ປະທານຄະນະ ສສຊ ເພດຍິງ ຕິດຕາມກວດກາ ແລະ ຊຸກຍູ້ ຢູ່ແຂວງຄໍາມ່ວນ

18/01/2019 00:00 -

(ສພຊ) ​ໃນ​ລະຫວ່າງ​ວັນ​ທີ 22-26 ທັນວາ 2018 ຜ່ານ​ມາ, ຄະນະ​ສະມາຊິກ​ສະພາ​ແຫ່ງ​ຊາດ​ເພດ​ຍິງ ສະພາ​ແຫ່ງ​ຊາດ ນໍາ​ໂດຍ ທ່ານ ນາງ ທັດ​ສະ​ດາ​ພອນ ​ແສງ​ສຸລິຍາ ປະທານ​ຄະນະ​ສະມາຊິກ​ສະພາ​ແຫ່ງ​ຊາດເພດ​ຍິງ ສະພາ​ແຫ່ງ​ຊາດ, ພ້ອມ​ດ້ວຍຫົວໜ້າກົມ ແລະ ພະນັກງານ​-ວິຊາ​ການ​ກົມ​ຄະນະ​ສະມາຊິກ​ສະພາ​ແຫ່ງ​ຊາດ​ (ສສຊ) ເພດ​ຍິງ ​ໂດຍ​ສົມທົບ​ກັບໜ່ວຍສະມາຊິກ​ສະພາ​ປະຊາຊົນ​ເພດ​ຍິງ​ແຂວງ ​ແລະ​ ພະນັກງານ​ຊ່ວຍ​ວຽກຂອງແຂວງສະພາປະຊາຊົນແຂວງຈຳນວນໜຶ່ງ ​ໄດ້​ເຄື່ອນ​ໄຫວ​ວຽກງານ​ຕິດຕາມກວດກາ ແລະ ຊຸກຍູ້ຢູ່​ 3 ​ເມືອງ​ຄື: ນາ​ກາຍ, ຍົມ​ມະ​ລາດ ​ແລະ​ ມະຫາ​ໄຊ ແຂວງຄຳມ່ວນ.

         ​ທັງ​ນີ້, ​ເພື່ອ​ເປັນ​ການ​ປະຕິບັດ​ພາລະ​ບົດບາດ​ຕິດຕາມ​, ກວດກາ ​ແລະ ​ຊຸກຍູ້​ການຈັດ​ຕັ້ງ​ປະຕິບັດ​ລັດຖະທໍາ​ມະນູນ, ກົດໝາຍ, ນະ​ໂຍບາຍ, ​ແຜນ​ຍຸດ​ທະ​ສາດ ແລະ​ ນິຕິ​ກໍາ​ລຸ່ມ​ກົດໝາຍ ທີ່​ພົວພັນ​ເຖິງ​ສິດ ​ແລະ ​ຜົນ​ປະ​ໂຫຍ​ດອັນ​ຊອບ​ທໍາ​ຂອງ​ແມ່ຍິງ ​ແລະ ​ເດັກ, ການຈັດ​ຕັ້ງ​ປະຕິບັດ​ສົນທິສັນຍາ​ວ່າ​ດ້ວຍ​ການ​ລົບ​ລ້າງ​ທຸກ​ຮູບ​ການ​ຈໍາ​ແນ​ກຕໍ່​ແມ່ຍິງ (ຊີ​ດໍ) ​ແລະ​ ເປົ້າໝາຍກາ​ນພັດທະນາ​ແບບ​ຍືນ​ຍົງ (SDG) ທີ 5 ການ​ບັນລຸ​ຄວາມ​ສະ​ເໝີພາບ​ຍິງ-ຊາຍ ​ແລະ​ ການ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ແມ່ຍິງ ​ແລະ ​ເດັກ.

ໃນການ​ລົງ​ມາ​ເຄື່ອນ​ໄຫວ​ວຽກງານ​ໃນ​ຄັ້ງ​ນີ້, ຄະນະ ໄດ້ຮັບຟັງ​ການ​​ລາຍງານກ່ຽວກັບ​ສະພາບ​ການ​ເຄື່ອນ​ໄຫວ​ວຽກງານ​ຂອງໜ່ວຍສະມາຊິກ​ສະພາ​ປະຊາຊົນ​ເພດ​ຍິງ​ຂອງສະພາປະຊາຊົນ​ແຂວງ ຈາກທ່ານ  ນາງ ວຽງມະນີ ຈັນທະລະ​ສິນ ຮອງ​ປະທານ​ສະພາ​ປະຊາຊົນ​ແຂວງ​ຄໍາ​ມ່ວນ, ກໍາມະການ​ຄະນະສະມາ​ຊິກສະພາ​ແຫ່ງ​ຊາດ​ເພດ​ຍິງ; ພ້ອມ​ດຽວກັນ​ນັ້ນ,   ກໍ​ໄດ້​ເຮັດ​ວຽກຮ່ວມກັບ​ຫ້ອງການ ​ແລະ ​ຂະ​ແໜງການ​ທີ່​ກ່ຽວຂ້ອງອ້ອມ​ຂ້າງ​​ເມືອງ ​ເພື່ອຮັບ​ຟັງ​ການ​ລາຍ​ງານ​ສະພາບ​ການຈັດ​ຕັ້ງ​ປະຕິບັດ​ໃນ​ວຽກງານ​ທີ່​ກ່າວ​ມາ​ຂ້າງ​ເທິງ​ນັ້ນ​.

ຈາກ​ນັ້ນ, ຄະນະ​ຍັງ​ໄດ້​ເດີນທາງ​ໄປ​ພົບ​ປະ​ເຮັດ​ວຽກຮ່ວມ​ກັບ​ອໍານາດ​ການ​ປົກ​ຄອງ, ສະຫະພັນ​ແມ່ຍິງ​ ຂອງ 3 ເມືອງຄື: ​ນາ​ກາຍ, ​ຍົມ​ມະ​ລາດ ​ແລະ ມະຫາ​ໄຊ; ຫລັງ​ຈາກ​ນັ້ນ, ​ໄດ້​ລົງ​ເບິ່ງ​ວຽກງານ​ຕົວ​ຈິງຢູ່​ທີ່​ບ້ານ​   ໜອງປີງ ​ແລະ​ ໂພນ​ສະອາດ ​ເພື່ອ​ພົບ​ປະ​ເອື້ອຍ​ນ້ອງ​ຍິງກຸ່ມ​ຫັດຖະ​ກໍາ​ຕໍ່າຫູກ ​ເປັນ​ຕົ້ນ: ຜ້າ​ປູ​ໂຕະ, ຜ້າພັນ​ຄໍ, ​ແພ​ຕັດ​ເສື້ອ, ສິ້ນ, ຕີນ​ສິ້ນ ​ແລະ​ ອື່ນໆ ທີ່​ຂຶ້ນ​ກັບ​ເມືອງ​ຍົມ​ມະ​ລາດ ​ແລະ ​ເມືອງ​ມະຫາ​ໄຊ ແຂວງຄໍາມ່ວນ.