ຕາງໜ້າສະພາແຫ່ງຊາດ ເຂົ້າຮ່ວມພິທີປະດັບຫລຽນກາລະນຶກ 70 ປີ

13/02/2019 00:00 -

(ສພຊ) ວັນທີ 5 ກຸມພາ 2019, ທີ່ສູນພັດທະນາຜູ້ເສຍອົງຄະ 489 ບ້ານຂຸດສາມບາດ, ເມືອງໄຊທານີ, ນະຄອນຫລວງວຽງຈັນ ​ໄດ້​ມີພິທີປະດັບຫລຽນກາລະນຶກ 70 ປີ ເນື່ອງໃນໂອກາດສະເຫລີມສະຫລອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ແລະ ຍ້ອງຍໍຜົນງານປະຈຳປີຂອງສູນພັດທະນາຜູ້ເສຍອົງຄະ 489 ໃຫ້ແກ່ຄອບຄົວ ແລະ ພະນັກງານອາວຸໂສບໍານານ ຈຳນວນ 121 ທ່ານ ໂດຍການເປັນປະທານຂອງທ່ານ ບຸນຄົງ ຫລ້າສຸກັນ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ), ເຂົ້າຮ່ວມມີທ່ານ ພົຈ. ພູມີ ວັນດີໄຊ ຮອງປະທານກຳມາທິການປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ ສະພາແຫ່ງຊາດ (ສພຊ), ທ່ານ ນາງ ມະນີວັນ ເຢຍປາວເຮີ ຮອງປະທານກຳມາທິການວັດທະນະທຳ-ສັງຄົມ ສພຊ, ຫົວໜ້າ-ຮອງຫົວໜ້າກົມ, ມີຄະນະບັນຊາກະຊວງປ້ອງກັນປະເທດ, ຕາງໜ້າຈາກ 3 ອົງການຈັດຕັ້ງມະຫາຊົນຂອງ ສພຊ, ຄະນະສູນ, ພາກສວ່ນທຸລະກິດ ແລະ ພ້ອມດ້ວຍລູກຫລານພະນັກງານອາວຸໂສບຳນານເສຍອົງຄະ ແລະ ວິຊາການຂອງສູນເຂົ້າຮ່ວມ.

​ໃນ​ພິທີ, ທ່ານ ນາງ ອານົງຮັກ ຫວ່າງວັນທານຸວົງ ຮອງກົມຈັດຕັ້ງ ແລະ ພະນັກງານ ກະຊວງ ຮສສ ໄດ້ຂຶ້ນຜ່ານຂໍ້ຕົກລົງລັດຖະດຳລັດຂອງກະຊວງປ້ອງກັນປະເທດ ວ່າດ້ວຍການປະດັບຫລຽນກາລະນຶກ 70 ປີ ຈຳນວນ 121 ທ່ານ, ເນື່ອງໃນໂອກາດສະເຫລີມສະຫລອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ (20/1/1949-20/1/2019) ທີ່ມີຜົນງານອັນໃຫຍ່ຫລວງໃນພາລະກິດຕໍ່ສູ້ກູ້ຊາດຕ້ານຈັກກະພັດຜູ້ຮຸກຮານ ແລະ ໄລຍະປົກປັກຮັກສາສ້າງສາພັດທະນາປະເທດຊາດ; ນອກນັ້ນ, ຍັງໄດ້ຮັບຮອງ ແລະ ຍ້ອງຍໍເອົາກົມກອງດີເດັ່ນ ປະເພດ III, ຄອບຄົວດີເດັ່ນ ປະເພດ I ແລະ ບຸກຄົນດີເດັ່ນທີ່ມີຜົນງານປະຈຳປີ 2018 ​ເຊິ່ງການຍ້ອງຍໍຄັ້ງນີ້ແມ່ນເພື່ອສັນລະເສີນຜົນງານຄຸນງາມ ຄວາມດີຂອງພະນັກງານ-ນັກຮົບປະຕິວັດອາວຸໂສ, ພະນັກງານບຳນານຜູ້ທີ່ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດຕະຫລອດໄລຍະຜ່ານມາ.

​ໃນ​ຕອນ​ທ້າຍ​ພິທີ, ທ່ານ ພົຈ. ພູມີ ວັນດີໄຊ ​ພ້ອມ​ດ້ວຍ​ຄະນະ ໄດ້​ມອບ​ກະຕ່າ​ດອກ​ໄມ້​ເພື່ອ​ອວຍພອນ​ເນື່ອງ​ໃນ​ໂອກາດສະເຫລີມສະຫລອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ.

(ວິມານ ອິນ​ທະ​ວົງ)