23/01/2019 00:00 -

(ສພຊ) ຕອນເຊົ້າວັນທີ 18 ມັງກອນ 2019 ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6) ນະຄອນຫລວງວຽງຈັນ ໄດ້ມີກອງປະຊຸມສະຫລຸບການເຄື່ອນໄຫວວຽກງານຂອງສະຖາບັນຄົ້ນຄວ້ານິຕິກຳ ສະພາແຫ່ງຊາດ ປະຈຳປີ 2018 ແລະ ແຜນການເຄື່ອນໄຫວວຽກງານ ປະຈຳປີ 2019 ໂດຍການເປັນປະທານຮ່ວມຂອງທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ ທັງເປັນຜູ້ຊີ້ນຳວຽກງານສະຖາບັນຄົ້ນຄວ້ານິຕິກຳ, ທ່ານ ຄຳເຜີຍ ປານມະໄລທອງ ຫົວໜ້າສະຖາບັນຄົ້ນຄວ້ານິຕິກຳ ແລະ ທ່ານ ຄຳມ່ວນ ຊົມສີຫາປັນຍາ ຮອງຫົວໜ້າສະຖາບັນຄົ້ນຄວ້ານິຕິກຳ ສະພາແຫ່ງຊາດ; ມີຄະນະພະແນກ ແລະ ພະນັກງານ-ລັດຖະກອນພາຍໃນສະຖາບັນດັ່ງກ່າວເຂົ້າຮ່ວມຢ່າງພ້ອມພຽງ.

          ໃນພິທີ, ທ່ານ ຄຳມ່ວນ ຊົມສີຫາປັນຍາ ໄດ້ຂຶ້ນຜ່ານບົດສະຫລຸບການເຄື່ອນໄຫວວຽກງານຂອງສະຖາບັນຄົ້ນຄວ້ານິຕິກຳ ສະພາແຫ່ງຊາດ ປະຈຳປີ 2018 ແລະ ແຜນການເຄື່ອນໄຫວວຽກງານ ປະຈຳປີ 2019 ເຊິ່ງທ່ານໄດ້ຍົກໃຫ້ເຫັນດ້ານດີ ແລະ ຜົນສຳເລັດຫລາຍດ້ານທີ່ສາມາດຍາດມາໄດ້ໃນໄລຍະຜ່ານມາ ເປັນຕົ້ນແມ່ນວຽກງານສຶກສາການເມືອງ-ແນວຄິດ ແລະ ການຈັດຕັ້ງ; ວຽກງານດ້ານວິຊາສະເພາະ: ຫ້ອງການສະຖາບັນຄົ້ນຄວ້ານິຕິກຳ, ສູນເຝິກອົບຮົມ ແລະ ຂໍ້ມູນ-ຂ່າວສານ, ຂໍ້ມູນ-ຂ່າວສານ ແລະ ຫໍສະໝຸດ; ວຽກງານສູນຄົ້ນຄວ້ານິຕິກຳ: ການສ້າງນິຕິກຳ, ການຄົ້ນຄວ້າ ແລະ ສັງລວມກົດໝາຍຂອງຕ່າງປະເທດ, ການລົງເກັບກຳຂໍ້ມູນ, ການຈັດກອງປະຊຸມສຳມະນາ, ການພົວພັນປະສານງານຕ່າງໆ ແລະ ການເຄື່ອນໄຫວວຽກງານການຕ່າງປະເທດ; ຄຽງຄູ່ກັບດ້ານດີ ທ່ານຍັງໄດ້ຍົກໃຫ້ເຫັນບາງດ້ານອ່ອນ ແລະ ຂໍ້ຄົງຂ້າງ, ບາງບົດຮຽນທີ່ສາມາດຖອດຖອນໄດ້ ແລະ ມາດຕະການຈັດຕັ້ງປະຕິບັດ ແລະ ວິທີແກ້ໄຂ ເພື່ອເຮັດໃຫ້ວຽກງນຂອງສະຖາບັນຄົ້ນຄວ້ານິຕິກຳຍົກສູງຄຸນນະພາບໃຫ້ສົມຄູ່ກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່.

          ໂອກາດດັ່ງກ່າວ, ທ່ານ ນາງ ສີໃສ ລືເດດມູນສອນ ໄດ້ໃຫ້ທິດຊີ້ນຳຕໍ່ທີ່ປະຊຸມວ່າ: ໃຫ້ເອົາໃຈໃສ່ໃນການປັບປຸງວຽກງານຕ່າງໆຂອງສະຖາບັນໃຫ້ນັບມື້ດີຂຶ້ນເລື້ອຍໆ ເຊັ່ນ: ຫໍສະໜຸດ, ສູນເຝິກອົບຮົມ ແລະ ອື່ນໆ; ພ້ອມນັ້ນ, ຍັງໄດ້ເນັ້ນໜັກໃຫ້ພະນັກງານ-ລັດຖະກອນພາຍໃນສະຖາບັນຄົ້ນຄວ້ານິຕິກຳ ຕ້ອງເອົາໃຈໃສ່ໃນການຄົ້ນຄວ້າສຶກສາຮ່ຳຮຽນ, ຊອກຫາຊ່ອງທາງໃນການພັດທະນາຕົນເອງໃຫ້ສາມາດເປັນຜູ້ທີ່ມີຄວາມສາມາດໃນການສັງລວມເອກະສານ ແລະ ສາມາດເປັນນັກຄົ້ນຄວ້າໄດ້ໃນອະນາຄົດ.

(ນາງ ປາກາລັກ ພົມມີໄຊ)