ຮຽບຮຽງຮ່າງກົດໝາຍວ່າດ້ວຍ ລາຍເຊັນເອເລັກໂຕຣນິກ

14/01/2019 00:00 -

          (ສພຊ) ​ເພື່ອ​​ເຮັດ​ໃຫ້​ວຽກງານ​ລາຍ​ເຊັນ​ເອ​ເລັກ​ໂຕຣນິກມີ​ຄວາມ​ຖືກຕ້ອງ, ​ໄດ້​ມາດຕະຖານ, ທັນ​ສະ​ໄໝ, ປອດ​ໄພ, ວ່ອງ​ໄວ ​ແລະ ມີ​ຄວາມ​ເປັນ​ລະບຽບຮຽບຮ້ອຍ​ໃນ​ສັງຄົມ ​ເຊິ່ງກອງ​ປະຊຸມ​ສະ​ໄໝສາມັນ​ເທື່ອ​ທີ 6 ຂອງ​ສະພາ​ແຫ່ງ​ຊາດຊຸດ​ທີ VIII ​ໄດ້​ພິຈາລະນາ ​ແລະ ຮັບຮອງ​ເອົາ​ຮ່າງ​ກົດໝາຍວ່າ​ດ້ວຍ ລາຍ​ເຊັນ​ເອ​ເລັກ​ໂຕຣນິກ ​ເພື່ອ​ຮັບປະກັນ​ໃຫ້​ກົດໝາຍດັ່ງກ່າວມີ​ເນື້ອ​ໃນຄົບ​ຖ້ວນ, ຊັດ​ເຈນ ແລະ ສາມາດ​ຈັດ​ຕັ້ງ​ປະຕິ ບັດ​ໄດ້​ນັ້ນ ກໍາມາ​ທິການ​ກົດໝາຍ, ກໍາມາ​ທິການ​ເສດຖະກິດ, ​ເຕັກ​ໂນ​ໂລ​ຊີ ​ແລະ ສິ່ງ​ແວດ​ລ້ອມ ຮ່ວມ​ກັບ​ກະຊວງ​ໄປສະນີ​, ໂທລະ​ຄົມມະນາຄົມ ​ແລະ ການ​ສື່ສານ ​ໄດ້ຈັດ​ກອງ​ປະຊຸມ​ຮຽບຮຽງຮ່າງກົດໝາຍວ່າ​ດ້ວຍ ລາຍ​ເຊັນ​ເອ​ເລັກ​ໂຕ​ຣນິກ ໃນ​ວັນ​ທີ 7-8 ມັງກອນ 2019  ​ ທີ່​ເມືອງ​ແກ້ວ​ອຸດົມ, ແຂວງ​ວຽງຈັນ ​ໂດຍ​ການ​ເປັນປະທານຮ່ວມ​ຂອງ​ ທ່ານ ສາຍທອງ ​ແກ້ວ​ດວງ​ດີ ປະທານ​ກໍາມາທິ​ການ​ກົດໝາຍ; ທ່ານ ບຸນ​ປອນ ສີ​ສຸລາ​ດ ປະທານ​ກໍາມາ​ທິການ​ເສດຖະກິດ, ​ເຕັກ​ໂນ​ໂລ​ຊີ ​ແລະ ສິ່ງ​ແວດ​ລ້ອມ ແລະ ທ່ານ ທອງ​ໃສ ຊານ​ໄຊ​ຍະ ຮອງ​ລັດຖະມົນຕີ​ກະຊວງ​ໄປສະນີ​, ໂທລະ​ຄົມມະນາຄົມ ​ແລະ ການ​ສື່ສານ. ​ເຂົ້າ​ຮ່ວມ​ມີ​ທ່ານຮອງ​ປະທານ​ກໍາມາ​ທິການ​ກົດໝາຍ, ຜູ້ຕາງໜ້າຈາກ​ພາກ​ສ່ວນ​ທີ່​ກ່ຽວ ຂ້ອງ, ພະນັກງານ​ບໍານານ, ບັນດາ​ທ່ານຫົວໜ້າກົມ, ຮອງ​ຫົວໜ້າກົມ, ລັດຖະກອນ​ທີ່​ກ່ຽວຂ້ອງຈາກ​ສະພາ​ແຫ່ງ​ຊາດ ​ແລະ ກະຊວງ​​ໄປສະນີ, ​ໂທລະ​ຄົມມະນາຄົມ ​ແລະ ການ​ສື່ສານອີກຈໍານວນໜຶ່ງ.

          ກອງປະຊຸມຄັ້ງນີ້, ໄດ້ນໍາເອົາຄໍາຄິດຄໍາເຫັນຂອງບັນດາທ່ານສະມາຊິກສະພາແຫ່ງຊາດ ທີ່​ໄດ້​ປະກອບຄໍາ​ເຫັນຢູ່​ໃນ​ກອງ​ປະຊຸມ​ສະ​ໄໝສາມັນ​ເທື່ອ​ທີ 6 ຂອງ​ສະພາ​ແຫ່ງ​ຊາດ​ຊຸດ​ທີ VIII ຕໍ່​ຮ່າງ​ກົດໝາຍສະບັບ​ດັ່ງກ່າວ ມາ​ຄົ້ນ​ຄ້ວາ ແລະ ​ພິຈາລະນາ, ປັບປຸງ ແລະ​ ຮຽບຮຽງ ​ເຂົ້າ​ໃສ່​ເນື້ອ​ໃນ​ຂອງ​ຮ່າງ​ກົດໝາຍ ​ແລະ ພາຍຫລັງສໍາ​ເລັດ​ການ​ຮຽບຮຽງແລ້ວ ​ຈະ​ໄດ້ລາຍງານຕໍ່ກອງ​ປະຊຸມຄະນະປະຈໍາສະພາແຫ່ງຊາດ ​ເພື່ອພິຈາລະນາກ່ອນຈະນໍາສະເໜີໃຫ້ປະທານສະພາແຫ່ງຊາດລົງລາຍ​ເຊັນ ​ແລ້ວສົ່ງໃຫ້ປະທານປະເທດພິຈາລະ ນາອອກລັດຖະດໍາລັດປະກາດໃຊ້.

(ກົມໂຄສະນາ ແລະ ຕີຄວາມໝາຍກົດໝາຍ)