ຂົງເຂດວັດທະນະທໍາ-ສັງຄົມ ມີ 13 ສະບັບ, ສ້າງໃໝ່ 7 ສະບັບ, ປັບປຸງ 6 ສະບັບ ສໍາເລັດ 52 ສ່ວນຮ້ອຍ;
  4. ຂົງເຂດປ້ອງກັນຊາດ-ປ້ອງກັນຄວາມສະຫງົບ ມີ 2 ສະບັບ ສໍາເລັດຮ້ອຍສ່ວນຮ້ອຍ;
  5. ຂົງເຂດການຕ່າງປະເທດ ມີ 2 ສະບັບ ສໍາເລັດຮ້ອຍສ່ວນຮ້ອຍ.

ປັດຈຸບັນ ປະເທດເຮົາ ມີ ກົດໝາຍ ທັງໝົດ 145 ສະບັບ, ປະກາດໃຊ້ແລ້ວ 139 ສະບັບ.

 

  •           : ຜ່ານການຕິດຕາມກວດກາການຈັດຕັ້ງປະຕິບັດກົດໝາຍໃນໄລຍະຜ່ານ ເຫັນວ່າ ການຈັດຕັ້ງປະຕິບັດຕົວຈິງແລ້ວ ກໍຍັງມີກົດໝາຍຈໍານວນໜຶ່ງ ທີ່ບໍ່ໄດ້ຮັບການຈັດຕັ້ງຜັນຂະຫຍາຍເປັນອັນລະອຽດ; ການສ້າງ ແລະ ການປັບປຸງກົດໝາຍ ຍັງມີລັກສະນະຟ້າວຝັ່ງ, ຮີບຮ້ອນ ເຮັດໃຫ້ການກໍານົດເນື້ອໃນບໍ່ຊັດເຈນ, ຮັດກຸມ ແລະ ສອດຄ່ອງກັບສະພາບການຕົວຈິງ, ບໍ່ສາມາດຜັນຂະຫຍາຍເປັນນິຕິກໍາໃຕ້ກົດໝາຍໃຫ້ຄົບຖ້ວນ ພາໃຫ້ກົດໝາຍທີ່ປະກາດໃຊ້ແລ້ວ ບໍ່ສາມາດຈັດຕັ້ງປະຕິບັດໄດ້ເທົ່າທີ່ຄວນ. ບຸກຄົນ, ນິຕິບຸກຄົນ ແລະ ການຈັດຕັ້ງ ຍັງຂາດການໂຄສະນາເຜີຍແຜ່, ເຊື່ອມຊຶມ ແລະ ຮຽນຮູ້ກ່ຽວກັບເນື້ອໃນກົດໝາຍທີ່ມີຢູ່ຢ່າງເລິກເຊິ່ງ ເປັນຕົ້ນ ເຈົ້າໜ້າທີ່, ພະນັກງານຂອງລັດ, ລັດວິສາຫະກິດ, ບໍລິສັດເອກະຊົນ ແລະ ບຸກຄົນຈໍານວນໜຶ່ງບໍ່ເຄົາລົບ ແລະ ປະຕິບັດກົດໝາຍຢ່າງເຂັ້ມງວດ ຊຶ່ງສະແດງອອກໃນປາກົດການຫຍໍ້ທໍ້ຕ່າງໆໃນສັງຄົມ ເຊັ່ນ: ການຄ້າຂາຍຢາເສບຕິດ, ການສໍ້ລາດບັງຫລວງ, ການກໍ່ ຄວາມບໍ່ສະຫງົບ, ການລະເມີດກົດຈະລາຈອມ, ລະເມີດລະບຽບແຮງງານ ແລະ ປາກົດການຫຍໍ້ທໍ້ອື່ນ.
  • : ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ VIII ໄດ້ອອກມະຕິວ່າດ້ວຍການຮັບຮອງເອົາແຜນການຕິດຕາມກວດກາການ ອອກນິຕິກຳໃຕ້ກົດໝາຍ ສະບັບເລກທີ 018/ສພຊ, ລົງວັນທີ 28 ພະຈິກ 2016 ຊຶ່ງມີກົດໝາຍ 118 ສະບັບ, ມີ 516 ມາດຕາ ທີ່ໄດ້ກໍານົດໃຫ້ອອກລະບຽບການຕ່າງຫາກ, ໄດ້ອອກແລ້ວ 238 ມາດຕາ ແລະ ຍັງບໍ່ໄດ້ອອກ 278 ມາດຕາ; ກໍາມາທິການກົດໝາຍ ໄດ້ສືບຕໍ່ຕິດຕາມກວດກາ ຈຳນວນ 278 ມາດຕາ ທີ່ຍັງບໍ່ທັນໄດ້ອອກນັ້ນ ມາຮອດປະຈຸບັນໄດ້ອອກແລ້ວ 187 ມາດຕາ ແລະ ຍັງບໍ່ໄດ້ອອກ 91 ມາດຕາ ແລະ ໄດ້ກວດກາກົດໝາຍທີ່ບໍ່ຢູ່ ໃນມະຕິ 018 ຈໍານວນ 19 ສະບັບ ທີ່ໄດ້ກໍານົດໃຫ້ອອກລະບຽບການຕ່າງຫາກ ມີ  43 ມາດຕາ, ໄດ້ອອກແລ້ວ 30 ມາດຕາ ແລະ ຍັງບໍ່ທັນໄດ້ອອກ 13 ມາດຕາ. ຊຶ່ງລວມທັງໝົດ ມີ 559 ມາດຕາ ທີ່ໄດ້ກໍານົດໃຫ້ອອກລະບຽບການຕ່າງຫາກ ມາຮອດປັດຈຸບັນ ໄດ້ອອກແລ້ວ 455 ມາດຕາ ເທົ່າກັບ 81,40 ສ່ວນຮ້ວຍ ແລະ ຍັງບໍ່ໄດ້ອອກ 104 ມາດຕາ ເທົ່າກັບ 18,60 ສ່ວນຮ້ວຍ.
  • : ສໍາລັບຂັ້ນທ້ອງຖິ່ນ ໄດ້ສ້າງຕັ້ງສະພາປະຊາຊົນຂັ້ນແຂວງຂຶ້ນ ເຖິງວ່າຍັງບໍ່ທັນມີບົດຮຽນ ແລະ ບໍ່ມີນິຕິກໍາໃດທີ່ກໍານົດລະອຽດ ກ່ຽວກັບ ການສ້າງນິຕິກໍາຂັ້ນແຂວງກໍຕາມ ແຕ່ສະພາປະຊາຊົນຂັ້ນແຂວງ ຍັງໄດ້ພະຍາຍາມ ພິຈາລະນາ ແລະ ຮັບຮອງເອົານິຕິກໍາໃຕ້ກົດໝາຍຈໍານວນໜຶ່ງ ຊຶ່ງເປັນຜົນງານ ແລະ ຄວາມເອົາໃຈໃສ່ຂອງສະພາປະຊາຊົນຂັ້ນແຂວງ ແລະ ອົງການປົກຄອງຂັ້ນແຂວງ ໃນການຈັດຕັ້ງຜັນຂະຫຍາຍກົດໝາຍອອກເປັນນິຕິກໍາໃຕ້ກົດໝາຍ ໃຫ້ເຂົ້າສູ່ຊີວິດຕົວຈິງ ແລະ ເປັນຄູ່ມືໃນການຈັດຕັ້ງປະຕິບັດໜ້າທີ່ວຽກງານຂອງພະແນກການຂັ້ນແຂວງ ໃນທ້ອງຖິ່ນຕົນ. ເຫັນວ່າມີ 14 ແຂວງ ແລະ 1 ນະຄອນຫຼວງ ໄດ້ພິຈາລະນາ ແລະ ຮັບຮອງເອົານິຕິກໍາໃຕ້ກົດໝາຍ 60 ກວ່າສະບັບ.

ການໂຄສະນາເຜີຍແຜ່ລັດຖະທຳມະນູນ ແລະ ກົດໝາຍ ກໍແມ່ນໜ້າທີ່ໜຶ່ງທີ່ສຳຄັນ ຂອງກຳມາທິການກົດໝາຍ ເພື່ອເຮັດໃຫ້ພະນັກງານ-ລັດຖະກອນ ຂອງສະພາແຫ່ງຊາດ, ບັນດາຂະແໜງການ ແລະ ພາກສ່ວນຕ່າງໆ ທັງພາກລັດ ແລະ ເອກະຊົນ ແນໃສ່ສ້າງສະຕິເຄົາລົບກົດໝາຍ ແລະ ປະຕິບັດກົດໝາຍຢ່າງເປັນເອກະພາບໃນທົ່ວປະເທດ ນັ້ນ. ແຕ່ກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ VIII ໄດ້ນຳເອົາກົດໝາຍ ທີ່ຢູ່ໃນຄວາມຮັບຜິດຊອບຂອງສະພາແຫ່ງຊາດ ແລະ ຂົງເຂດອື່ນ ໄປເຜີຍແຜ່ໄດ້ຈຳນວນ 6 ຄັ້ງ ຊຶ່ງມີຜູ້ເຂົ້າຮ່ວມ ທັງໝົດ 524 ຄົນ, ຍິງ 199 ຄົນ. ລົງຕິດຕາມຊຸກຍູ້ບັນດາ ກະຊວງ ໂຄສະນາເຜີຍແຜ່ກົດໝາຍ ໄດ້ຈຳນວນ 6 ຄັ້ງ;

ນອກຈາກນັ້ນ ຍັງໄດ້ຂຽນບົດຄວາມເນື້ອໃນທີ່ກ່ຽວຂ້ອງກັບບາງມາດຕາຂອງກົດໝາຍ ເປັນຕົ້ນ ກົດໝາຍ ໃນຂົງເຂດການປົກຄອງ, ຂົງເຂດສັງຄົມ ໄດ້ຈຳນວນ 29 ບົດ ແລະ ບົດຂ່າວ ຈໍານວນ 37 ບົດ ຜ່ານທາງໜັງສືພີມ ຜູ້ແທນປະຊາຊົນ ເພື່ອເປັນການໂຄສະນາ ການເຄື່ອນໄຫວວຽກງານຂອງກຳມາທິການກົດໝາຍ.

ການຕີຄວາມໝາຍ ແລະ ອະທິບາຍກົດໝາຍ ກໍແມ່ນວຽກງານໜຶ່ງທີ່ສຳຄັນ ເພື່ອເຮັດໃຫ້ຄວາມເຂົ້າໃຈ ຕໍ່ກົດໝາຍ ມີຄວາມເປັນເອກະພາບໃນການຈັດຕັ້ງປະຕິບັດກົດໝາຍ, ໃນໄລຍະຜ່ານ ກຳມາທິການກົດໝາຍ ໄດ້ຮັບວຽກຕີຄວາມໝາຍ ແລະ ອະທິບາຍກົດໝາຍ ຈາກພາກສ່ວນກ່ຽວຂ້ອງນັບແຕ່ກອງປະຊຸມຄັ້ງປະຖົມມະລືກ ມາເຖິງປັດຈຸບັນທັງໝົດ ມີ 31​ ບັນຫາ, ຊຶ່ງໃນນັ້ນຜ່ານການຄົ້ນຄວ້າໃນຂັ້ນວິຊາການ ແລະ ຂັ້ນປຶກສາຫາລືກັບ ພາກສ່ວນທີ່ກ່ຽວຂ້ອງແລ້ວ ແມ່ນເຫັນວ່າ ບໍ່ສອດຄ່ອງກັບເຕັກນິກ ແລະ ຂັ້ນຕອນຂອງການສະເໜີຕີຄວາມໝາຍ ແລະ ອະທິບາຍກົດໝາຍ ທີ່ກຳນົດໃນ ມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຕີຄວາມໝາຍກົດໝາຍ ສະບັບເລກທີ 0133/ຄປຈ, ລົງວັນທີ 04 ທັນວາ 2013 ດ້ວຍເຫດຜົນດັ່ງກ່າວ ກໍາມາທິການກົດໝາຍ ຈຶ່ງໄດ້ເຮັດໜັງສືທາງການແຈ້ງຕອບໃຫ້ພາກສ່ວນກ່ຽວຂ້ອງ ເພື່ອປະຕິບັດໃຫ້ຖືກຕ້ອງຕາມຂັ້ນຕອນ ທີ່ໄດ້ກໍານົດ ໃນມະຕິຂອງຄະນະປະຈຳສະພາແຫ່ງຊາດ  ແລະ ປັບປຸງເຂົ້າໃສ່ກົດໝາຍຈໍານວນໜຶ່ງ ລວມທັງໝົດ 26 ບັນຫາ ແລະ ຍັງຄ້າງຈໍານວນ 5 ເລື່ອງ ທີ່ຢູ່ໃນຂັ້ນຕອນການຄົ້ນຄວ້າຂອງກໍາມາທິການກົດໝາຍ.

ບັນຫາທີ່ເຫັນວ່າຍັງຄົງຄ້າງ ທີ່ຕ້ອງອິງໃສ່ຫຼາຍພາກສ່ວນ ເພື່ອແກ້ໄຂ: ການສ້າງ ແລະ ປັບປຸງກົດໝາຍ ບໍ່ທັນຕາມກຳນົດເວລາທີ່ກໍານົດໃນກົດໝາຍວ່າດ້ວຍການສ້າງນິຕິກຳ, ການໂຄສະນາກົດໝາຍ ຍັງບໍ່ທັນທົ່ວເຖິງຮາກ ຖານທ້ອງຖິ່ນ, ການຕິຄວາມໝາຍກົດໝາຍຍັງຕ້ອງໄດ້ເອົາໃຈໃສ່ໃນການຄວ້າປຶກສາຫາລືກັບພາກສ່ວນກ່ຽວຂ້ອງ ໃຫ້ຫຼາຍຂຶ້ນ; ການຄົ້ນຄວ້າ, ການເກັບກຳຂໍ້ມູນ, ການກຳແໜ້ນ​ເນື້ອ​ໃນ​ຈຸດ​ສຸມ​ຂອງ​ບັນດາ​ກົດໝາຍ ທີ່​ສ້າງ​ໃໝ່ ​ແລະ ປັບປຸງ, ສາຍ​ກ່ຽວ​ພັນຂອງ​ບັນດາ​ກົດໝາຍ  ຍັງບໍ່ທັນ​ແໜ້ນ ແລະ​ ​ແຕກ​ສານ​  ເຮັດ​ໃຫ້ການຄົ້ນຄວ້າຂີດຂຽນບາງເອກະ ສານລາຍ​ງານ​ຄະນະ​ປະຈຳສະພາ​ແຫ່ງ​ຊາດ ບໍ່ທັນຮັບປະກັນທາງດ້ານຄຸນນະພາບ;  ການພົວພັນປະສານສົມທົບວຽກງານຕ່າງໆລະຫວ່າງກົມທີ່ເປັນເສນາທິການດ້ວຍກັນ, ກົມ ກັບ ກຳມາທິການ ແລະ ກົມວິຊາການກັບພາກສ່ວນອື່ນ ທີ່ກ່ຽວຂ້ອງ ຍັງເຮັດບໍ່ທັນໄດ້ດີເທົ່າທີ່ຄວນ ເນື່ອງຈາກວຽກງານມີຄວາມຮີບດ່ວນໃນບາງຄັ້ງ ການປະສານສົມທົບຍັງ​ຂາດ​ຄວາມຄ່ອງແຄ້ວກົມກຽວ ​ຍ້ອນແລ່​ນນຳ​ວຽກ ​ແລະ ​ເວ​ລາ​ຫຼາຍ​ກວ່າ.

ໃນ 2 ປີ ຕໍ່ໜ້າບັນດາກົດໝາຍໃນແຜນການສ້າງ ແລະ ປັບປຸງກົດໝາຍ 5 ປີ ຂອງສະພາແຫ່ງຊາດ ທີ່ຍັງເຫຼືອຈະຕ້ອງສືບຕໍ່ໃຫ້ສຳເລັດນັ້ນ ມີຈໍານວນ 43 ສະບັບ, ສ້າງໃໝ່ 25 ສະບັບ, ປັບປຸງ 18.

ສໍາລັບແຜນການສ້າງ ແລະ ປັບປຸງກົດໝາຍ ປະຈໍາປີ 2019 ໃນກອງປະຊຸມສະໄໝສາມັນ ເທື່ອທີ 7 ແລະ 8 ຂອງສະພາແຫ່ງຊາດ ຊຸດທີ VIII ທີ່ຈະມາເຖິງນີ້ ສະພາແຫ່ງຊາດ ໄດ້ປະສານສົມທົບກັບພາກສ່ວນທີ່ກ່ຽວຂ້ອງ ກໍານົດແຜນການສ້າງ ແລະ ປັບປຸງກົດໝາຍ ຈໍານວນ 22 ສະບັບ, ສ້າງໃໝ່ 8 ສະບັບ, ປັບປຸງ 14 ສະບັບ ຊຶ່ງແຍກອອກເປັນແຕ່ລະເທື່ອ ດັ່ງນີ້: ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII  ມີ 14 ສະບັບ, ໃນນີ້ ກົດໝາຍ ສ້າງໃໝ່ ມີ 5 ສະບັບ ແລະ ກົດໝາຍ ປັບປຸງ ມີ 9 ສະບັບ ຊຶ່ງກວມມີ ຂົງເຂດປົກຄອງ ແລະ ຍຸຕິທໍາ, ຂົງເຂດເສດຖະ ກິດ, ຂົງເຂດວັດທະນະທໍາ-ສັງຄົມ ແລະ ຂົງເຂດການຕ່າງປະເທດ;  ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII  ມີ 8 ສະບັບ, ໃນນີ້ ກົດໝາຍ ສ້າງໃໝ່ ມີ 3 ສະບັບ, ກົດໝາຍປັບປຸງ ມີ 5 ສະບັບ ຊຶ່ງກວມມີຂົງເຂດການປົກຄອງ ແລະ ຍຸຕິທໍາ, ຂົງເຂດເສດຖະ ກິດ ແລະ ວັດທະນະທໍາ-ສັງຄົມ.