ສຳເລັດການສຳມະນາສ້າງຄວາມເຂັ້ມແຂງທາງດ້ານກົດໝາຍໃຫ້ກຳລັງປະກອບອາວຸດ 3 ແຂວງພາກເໜືອ

02/01/2019 00:00 -

(ສພຊ) ເພື່ອຍົກສູງຄວາມຮູ້, ຄວາມເຂົ້າໃຈທີ່ຈໍາເປັນທາງດ້ານກົດໝາຍໃຫ້ແກ່ນາຍ ແລະ ພົນທະຫານ, ນາຍ ​ແລະ ພົນຕຳຫລວດ ໃນການຈັດຕັ້ງປະຕິບັດໜ້າທີ່ການຈັດຕັ້ງປະຕິບັດໜ້າທີ່ການເມືອງຂອງຕົນໃຫ້ຖືກຕ້ອງ, ໂປ່ງໃສ ແລະ ມີຄວາມຍຸຕິທຳ; ພາຍຫລັງໄດ້ດຳເນີນມາເປັນເວລາ 3 ວັນ ລະຫວ່າງວັນທີ 26-28 ທັນວາ 2018 ທີ່ສະໂມສອນພະແນກກະສິກຳ ແລະ ປ່າໄມ້ແຂວງໄຊຍະບູລີ, ກອງປະຊຸມສຳມະນາສ້າງຄວາມເຂັ້ມແຂງທາງດ້ານກົດໝາຍໃຫ້ກຳລັງປະກອບອາວຸດຂອງ 3 ແຂວງພາກເໜືອ ຄື: ອຸດົມໄຊ, ຫລວງພະບາງ ແລະ ໄຊຍະບູລີ ໄດ້ອັດລົງດ້ວຍຜົນສຳເລັດອັນຈົບງາມ ພາຍໃຕ້ການເປັນປະທານຂອງທ່ານ ຄຳສຸກ ວີອິນທະວົງ ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ສະພາແຫ່ງຊາດ ເຂົ້າຮ່ວມມີທ່ານ ພົງສະຫວັນ ສິດທະວົງ ເຈົ້າແຂວງໆໄຊຍະບູລີ; ມີຄະນະກອງບັນຊາການທະຫານແຂວງ, ຄະນະກອງບັນຊາການ ປກສ ແຂວງຂອງ 3 ແຂວງ, ກອງພົນທະຫານຮາບທີ 2, ກອງພົນທະຫານຮາບທີ 3, ຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນແຂວງໄຊຍະບູລີ ພ້ອມດ້ວຍແຂກຖືກເຊີນ.

ໃນທີ່ປະຊຸມ, ຜູ້ເຂົ້າຮ່ວມໄດ້ຮັບຟັງການສະເໜີກ່ຽວກັບຄວາມແຕກຕ່າງລະຫວ່າງສາຍພົວພັນທາງສັງຄົມທີ່ຖືກດັດປັບດ້ວຍກົດໝາຍແພ່ງ, ອາຍາ ແລະ ບໍລິຫານ; ຫລັກການດຳເນີນຄະດີອາຍາ ແລະ ຄະດີແພ່ງ; ຄວາມເຂົ້າໃຈກ່ຽວກັບຄຳຮ້ອງຂໍຄວາມເປັນທຳ; ເອກະສານຕິດຕາມ-ກວດກາຂອງສະພາແຫ່ງຊາດ ແລະ ກົນໄກປະສານງານຂອງກຳມາທິການ ປກຊ-ປກສ ຈາກບັນດານັກວິທະຍາກອນຜູ້ຊົງຄຸນວຸດທິ; ພ້ອມນັ້ນ, ຍັງໄດ້ມີການສົນທະນາແລກປ່ຽນປະກອບຄຳຄິດຄຳເຫັນ ແລະ ຕອບຂໍ້ຂ້ອງໃຈກ່ຽວກັບການປະຕິບັດກົດໝາຍຢ່າງກົງໄປກົງມາ.

ທ່ານ ຄຳສຸກ ວີອິນທະວົງ ໄດ້ມີຄຳເຫັນກ່າວປິດກອງປະຊຸມ ວ່າ: ກອງປະຊຸມສຳມະນາທາງດ້ານກົດ   ໝາຍໃຫ້ແກ່ພະນັກງານນຳພາ-ບັນຊາກຳລັງປະກອບອາວຸດ 3 ແຂວງພາກເໜືອຂອງກຳມາທິການ ປກຊ-ປກສ ໄດ້ດຳເນີນມາເປັນເວລາ 3 ວັນ ກອງປະຊຸມໄດ້ສຳເລັດຜົນຕາມຈຸດປະສົງ ແລະ ລະດັບຄາດໝາຍທີ່ວາງໄວ້; ຜົນສຳເລັດກອງປະຊຸມຄັ້ງນີ້ ແມ່ນໝາກຜົນລວມຍອດແຫ່ງສະຕີປັນຍາໃນການຄົ້ນຄວ້າປະກອບຄຳຄິດຄຳເຫັນຢ່າງກວ້າງຂວາງເລິກເຊິ່ງກົງໄປກົງມາໃຫ້ເຂົ້າສູ່ຕົວຈິງ ແລະ ມີຄວາມຮັບຜິດຊອບສູງຂອງບັນດາຜູ້ແທນກອງປະຊຸມບົນພື້ນຖານການເສີມຂະຫຍາຍປະຊາທິປະໄຕຢູ່ໃນກອງປະຊຸມດ້ວຍບັນຍາກາດຟົດຟື້ນ.

          ເພື່ອຜັນຂະຫຍາຍຜົນສຳເລັດຂອງກອງປະຊຸມເຂົ້າສູ່ລວງເລິກ ແລະ ໃນການປະຕິບັດໜ້າທີ່ວຽກງານຕົວຈິງນັ້ນທ່ານໄດ້ຮຽກຮ້ອງໃຫ້ບັນດາ​ຜູ້​ເຂົ້າຮ່ວມ ຈົ່ງນຳເອົາເນື້ອໃນຈິດໃຈກອງປະຊຸມໄປຜັນຂະຫຍາຍໃຫ້ເປັນຮູບປະທຳ, ເປັນຕົ້ນການໂຄສະນາເຜີຍແຜ່ລັດຖະທຳມະນູນ, ກົດໝາຍ ແລະ ການຈັດຕັ້ງປະຕິບັດກົດໝາຍໃຫ້ນາຍ ແລະ ພົນທະຫານ-ຕຳຫລວດ ທີ່ຂຶ້ນກັບຄວາມຮັບຜິດຊອບຂອງຕົນເຮັດໃຫ້ເຂົາເຈົ້າຮັບຮູ້ ແລະເຂົ້າໃຈນິຕິກຳຕ່າງໆທີ່ກ່ຽວພັນກັບການປະຕິບັດໜ້າທີ່ວຽກງານຂອງຕົນໃຫ້ຖືກຕ້ອງ, ສອດຄ່ອງກັບລະບຽບກົດໝາຍ ແລະ ໃຫ້ກຳແໜ້ນກົດໝາຍ, ມີຈັນຍາບັນ, ຈັນຍາທຳ, ເປີດເຜີຍຖືກຕ້ອງຕາມກົດໝາຍ ທັງເປັນການປະກອບສ່ວນໃນການເສີມຂະຫຍາຍແນວທາງນະໂຍບາຍຂອງພັກ ເພື່ອສ້າງລັດແຫ່ງກົດໝາຍໃຫ້ໜັກແໜ້ນເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງສີວິໄລ ແລະ ຍຸຕິທຳ.

(ນາງ ປາກາລັກ ພົມມີໄຊ)