ກຳມາທິການຍຸຕິທຳ ຍົກລະດັບຂີດຄວາມສາມາດກ່ຽວກັບວຽກງານຕິດຕາມກວດກາ

04/01/2019 00:00 -

(ສພຊ) ລະຫວ່າງວັນທີ 24-26 ທັນວາ 2018 ທີ່ເມືອງວຽງຄໍາ ແຂວງວຽງຈັນ, ກໍາມາ​ທິການ​ຍຸຕິ​ທຳ​ສະພາ​ແຫ່ງ​ຊາດ (ສພຊ) ໄດ້ຈັດກອງປະຊຸມສຳມະນາຍົກລະດັບຂີດຄວາມສາມາດກ່ຽວກັບວຽກງານຕິດຕາມກວດກາ ແລະ ແກ້ໄຂຄຳຮ້ອງຂໍຄວາມເປັນທຳ ໃຫ້ແກ່ສະມາຊິກສະພາແຫ່ງຊາດ ທີ່ເປັນກຳມະການຂອງກຳມາທິການຍຸຕິທຳ ແລະ ພະນັກງານ-ລັດຖະກອນ ຂອງກຳມາທິການຍຸຕິທຳ ໂດຍການເປັນປະທານຂອງທ່ານ ນາງ ບົວຄຳ ທິບພະວົງ ປະທານກຳມາທິການຍຸຕິທຳ; ເຂົ້າຮ່ວມມີ​ບັນດາ​ປະທານ-ຮອງປະທານສະພາປະຊາຊົນຂັ້ນແຂວງ (ສພຂ), ຄະນະກົມກວດກາຄະດີແພ່ງ ແລະ ຄະດີອາຍາ, ກົມກວດກາອົງການໄອຍະການ, ກົມຈັດຕັ້ງປະຕິບັດຄຳຕັດສິນຂອງສານ, ກົມກວດກາລັດ ແລະ ຕ້ານການສໍ້ລາດບັງຫລວງ, ກົມຄົ້ນຄວ້າຄຳຮ້ອງ-ຄຳສະເໜີ, ຕາງໜ້າອົງການກວດກາລັດຖະບານ ແລະ ພະນັກງານ-ວິຊາການທີ່ກ່ຽວຂ້ອງ​ເຂົ້າ​ຮ່ວມທັງໝົດ 130 ກວ່າທ່ານ.

ທັງນີ້, ກໍເພື່ອແນໃສ່ເຮັດໃຫ້ສະມາຊິກສະພາແຫ່ງຊາດ ທີ່ເປັນກຳມາການຂອງກຳມະທິການຍຸຕິທຳ ແລະ ພະນັກງານທີ່ຮັບຜິດຊອບວຽກງານແກ້ໄຂຄຳຮ້ອງຟ້ອງ, ວຽກງານຕິດຕາມກວດກາ ແລະ ແກ້ໄຂຄຳຮ້ອງຂໍຄວາມເປັນທຳ ​ໃຫ້ໄດ້ຮັບ​ການຍົກລະດັບຄວາມຮູ້ທາງດ້ານກົດໝາຍ ແລະ ມີຄວາມເຂົ້າໃຈເຖິງພາລະບົດບາດ ໃນການຕິດຕາມກວດກາການແກ້ໄຂຄຳຮ້ອງຟ້ອງຂອງອົງການຕຸລາການ ແລະ ການແກ້ໄຂຄຳສະເໜີຂອງອົງການບໍລິຫານ, ຮັບປະກັນການຄົ້ນຄວ້າພິຈາລະນາແກ້ໄຂຄຳຮ້ອງຂໍຄວາມເປັນທຳໃຫ້ຖືກຕ້ອງຕາມຫລັກການ ແລະ ມີແບບແຜນວິທີເຮັດທີ່ສອດຄ່ອງ ເພື່ອເຮັດໃຫ້ການແກ້ໄຂຄຳຮ້ອງທຸກຂອງອົງການຕ່າງໆມີປະສິດທິພາບ, ຖືກຕ້ອງຕາມກົດໝາຍ ແລະ ຍຸຕິທຳ.

ທ່ານປະທານກຳມາທິການຍຸຕິທຳ ໄດ້ກ່າວວ່າ: ບັນດາເນື້ອໃນທີ່ນຳມາຄົ້ນຄວ້າ ແລະ ແລກປ່ຽນບົດຮຽນແມ່ນມີຄວາມສຳຄັນເພື່ອເປັນຂໍ້ມູນຮັບໃຊ້ເຂົ້າໃນວຽກງານພາຍໃນກຳມາທິການຍຸຕິທຳ ແລະ ກໍເປັນກົນໄກການປະສານສົມທົບກັບພາກສ່ວນກ່ຽວຂ້ອງພາຍນອກ ໃນການປະຕິບັດພາລະບົດບາດຂອງກຳມາທິການຍຸຕິທຳ ເວົ້າລວມ, ເວົ້າສະເພາະແມ່ນສະມາຊິກ​ສະພາ​ແຫ່ງ​ຊາດ ທີ່ເປັນກຳມະການຂອງກຳມາທິການຍຸຕິທຳທີ່ປະຈຳຢູ່ທ້ອງຖິ່ນ; ສະນັ້ນ, ເພື່ອໃຫ້ເຮັດກອງປະຊຸມມີປະສິດທິຜົນ ແລະ ບັນດາເອກະສານທີ່ໄດ້ນຳມາສະເໜີເທື່ອນີ້ ໃຫ້ມີເນື້ອໃນຄົບຖ້ວນ ແລະ ເລິກເຊິ່ງແທດເໝາະກັບສະພາບຕົວຈິງ ມີຄວາມເອກະພາບກັນດ້ານກົນໄກ, ເນື້ອໃນ ແລະ ແບບແຜນວິທີການເຮັດວຽກພາຍໃນກຳມາທິການຍຸຕິທຳສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ພາກສ່ວນກ່ຽວຂ້ອງ ຈົ່ງ​ພ້ອມ​ກັນປະກອບ​ຄຳ​ຄິດ​ຄຳ​ເຫັນ​ໃສ່​ເນື້ອ​ໃນ​ຕ່າງໆຢ່າງ​ກົງ​ໄປ​ກົງ​ມາ ຊອກ​ໃຫ້​ເຫັນ​ດ້ານ​ດີ, ດ້ານ​ອ່ອນ, ຂໍ້ຄົງຄ້າງ, ສາ​ເຫດ ​ແລະ ວິທີ​ແກ້​ໄຂ​ໃນຕໍ່ໜ້າ; ທ່ານ​ຍັງ​ໄດ້​ກ່າວ​ຕື່ມ​ອີກ​ວ່າກອງ​ປະຊຸມຄັ້ງ​ນີ້ ຈະ​ຊ່ວຍ​ໃຫ້​ບັນດາ​ທ່ານ​ສະມາຊິກ​ສະພາ​ແຫ່ງ​ຊາດ ທີ່​ສັງກັດ​ຢູ່ກຳ​ມາ​ທິການ​ຍຸຕິ​ທຳ ​ແລະ ບັນດາ​ທ່ານ​ຈາກ​ພາກສ່ວນ​ກ່ຽວຂ້ອງ ຈະມີ​ຄວາມ​ເຂົ້າ​ໃຈ ​ແລະ ​ເປັນ​ເອກະ​ພາບ​ຕໍ່ວຽກງານ​ຍຸຕິ​ທຳ ​ໂດຍ​ສະ​ເພາະ​ການ​ແກ້​ໄຂ​ຄຳ​ຮ້ອງ​ຂໍ​ຄວາມ​ເປັນ​ທຳ ​ແລະ ວຽກງານ​ຕິດຕາ​ມກວດກາ ​ໃຫ້​ຖືກຕ້ອງ ​ແລະ ສອດຄ່ອງ​ກັບ​ພາລະ​ບົດບາດ, ສິດ , ໜ້າທີ່ ​ແລະ ຄວາມ​ຮັບຜິດຊອບ​ຂອງ​ກຳມາ​ທິການ​ຍຸຕິ​ທຳ ກໍ​ຄື​ພາລະ​ບົດບາດ, ສິດ ​ແລະ ໜ້າທີ່ ຂອງ​ພາກສ່ວນ​ກ່ຽວຂ້ອງ ບົນ​ພື້ນຖານ​ທີ່​ກົດໝາຍ​ໄດ້​ກຳນົດ​ໄວ້.

ກອງປະຊຸມສຳມະນາຄັ້ງນີ້, ​ໄດ້ຮັບ​ຟັງ​ການສະ​ເໜີຮ່າງ​ມະຕິ​ຂອງ​ຄະນະ​ປະຈຳ​ສະພາ​ແຫ່ງ​ຊາດ ວ່າ​ດ້ວຍ​ການ​ພິຈາລະນາ​ຄຳ​ຮ້ອງ​ຂໍ​ຄວາມ​ເປັນ​ທຳ ສະບັບ​ປ່ຽນ​ແທນມະຕິ 171, ​ແລກປ່ຽນບົດຮຽນກ່ຽວກັບ​ການ​ເຄື່ອນ​ໄຫວ​ຕິດຕາມ​ກວດກາ​ຂອງ​ກຳ​ມາ​ທິການ​ທີ່​ປະຈຳ​ຢູ່​ທ້ອງ​ຖິ່ນ ພ້ອມ​ທັງ​ກົນ​ໄກ​ລາຍ​ງານ​ສ່ອງ​ແສງ​ແຕ່ລະ​ເດືອ​ນ, ຮ່າງບົດ​ສະ​ເໜີ ແລກປ່ຽນ​ແກ້​ໄຂ​ຄຳ​ຮ້ອງ​ຂໍ​ຄວາມ​ເປັນ​ທຳ​ຂອງ​ສະພາ​ແຫ່ງ​ຊາດ ​ແລະ ສະພາ​ປະຊາຊົນ​ຂັ້ນ​ແຂວງ ​ແລະ ຮ່າງ​ບົດ​ສະ​ເໜີ​ແລກປ່ຽນບົດ​ຮຽນກ່ຽວກັບ​ສະພາ​ແຫ່ງ​ຊາດ ​ແລະ ສະພາ​ປະຊາຊົນ​ຂັ້ນ​ແຂວງ; ພ້ອມ​ດຽວກັນ​ນັ້ນ, ກອງ​ປະຊຸມ​ຍັງ​ໄດ້​ສະ​ເໜີຮ່າງ​ແຈ້ງ​ການຈັດ​ຕັ້ງ​ປະຕິບັດ​ບາງ​ມາດຕາ​ຂອງ​ກົດໝາຍວ່າ​ດ້ວຍ​ການ​ແກ້​ໄຂ​ຄຳ​ຮ້ອງທຸກ ​ແລະ ຮ່າງ​ຂໍ້​ຕົກລົງ​ວ່າ​ດ້ວຍ​ການ​ຮັບ ​ແລະ ພິຈາ​ລະ​ນາ​ຄຳ​ຮ້ອງ​ຂໍ​ຄວາມ​ເປັນ​ທຳ​ຂອງ​ກຳມາ​ທິການ​ຍຸຕິ​ທຳ ສະພາ​ແຫ່ງ​ຊາດ. ກອງ​ປະຊຸມຄັ້ງ​ນີ້, ​ບັນດາ​ຜູ້​ເຂົ້າ​ຮ່ວມຍັງ​ໄດ້​​ປະກອບ​ຄຳ​ຄິດ​ຄຳ​ເຫັນ​ແລກປ່ຽນບົດຮຽນ​ເຊິ່ງກັນ ​ແລະ ກັນ ຢ່າງ​ກົງ​ໄປ​ກົງ​ມາ.

 

(ນາງ ກຸກກິກ ບຸດດາໄຊ)