ກໍາມາທິການກົດໝາຍຍົກລະດັບດ້ານວິຊາສະເພາະໃຫ້ພະນັກງານຂອງຕົນ

14/01/2019 00:00 -

(ສພຊ) ໃນ​ວັນ​ທີ 26-29 ທັນວາ 2018 ກໍາມາ​ທິການ​ກົດໝາຍ ໄດ້​ຈັດ​ກອງ​ປະຊຸມ​ສໍາ​ມະ​ນາຍົກ​ລະດັບ​ຄວາມ​ສາມາດ​ໃຫ້ພະນັກງານ-​ລັດຖະກອນ ກໍາມາ​ທິການ​ກົດໝາຍ ທີ່​ເມືອງ​ແກ້ວ​ອຸດົມ ແຂວງ​ວຽງຈັນ ພາຍ​ໃຕ້​ການ​ເປັນ​ປະທານ​ຂອງ​ທ່ານ ສາຍທອງ ແກ້ວ​ດວງ​ດີ ກໍາມະການ​ຄະນະ​ປະ​ຈໍາ​ສະພາ​ແຫ່ງ​ຊາດ, ປະທານ​ກໍາມາ​ທິການ​ກົດໝາຍ ​ໂດຍ​ການ​ເຂົ້າ​ຮ່ວມ ​ແລະ ບັນ​ລະ​ຍາຍ​ເອກະສານຂອງ​ບັນດາ​ທ່ານຮອງ​ປະທານ​ກໍາມາ​ທິການ​ກົດໝາຍ, ຫົວໜ້າ-ຮອງ​ຫົວໜ້າກົມ, ຫົວໜ້າ-ຮອງ​ຫົວໜ້າພະ​ແນ​ກ ​ແລະ ລັດຖະກອນ-​ວິຊາ​ການ ຈາກ​ກໍາມາ​ທິການ​ກົດໝາຍ.

​          ທັງ​ນີ້, ເພື່ອ​ເປັນ​ການ​ຍົກ​ລະດັບ​ຄວາມ​ຮູ້ ​ແລະ ຄວາມ​ສາມາດ ກ່ຽວກັບ​ເຕັກນິກ​ໃນ​ການ​ສ້າງ​ຮ່າງ​ກົດໝາຍ; ຂັ້ນ​ຕອນ ​ແລະ ວິທີ​ການ​ຄົ້ນ​ຄວ້າ​ການ​ຕີ​ຄວາມໝາຍ ​ແລະ ອະທິບາຍ​ກົດໝາຍ; ວິທີ​ການ​ກະກຽມບົດ​ບັນ​ລະ​ຍາຍ ​ແລະ ການ​ເປັນ​ເສນາ​ທິການ​ທາງ​ດ້ານ​ເນື້ອ​ໃນ​ໃຫ້ພະນັກງານ-​ລັດຖະກອນ ​​ທີ່​ເປັນ​ເສນາ​ທິການ​​ໃຫ້​ກໍາມາ​ທິການ​ກົດໝາຍ ​ມີ​ຄວາມ​ເຂົ້າ​ໃຈ ​ແລະ ສາມາດ​ຈັດ​ຕັ້ງ​ປະຕິບັດໜ້າທີ່​ວຽກງານ​ຕົວ​ຈິງ​ໃຫ້​ມີ​ຄຸນ​ນະພາ​ບ ​ເຊິ່ງຜູ້​ເຂົ້າ​ຮ່ວມ​​ໃນກອງ​ປະຊຸມ​ຄັ້ງ​ນີ້ ​ແມ່ນໄດ້​ຮັບ​ຟັງ​ການ​ບັນ​ລະ​ຍາຍບາງ​ບົດຮຽນທີ່​ຕິດ​ພັນ​ກັບ​ການ​ເຄື່ອນ​ໄຫວ​ວຽກງານ​ຕົວ​ຈິງ ຈາກ​ຄະນະ​ນໍາກໍາມາ​ທິການ​ກົດໝາຍ ​ແລະ ຄະນະ​ເລຂາທິການ​ສະພາ​ແຫ່ງຊາດ​.