ປະທານກຳມາທິການບັນດາເຜົ່າ ສະພາແຫ່ງຊາດ ເຄື່ອນໄຫວຕິດຕາມກວດກາວຽກງານຊົນເຜົ່າ ແລະສາສະໜາ ຢູ່ແຂວງຫົວພັນ

25/01/2019 00:00 -

(ສພຊ)ໃນລະຫວ່າງວັນທີ 6-11 ມັງກອນ 2019 ຜ່ານມາ ທ່ານ ນາງ ບົວພັນ ລີໄກຢາ ປະທານກຳມາທິການບັນດາເຜົ່າ ສະພາແຫ່ງຊາດ ພ້ອມດ້ວຍພະນັກງານຂັ້ນກົມ ແລະວິຊາການຈໍານວນໜຶ່ງຂອງກຳມາທິການດັ່ງກ່າວ ໄດ້ລົງເຄື່ອນໄຫວ ຕິດຕາມ ກວດກາ ກ່ຽວກັບວຽກງານຊົນເຜົ່າ ແລະສາສະໜາຢູ່ແຂວງຫົວພັນ.

          ຈຸດປະສົງໃນການລົງເຄື່ອນໄຫວຕິດຕາມ ກວດກາຄັ້ງນີ້ ແມ່ນເພື່ອເກັບກຳຂໍ້ມູນກ່ຽວກັບສະພາບການດຳລົງຊີວິດ, ຮີດຄອງປະເພນີ ແລະວັດທະນະທຳ ກໍ່ຄືການພັດທະນາດ້ານເສດຖະກິດ ຍົກສູງຄຸນນະພາບຊີວິດການເປັນຢູ່ຂອງປະຊາຊົນບັນດາເຜົ່າໃນເຂດຫ່າງໄກສອກຫຼີກ, ທຸລະກັນດານ ເພື່ອເປັນຂໍ້ມູນໃນການຄົ້ນຄ້ວາ ແລະສັງລວມຂອງກຳມາທິການບັນດາເຜົ່າຕາມແຜນການທີ່ວາງໄວ້.

          ການໄປເຄື່ອນໄຫວຕິດຕາມ ກວດກາຂອງຄະນະໃນຄັ້ງນີ້ ຄະນະໄດ້ລົງເລິກພົບປະ ກັບ ປະຊາຊົນເຜົ່າ ຊິງມູນ ຢູ່ (ບ້ານແກ້ວແວ່ນ) ກຸ່ມບ້ານລາວຮຸ່ງ ເມືອງຊຽງຄໍ້ ເກັບກໍາດ້ານສະຖິຕິ, ຄວາມຂະຫຍາຍຕົວໃນການພັດທະນາຊີວິດການເປັນຢູ່ຂອງບ້ານ-ຂອງຄອບຄົວ, ການສຶກສາ, ການເຂົ້າເຖິງສຸກສາລາ-ໂຮງໝໍ ແລະອື່ນໆ. ຈາກນັ້ນ ຄະນະກໍ່ໄດ້ລົງໄປພົບປະ ກັບ ປະຊາຊົນຢູ່ (ບ້ານລ້ອງຕ່ອງ) ກຸ່ມບ້ານປ່າຮ້າງ, ຫ້ວຍຮຽງ ເມືອງສົບເບົາ ເພື່ອເກັບກໍາສະພາບປະກົດການຫຍໍ້ທໍ້ ດ້ານສາສະໜາທີ່ເກີດຂຶ້ນ ຊຶ່ງມີທ່າອ່ຽງຂະຫຍາຍຕົວນັບມື້ນັບເພີ່ມຂຶ້ນຢູ່ໃນເຂດດັ່ງກ່າວ ຊຶ່ງໄດ້ສ້າງຜົນກະທົບຕໍ່ຄວາມສະຫງົບ ແລະຄວາມເປັນລະບຽບຮຽບຮ້ອຍຂອງບ້ານເມືອງໃນວົງກ້ວາງເປັນເວລານົນນານມາ.

          ຈາກການລົງພົບປະກັບປະຊາຊົນບັນດາເຜົ່າໃນແຕ່ລະຈຸດ ທ່ານ ນາງ ບົວພັນ ລີໄກຢາ ປະທານກຳມາທິການບັນດາເຜົ່າ ຍັງໄດ້ໃຫ້ການໂອ້ລົມ ຊີ້ແຈງເຖິງແນວທາງນະໂຍບາຍຂອງພັກ ຕໍ່ວຽກງານຊົນເຜົ່າໃນໄລຍະໃໝ່, ຊີ້ແຈງບາງມາດຕາຂອງລັດຖະທຳມະນູນ, ກົດໝາຍ ແລະລະບຽບການອື່ນໆໃຫ້ກົດໝາຍທີ່ພົວພັນກັບວຽກງານຊົນເຜົ່າ ແລະສາສະໜາເປັນຕົ້ນ ດຳລັດ 315/ລບ ກ່ຽວກັບການປົກປ້ອງ ແລະຄຸ້ມຄອງການເຄື່ອນໄຫວດ້ານສາສະໜາ ແລະອື່ນໆ ໃຫ້ແກ່ບັນດາເປົ້າໝາຍດັ່ງກ່າວມີຄວາມເຂົ້າໃຈຕື່ມ ທັງຊີ້ແຈງເຖິງແຜນພັດທະນາເສດຖະກິດ-ສັງຄົມຂອງພັກ-ລັດ ແຕ່ລະຂັ້ນຈົນລົງຮອດບ້ານ ແລະກຸ່ມບ້ານ ເພື່ອຫັນປ່ຽນຊີວິດຈາກທີ່ດັ້ງເດີມ ສູ່ຊີວິດໃໝ່ທີ່ດີຂຶ້ນເທື່ອລະກ້າວຢ່າງໜັກແໜ້ນຕາມແນວທາງນະໂຍບາຍທີ່ພັກ-ລັດວາງອອກ, ທັງໄດ້ຮຽກຮ້ອງໃຫ້ທຸກຊົນເຜົ່າ ຈົ່ງເຊີດຊູຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະກັນ ຊ່ວຍຊູກັນໃນການພັດທະນາຊີວິດການເປັນຢູ່ໃຫ້ນັບມື້ ນັບດີຂຶ້ນໄປເລື້ອຍໆ.

          ພ້ອມກັນນີ້ ຄະນະຍັງໄດ້ຍາດເວລາໄປຢ້ຽມຢາມ ແລະມອບເຄື່ອງເປັນອາຫານແຫ້ງຈໍານວນໜຶ່ງໃຫ້ແກ່ອ້າຍນ້ອງທະຫານທີ່ພວມປະຕິບັດໜ້າທີ່ປ້ອງກັນເວນຍາມຢູ່ເຂດ ຜາຖີ່ ເນື່ອງໃນໂອການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ເພື່ອເປັນກຳລັງໃຈໃຫ້ແກ່ອ້າຍນ້ອງທະຫານດັ່ງກ່າວດ້ວຍບັນຍາກາດທີ່ເບີກບານມ່ວນ ຊື່ນ.

          ໃນມື້ທີ 4 ຄະນະໄດ້ຍາດເວລາເຮັດວຽກຮ່ວມກັບຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະບັນດາພາກສ່ວນທີ່ກ່ຽວຂ້ອງຂອງແຂວງ ຊຶ່ງປະກອບມີແນວລາວສ້າງຊາດ, ພະແນກພາຍໃນ, ພະແນກສຶກສາທິການ ແລະກິລາ, ບັນດາອົງການຈັດຕັ້ງມະຫາຊົນຂອງແຂວງ ເພື່ອແຈ້ງຜົນການລົງຕິດຕາມກວດກາຂອງຄະນະໃນຄັ້ງນີ້ ທັງໄດ້ປຶກສາຫາລືຕໍ່ບັນດາບັນຫາຕ່າງໆທີ່ປະຊາຊົນສະເໜີ ເພື່ອພ້ອມກັນຊອກຫາວິທີແກ້ໄຂໃນຕໍ່ໜ້າ ໂດຍສົມທົບກັບພະແນກການຕ່າງໆທີ່ກ່ຽວຂ້ອງເບື້ອງລັດຂອງແຂວງ ເຮັດໃຫ້ວຽກງານການພັດທະນາຊົນນະບົດ ແກ້ໄຂບັນຫາຫຍໍ້ທໍ້ນັບມື້ນັບມີບາດກ້າວໃໝ່.