ຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດ ລັດຖະທຳມະນູນ, ກົດໝາຍ, ນະໂຍບາຍ, ແຜນຍຸດທະສາດ ແລະ ການອອກ ນິຕິກຳໃຕ້ກົດໝາຍ ທີ່ພົວພັນເຖິງສິດ ແລະ ຜົນປະໂຫຍດອັນຊອບທຳຂອງແມ່ຍິງ ແລະ ເດັກ

14/01/2019 00:00 -

(ສພຊ) ລະຫວ່າງວັນທີ 22-26 ທັນວາ 2018 ທີ່ຜ່ານມາ, ທ່ານ ນາງ ທະວີໄສ ພະສະຖານ, ຮອງປະທານຄະນະສະມາຊິກສະພາແຫ່ງຊາດເພດຍິງ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດລັດຖະທຳມະນູນ, ກົດໝາຍ, ນະໂຍບາຍ, ແຜນຍຸດທະສາດ ກ່ຽວກັບການເຊື່ອມທັດສະນະບົດບາດຍິງ-ຊາຍ, ສິດສະເໝີພາບຍິງ-ຊາຍ, ການສ້າງຄວາມເຂັ້ມແຂງໃຫ້ແກ່ແມ່ຍິງ, ການສົ່ງເສີມຄວາມກ້າວໜ້າຂອງແມ່ຍິງ, ວຽກງານປົກປ້ອງພັດທະນາແມ່ ແລະ ເດັກ ແລະ ຊຸກຍູ້ການປະຕິບັດສັນຍາສາກົນ ແລະ ສົນທິສັນຍາກ່ຽວກັບແມ່ຍິງ ແລະ ການອອກນິຕິກຳໃຕ້ກົດໝາຍ ທີ່ພົວພັນເຖິງສິດ ແລະ ຜົນປະໂຫຍດອັນຊອບທຳຂອງແມ່ຍິງ ແລະ ເດັກ ຢູ່ແຂວງໄຊຍະບູລີ ​ເຊິ່ງ​ໄດ້​ປະສານ​ສົມທົບ​ກັບ​ສະພາ​ປະຊາຊົນ​ແຂວງ​ໄຊ​ຍະ​ບູລີ ​ໂດຍ​ມີທ່ານ ນາງ ອິດມະນີ ຈັນທະຄູນ ຮອງປະທານສະພາປະຊາຊົນແຂວງ, ກໍາມະການຄະນະສະມາຊິກສະພາແຫ່ງຊາດເພດຍິງ ປະຈໍາເຂດເລືອກຕັ້ງທີ 7 ແຂວງ ໄຊຍະບູລີ ແລະ ພະນັກງານ-ວິຊາການ ຈາກກົມຄະນະສະມາຊິກສະພາແຫ່ງຊາດເພດຍິງ ແລະ ພະນັກງານ-ວິຊາການຊ່ວຍວຽກໜວ່ຍສະມາຊິກສະພາປະຊາຊົນເພດຍິງ ປະຈໍາເຂດເລືອກຕັ້ງເຂົ້າຮ່ວມ.

ຈຸດປະສົງໃນການຕິດຕາມກວດກາໃນຄັ້ງນີ້, ເພື່ອລົງ​ເກັບ​ກໍາ​ຂໍ້​ມູນ ​ແລະ ​ເຜີຍ​ແຜ່ພາລະ​ບົດບາດ, ສິດ ​ແລະ​ ໜ້າ​ທີ່ຂອງຄະນະສະມາຊິກສະພາແຫ່ງຊາດເພດຍິງ, ​​ຊຸກຍູ້​ການຈັດ​ຕັ້ງ​ປະຕິບັດ​ລັດຖະທໍາ​ມະນູນ, ກົດໝາຍ, ນິຕິ​ກໍາ​ລຸ່ມ​ກົດໝາຍທີ່​ກ່ຽວພັນ​ກັບ​ແມ່ຍິງ ​ແລະ ​ເດັກ, ການຈັດຕັ້ງປະຕິບັດສົນທິສັນຍາວ່າດ້ວຍການລຶບລ້າງທຸກຮູບການຈຳແນກຕໍ່ແມ່ຍິງ ແລະ ເປົ້າໝາຍການພັດທະນາທີ່ຍືນຍົງ ທີ 5 ການບັນລຸຄວາມສະເໝີພາບຍິງ-ຊາຍ ແລະ ການສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ເດັກຍິງ, ວຽກງານການສົ່ງເສີມຄວາມສະເໝີພາບຍິງ-ຊາຍ ແຜນພັດທະນາແມ່ຍິງ, ການຊອກວຽກເຮັດງານທຳໃຫ້ແກ່ໄວໜຸ່ມຍິງ, ຊຸກຍູ້ໃຫ້ພາກສ່ວນກ່ຽວຂ້ອງສົ່ງເສີມເອື້ອຍນ້ອງແມ່ຍິງບັນຈຸສັບຊ້ອນເຂົ້າໃນຕຳແໜ່ງຕັດສິນບັນຫາໃນທຸກຂັ້ນ, ​ຕິດຕາມກວດກາບັນຫາປະກົດການຫຍໍ້ທໍ້​ ​ເປັນ​ຕົ້ນ​ການ​ຄ້າ​ມະນຸດ​ເພດ​ຍິງ, ເດັກຍິງ, ການ​ແຕ່ງງານ​ທີ່​ບໍ່ຖືກ​ຕ້ອງ​ຕາມ​ກົດໝາຍ ໂດຍສະເພາະຢູ່ລຽບຕາມຊາຍແດນລາວ-ໄທ, ການຄ້າຂາຍຢາເສບຕິດ, ການຈັດຕັ້ງປະຕິບັດໜ້າທີ່ວຽກງານຂອງແຕ່ລະພາກສ່ວນກ່ຽວຂ້ອງຕໍ່ວຽກງານຂອງແມ່ຍິງ ແລະ ເດັກ.

          ໃນໂອກາດນີ້, ຄະນະຍັງໄດ້ເຂົ້າຢ້ຽມຂໍ່ານັບການນໍາຂອງແຂວງ ໂດຍໃຫ້ກຽດຕ້ອນຮັບຂອງທ່ານ ນາງ ບຸນພັກ ອິນທະປັນຍາ, ຄະນະປະຈໍາພັກແຂວງ, ຮອງເຈົ້າແຂວງໆໄຊຍະບູລີ ແລະ ກໍໄດ້ຮັບຊາບບາງຂໍ້ມູນກ່ຽວກັບສະພາບການຕ່າງໆທີ່ກ່ຽວຂ້ອງກັບຜົນປະໂຫຍດອັນຊອບທໍາຂອງແມ່ຍິງ ແລະ ເດັກ ຢູ່ພາຍໃນແຂວງ ແລະ ທ່ານຍັງໄດ້ໃຫ້ທິດຊີ້ນໍາໃຫ້ແກ່ຄະນະນີ້ດ້ວຍ; ຈາກ​ນັ້ນ, ຄະນະກໍໄດ້ເຮັດວຽກຮ່ວມກັບບັນດາພະແນກການທີ່ກ່ຽວຂ້ອງ ເຊິ່ງປະກອບມີ: ສະຫະພັນແມ່ຍິງ, ຄະນະກໍາມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ, ພະແນກແຮງງານ ແລະ ສະຫວັດດີການສັງຄົມ, ພະແນກສຶກສາທິການ ແລະ ກິລາ, ພະແນກສາທາລະນະສຸກ, ກອງບັນຊາການ ປ້ອງກັນຄວາມສະຫງົບ, ສານປະຊາຊົນ, ໄອຍະການປະຊາຊົນ ແລະ ຄະນະຈັດຕັ້ງ.

          ຜ່ານການລາຍງານຂອງບັນດາພະແນກການ ເຫັນວ່າມີຜົນງານທີ່ພົ້ນເດັ່ນໃນຫລາຍດ້ານ ແຕ່ວ່າການສົ່ງເສີມຄວາມສະເໝີພາບຍິງ-ຊາຍ ເຫັນວ່າບາງພະແນກການຍັງບໍ່ທັນໄດ້ມີເພດຍິງບັນຈຸສັບຊ້ອນເຂົ້າເປັນຄະນະພະແນກ ​ແມ່ນ​ຍັງ​ມີໜ້ອຍ​ໃນ​ບາງ​ພະ​ແນ​ກການອ້ອມ​ຂ້າງ​ແຂວງ, ດ້ານແຮງງານເຫັນວ່າປະຊາຊົນຈໍານວນຫລາຍໄປອອກແຮງງານຢູ່ຕ່າງປະເທດທີ່ບໍ່ຖືກຕ້ອງຕາມກົດໝາຍ, ແຮງງານເພດຍິງຕົກເປັນເຫຍື່ອຂອງການຄ້າມະນຸດ, ອັດຕາການປະລະການຮຽນຂອງນັກຮຽນ, ອັດຕາການຕາຍຂອງເດັກເກີດໃໝ່ຍັງສູງ, ນໍ້າໜັກຂອງເດັກບໍ່ໄດ້ມາດຕະຖານ, ຕົວເລກການສັກຢາ, ຢອດຢາຍັງບໍ່ສາມາດບັນລຸໄດ້ ​ແລະ ບັນຫາ​ອື່ນໆອີກ​ຈຳນວນໜຶ່ງ.

          ໃນຕອນທ້າຍ, ຄະນະໄດ້ຊີ້ແຈງບາງບັນຫາຕໍ່ກັບບັນດາຂໍ້ສະເໜີຂອງແຕ່ລະພະແນກການ ແລະ ໄດ້ເຜີຍແຜ່ພາລະບົດບາດຂອງຄະນະສະມາຊິກສະພາແຫ່ງຊາດເພດຍິງ ໃຫ້ຮັບຊາບ ແລະ ສະເໜີໃຫ້ບັນດາພະແນກການທີ່ກ່ຽວຂ້ອງ ນໍໍາເອົາບັນດາກົດໝາຍ, ນະໂຍບາຍ, ນິຕິກໍາໃຕ້ກົດໝາຍທີ່ກ່ຽວພັນກັບວຽກງານຂອງຕົນ ໄປເຜີຍແຜ່ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ; ພ້ອມ​ດຽວກັນນັ້ນ, ຄະນະກໍໄດ້ພົບປະ ແລະ ເຮັດວຽກຮ່ວມກັບການນໍາຂັ້ນເມືອງ; ຈາກ​ນັ້ນ, ຄະນະ​ໄດ້ໄປຢ້ຽມຢາມດ່ານສາກົນພູດູ່ ​ເຊິ່ງເປັນດ່ານຊາຍແດນຮ່ວມລະຫວ່າງລາວ-ໄທ ​ແລະ ສືບຕໍ່ເຄື່ອນໄຫວເຮັດວຽກນໍາບັນດາບ້ານເປົ້າໝາຍ ເພື່ອເກັບກໍາເອົາບັນຫາ ແລະ ຂໍ້ສະເໜີຕ່າງໆຈາກປະຊາຊົນ ເພື່ອມາລາຍງານຕໍ່ຄະນະປະຈໍາ ແລະ ສະເໜີໃຫ້ແຕ່ລະພາກສ່ວນກ່ຽວຂ້ອງ ເພື່ອມີທິດທາງແກ້ໄຂແຕ່ລະບັນຫາ ຢ່າງເໝາະສົມ.