ກສຕສ ສະພາແຫ່ງຊາດ ສ້າງຄວາມເຂັ້ມແຂງດ້ານວິຊາການໃຫ້ບຸກຄະລາກອນ

11/02/2019 00:00 -

(ສພຊ) ໃນລະຫວ່າງວັນທີ 28-29 ມັງກອນ 2019 ທີ່ເມືອງວັງວຽງ ແຂວງວຽງຈັນ, ກຳມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ (ກສຕສ) ສະພາແຫ່ງຊາດ ໄດ້ຈັດກອງປະຊຸມເຝິກອົບຮົມສ້າງຄວາມເຂັ້ມແຂງດ້ານວິຊາການ ໃຫ້ບຸກຄະລາກອນຂອງຕົນ ໂດຍການເປັນປະທານຂອງທ່ານ ບຸນປອນ ສີສຸລາດ ປະທານ ກສຕສ; ມີຮອງປະທານ, ຫົວໜ້າ-ຮອງຫົວໜ້າກົມທີ່ສັງກັດ ກສຕສ, ຮອງເລຂາທິການສະພາປະຊາຊົນແຂວງວຽງຈັນ, ຫົວໜ້າ-ຮອງຫົວໜ້າພະແນກ, ລັດຖະກອນວິຊາການພາຍໃນກຳມາທິການດັ່ງກ່າວ ແລະ ວິຊາການຂອງສະພາປະຊາຊົນແຂວງວຽງຈັນເຂົ້າຮ່ວມ.

ທ່ານ ບຸນປອນ ສີສຸລາດ ໃຫ້ຮູ້ວ່າ: ກໍເພື່ອປະຕິບັດຕາມທິດຊີ້ນຳ ແລະ ແຜນການສ້າງຄວາມເຂັ້ມແຂງ ຍົກລະດັບຂີດຄວາມສາມາດທາງດ້ານວິຊາການ ໃຫ້ແກ່ພະນັກງານ-ລັດຖະກອນຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງໃນຂອບເຂດທົ່ວປະເທດ, ເພື່ອສືບ​ຕໍ່​ຈັດ​ຕັ້ງ​ປະຕິບັດ​ຕາມ​ແຜນ 5 ປີ​ ຂ​ອງ ກສຕສ ໃຫ້ປາກົດຜົນເປັນຈິງ​ ທັງເປັນການສ້າງຄວາມເຂັ້ມແຂງ ແລະ ສ້າງຂີດຄວາມສາມາດທາງດ້ານວິຊາການ ໃຫ້ພະນັກງານ-ລັດຖະກອນ ທີ່ເປັນເສນາທິການຊ່ວຍວຽກ ໃຫ້ ກສຕສ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ເນື້ອໃນຂອງການເຝິກອົບຮົມຄັ້ງນີ້ ເປັນເນື້ອໃນທີ່ສຳຄັນ ແລະ ຈຳເປັນຫລາຍສຳລັບພະນັກງານ-ລັດຖະກອນວິຊາການ ຕ້ອງໄດ້ຮຽນຮູ້, ຕ້ອງກຳໃຫ້ໄດ້, ຕ້ອງຮູ້ຈັກວິທີການຄົ້ນຄວ້າ ແລະ ການຂີດການຂຽນຕ່າງໆ.  ກອງປະຊຸມ ຈະດໍາເນີນໄປເປັນເວລາ 2 ວັນເຕັມ ຖ້າທຽບໃສ່ກັບບັນຫາທີ່ຈະຍົກຂຶ້ນມາແລກປ່ຽນນຳກັນໃນຄັ້ງນີ້ ຍັງເຫັນວ່າ ຈໍາກັດຫລາຍ, ເຖິງຢ່າງໃດກໍຕາມ ເພື່ອຮັບປະກັນທາງດ້ານເນື້ອໃນ ສະເໜີໃຫ້ວິທະຍາກອນເອົາໃຈໃສ່ລົງເລິກອະທິບາຍຊີ້ແຈງບາງບັນຫາທີ່ເປັນຫລັກການ ທີ່ເຫັນວ່າມີຄວາມສໍາຄັນ ແລະ ຈໍາເປັນຕໍ່ນັກສໍາມະນາກອນ ເພື່ອໃຫ້ກໍາໄດ້ເນື້ອໃນທີ່ເປັນແກ່ນສານ ມີເວລາສົນທະນາ ແລະ ແລກປ່ຽນບົດຮຽນຕົວຈິງນຳກັນໃຫ້ຫລາຍ ແນໃສ່ເຮັດໃຫ້ສຳມະນາກອນສາມາດກຳໄດ້ ເຂົ້າໃຈໄດ້ ແລະ ເຮັດໄດ້ຈິງ ພາຍຫລັງໄດ້ສຳເລັດການເຝິກອົບຮົມຄັ້ງນີ້ ແລະ ຮຽກຮ້ອງໃຫ້ວິທະຍາກອນໄດ້ທຸ້ມເທຄວາມພະຍາຍາມ ແລະ ເອົາໃຈໃສ່ໃຫ້ເປັນປະໂຫຍດສຸງສຸດ ເພື່ອເກັບກຳ, ຮຽນຮູ້ ແລະ ແລກປ່ຽນບົດຮຽນ, ປະກອບຄວາມຄິດຄວາມເຫັນ ແລະ ຊັກຖາມໃນບັນຫາຕ່າງໆ ໃຫ້ມີຄວາມເຂົ້າໃຈຢ່າງເລິກເຊິງ ເພື່ອເຮັດໃຫ້ກອງປະຊຸມໄດ້ຮັບຜົນສຳເລັດຕາມຈຸດປະສົງ ແລະ ລະດັບຄາດໝາຍ.

          ກອງປະຊຸມໄດ້ຮັບຟັງການສະເໜີບົດຮຽນຈາກທ່ານ ສຈ. ດາວອນ ຫວ່າງວິຈິດ ອະດີດປະທານກຳມາທິການກົດໝາຍ ສະພາແຫ່ງຊາດ ກ່ຽວກັບການປະກອບຄຳເຫັນຕໍ່ການສ້າງ ແລະ ປັບປຸງກົດໝາຍ ໃນຂົງເຂດເສດຖະກິດ ເຕັກໂນໂລຊີ ແລະ ສິ່ງແວດລ້ອມ ແລະ ວິທີການຄົ້ນຄວ້າແກ້ໄຂຄຳຮ້ອງຂໍເປັນທຳ; ນອກຈາກນີ້, ຕາງໜ້າໃຫ້ທັງ 3 ກົມທີ່ສັງກັດພາຍໃນ ກສຕສ ໄດ້ນຳສະເໜີບົດຄົ້ນຄວ້ າຄື: ຕາງໜ້າກົມຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ລາຍງານກ່ຽວກັບການປັບປຸງກົດໝາຍວ່າດ້ວຍທີ່ດິນ (ສະບັບປັບປຸງ), ຕາງໜ້າກົມເສດຖະກິດການຜະລິດ ລາຍງານກ່ຽວກັບການປັບປຸງກົດໝາຍວ່າດ້ວຍປ່າໄມ້ສະບັບປັບປຸງ ແລະ ຕາງໜ້າໃຫ້ກົມເສດຖະກິດບໍລິການ ລາຍງານກ່ຽວກັບການປັບປຸງກົດໝາຍວ່າດ້ວຍໂທລະຄົມມະນາຄົມ; ພ້ອມດຽວກັນນີ້, ສຳມະນາກອນທີ່ເຂົ້າຮ່ວມກອງປະຊຸມຍັງໄດ້ຮ່ວມກັນຄົ້ນຄວ້າເຮັດບົດເຝິກຫັດ, ຂຶ້ນສະເໜີບົດຄົ້ນຄວ້າ ແລະ ປະກອບຄຳຄິດຄຳເຫັນ ໃສ່ຫົວຂໍ້ຕ່າງໆທີ່ນຳສະເໜີເຫັນຢ່າງກົງໄປກົງມາ ເຮັດໃຫ້ມີຄວາມເຂົ້າໃຈຕໍ່ບົດຮຽນເປັນຢ່າງດີ.

(ນາງ ປາກາລັກ ພົມມີໄຊ)