ປະທານ ກຜງສ ຕ້ອນຮັບເອກອັກຄະລັດຖະທູດ ການາດາ ປະຈຳລາວ

13/02/2019 00:00 -

(ສພຊ) ຕອນເຊົ້າວັນສຸກທີ 8 ກຸມພາ 2019 ທີ່ສະພາແຫ່ງຊາດ (ສພຊ), ທ່ານ ວິໄລວົງ ບຸດດາຄໍາ  ກໍາມະການສູນກາງພັກ ປະທານກໍາມາທິການແຜນການ, ການເງິນ ແລະ ການກວດສອບ (ກຜງສ) ໄດ້ຕ້ອນຮັບທ່ານ ນາງ ໂດນິກາ ພອດທີ (Donica Pottie) ເອກອັກຄະລັດຖະທູດ ຜູ້ມີອໍານາດເຕັມ ແຫ່ງການາດາ ປະຈໍາ ສປປລາວ ທີ່ມີສໍານັກງານຕັ້ງຢູ່ບາງກອກ, ຣາຊະອານາຈັກໄທ ພ້ອມດ້ວຍຄະນະ.

          ທ່ານ ວິໄລວົງ ບຸດດາຄໍາ ໄດ້ກ່າວສະແດງຄວາມຍິນດີຕ້ອນຮັບອັນອົບອຸ່ນຕໍ່ທ່ານນາງ ໂດນິກາ ພອດທີ ທັງຕີລາຄາສູງຕໍ່ການເຂົ້າພົບປະໃນຄັ້ງນີ້ ເຊິ່ງເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນການຮ່ວມມື ລະຫວ່າງສອງປະເທດໃຫ້ເຂົ້າສູ່ລວງເລິກ ແລະ ຂອບໃຈຕໍ່ການຊ່ວຍເຫລືອ, ສະໜັບສະໜູນເຊິ່ງກັນ ແລະ ກັນໃນເວທີພາກພື້ນ ແລະ ເວທີສາກົນຕະຫລອດມາ.

           ທ່ານ ນາງ ໂດນິກາ ພອດທີ ກໍໄດ້ກ່າວສະແດງຄວາມຂອບໃຈຕໍ່ທ່ານ ວິໄລວົງ ບຸດດາຄໍາ ທີ່ໄດ້ໃຫ້ການຕ້ອນຮັບອັນອົບອຸ່ນ ພ້ອມທັງແຈ້ງຈຸດປະສົງກ່ຽວກັບການເຂົ້າພົບປະໃນຄັ້ງນີ້ ກໍເພື່ອສືບຕໍ່ການພົວພັນ ແລະ ການຮ່ວມມືລະຫວ່າງສອງປະເທດລາວ-ການາດາ.

          ການພົວພັນ ແລະ ການຮ່ວມມືລາວ-ການາດາ ສປປລາວ ແລະ ການາດາໄດ້ສ້າງຕັ້ງສາຍພົວພັນການທູດ ໃນວັນທີ 15 ມິຖຸນາ 1974 ເຊິ່ງທັງສອງປະເທດບໍ່ເຄີຍໄດ້ຕັດສາຍພົວພັນການທູດນໍາກັນ ແລະ ລະດັບການພົວພັນໃນປັດຈຸບັນຢູ່ໃນຂັ້ນປົກກະຕິ, ນັບແຕ່ສ້າງຕັ້ງສາຍພົວພັນກັນທູດນໍາກັນ ສອງປະເທດຍັງຮັກສາສາຍພົວພັນມິດຕະພາບ ແລະ ການຮ່ວມມືອັນດີຕໍ່ກັນຕະຫລອດມາ ເປັນຕົ້ນແມ່ນດ້ານການຄ້າ ແລະ ການລົງທຶນ ແລະ ອື່ນໆ.

(ສອນສັກ ວັນວິໄຊ)