ຍົກລະດັບການຕິດຕາມກວດກາການຈັດຕັ້ງປະຕິບັດກົດໝາຍ ແລະ ການອອກນິຕິກຳໃຕ້ກົດໝາຍ

18/02/2019 00:00 -

(ສພຊ) ໃນລະຫວ່າງວັນທີ 15-16 ກຸມພາ 2019, ທີ່ຫ້ອງປະຊຸມນາປ່າກວາງ ທ່າລາດ ເມືອງແກ້ວອຸດົມ ແຂວງວຽງຈັນ ໄດ້ເປີດກອງປະຊຸມສຳມະນາຍົກລະດັບຄວາມຮູ້ກ່ຽວກັບການຕິດຕາມກວດກາການຈັດຕັ້ງປະຕິບັດກົດໝາຍ ແລະ ການອອກນິຕິກຳໃຕ້ກົດໝາຍ ໂດຍການເປັນປະທານຂອງທ່ານ ສາຍທອງ ແກ້ວດວງດີ ຄະນະປະຈຳສະພາແຫ່ງຊາດ, ປະທານກຳມາທິການກົດໝາຍ, ເຂົ້າຮ່ວມມີບັນດາທ່ານປະທານ-ຮອງປະທານກຳມາທິການ, ຫົວໜ້າ-ຮອງຫົວໜ້າກົມ ຈາກສະພາແຫ່ງຊາດ, ບັນດາກະຊວງ ແລະ ອົງການຕ່າງໆ, ຫົວໜ້າ-ຮອງຫົວໜ້າພະແນກ, ຊ່ຽວຊານຂັ້ນອາວຸໂສ ປະຈຳມູນນິທິເວສມິນສະເຕີ ເພື່ອປະຊາທິປະໄຕ (WFD) ແລະ ພະນັກງານ-ວິຊາການທີ່ກ່ຽວຂ້ອງເຂົ້າຮ່ວມທັງໝົດ 65 ກວ່າທ່ານ.

ຈຸດປະສົງເພື່ອເປັນການຍົກລະດັບຄວາມຮູ້ໃຫ້ບັນດາກຳມາທິການ, ຫົວໜ້າກົມທີ່ຂຶ້ນກັບກຳມາທິການຂອງສະພາແຫ່ງຊາດ, ບັນດາກະຊວງ ແລະ ອົງການ ໃນການຍົກລະດັບຄວາມຮູ້ໃນການຕິດຕາມກວດກາການຈັດຕັ້ງປະຕິບັດນິຕິກຳ ແລະ ການປະເມີນຜົນຂອງການຈັດຕັ້ງປະຕິບັດນິຕິກຳ ເຊິ່ງເປັນວຽກງານໜຶ່ງທີ່ມີຄວາມສຳຄັນທຸກພາກສ່ວນຕ້ອງຮັບຮູ້ ແລະ ເຂົ້າໃຈ ທັງເປັນວຽກງານໃໝ່ ທີ່ຜ່ານມາກໍໄດ້ປະກາດໃຊ້ກົດໝາຍຫລາຍສະບັບແລ້ວ ແຕ່ກໍບໍ່ໄດ້ຕິດຕາມກວດກາການຈັດຕັ້ງປະຕິບັດນິຕິກຳ ແລະ ການປະເມີນຜົນການຈັດຕັ້ງປະຕິບັດນິຕິກຳ ຈຶ່ງເຮັດໃຫ້ກົດໝາຍບໍ່ໄດ້ຈັດຕັ້ງປະຕິບັດ ຫລື ໄດ້ຈັດຕັ້ງປະຕິບັດ ແຕ່ບໍ່ໄດ້ຮັບໝາກຜົນເທົ່າທີ່ຄວນ; ພ້ອມກັນນັ້ນ, ກໍເປັນເງື່ອນໄຂອັນດີໃຫ້ແກ່ບັນດາກຳມາທິການ, ກົມ, ກະຊວງ, ອົງການ ໄດ້ຮຽນຮູ້ ແລະ ນຳໄປຈັດຕັ້ງປະຕິບັດເຂົ້າໃນວຽກງານຂອງຕົນ.

ກອງປະຊຸມຄັ້ງນີ້, ໄດ້ຮັບຟັງການສະເໜີບົດຮຽນກ່ຽວກັບການຕິດຕາມກວດກາຄວາມຖືກຕ້ອງຂອງການອອກນິຕິກຳ ຈາກທ່ານ ນາງ ບຸນພອນ ເຮືອງມະນີ ຮອງປະທານກຳມາທິການກົດໝາຍ, ຄວາມຮູ້ກ່ຽວກັບການຕິດຕາມກວດກາ ແລະ ການປະເມີນຜົນການຈັດຕັ້ງປະຕິບັດກົດໝາຍ, ບົດຮຽນກ່ຽວກັບການຕິດຕາມກວດກາ ແລະ ການປະເມີນຜົນການຈັດຕັ້ງປະຕິບັດກົດໝາຍຂອງປະເທດອັງກິດ ແລະ ຂອງຕ່າງປະເທດ, ຫລັກການຕິດຕາມກວດກາ ແລະ ການປະເມີນຜົນການຈັດຕັ້ງປະຕິບັດກົດໝາຍ, ຮ່າງຄຳແນະນຳກ່ຽວກັບການຕິດຕາມກວດກາ ແລະ ການປະເມີນຜົນການຈັດຕັ້ງປະຕິບັດນິຕິກຳ ແລະ ທິດທາງແຜນການໃນຕໍ່ໜ້າສະຫລຸບບົດຮຽນຂອງຊ່ຽວຊານຕ່າງປະເທດ ຈາກທ່ານ ນາງ ວິກຕໍເຣຍ ຮັດສັນ (Victoria Hasson) ຊ່ຽວຊານຂັ້ນອາວຸໂສ ມູນນິທິເວສມິນສະເຕີ; ຈາກນັ້ນ, ບັນດາຜູ້ເຂົ້າຮ່ວມໄດ້ມີການສົນທະນາແລກປ່ຽນຄຳຄິດຄຳເຫັນເຊິ່ງກັນ ແລະ ກັນ.

ທ່ານ ສາຍທອງ ແກ້ວດວງດີ ໄດ້ກ່າວວ່າ: ກອງປະຊຸມສຳມະນາຍົກລະດັບຄວາມຮູ້ກ່ຽວກັບການຕິດຕາມກວດກາການຈັດຕັ້ງປະຕິບັດກົດໝາຍ ແລະ ການອອກນິຕິກຳໃຕ້ກົດໝາຍໃນຄັ້ງນີ້ ແມ່ນເພື່ອຍົກລະດັບຄວາມຮູ້ໃຫ້ບັນດາກຳມາທິການ, ຫົວໜ້າກົມທີ່ຂຶ້ນກັບກຳມາທິການຂອງສະພາແຫ່ງຊາດ, ບັນດາກະຊວງ ແລະ ອົງການຕ່າງໆ ເຊິ່ງການຕິດຕາມກວດກາການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ; ເວົ້າລວມ, ເວົ້າສະເພາະການຕິດຕາມກວດກາຄວາມຖືກຕ້ອງຂອງການອອກນິຕິກຳ ເຊິ່ງເປັນວຽກງານໜຶ່ງທີ່ມີຄວາມສຳຄັນທັງເປັນວຽກງານໃໝ່ ຜ່ານມາກົດໝາຍກໍໄດ້ປະກາດໃຊ້ຫລາຍສະບັບແລ້ວ ແຕ່ກໍບໍ່ໄດ້ຕິດຕາມກວດກາການຈັດຕັ້ງປະຕິບັດກົດໝາຍ ແລະ ການອອກນິຕິກຳໃຕ້ກົດໝາຍ ຈຶ່ງເຮັດໃຫ້ກົດໝາຍບໍ່ໄດ້ຮັບການຈັດຕັ້ງປະຕິບັດ ຫລື ໄດ້ຈັດຕັ້ງປະຕິບັດແລ້ວ ແຕ່ບໍ່ໄດ້ຮັບໝາກຜົນເທົ່າທີ່ຄວນ; ພ້ອມນັ້ນ, ທ່ານຍັງໄດ້ສະເໜີມາຍັງບັນດາຜູ້ເຂົ້າຮ່ວມຈົ່ງເຊີດຊູຄວາມຮັບຜິດຊອບ ເປັນເຈົ້າການຮັບຟັງການບັນລະຍາຍເນື້ອໃນຕ່າງໆ ຈາກບົດຮຽນຂອງນັກຄົ້ນຄວ້າທາງກົດໝາຍຂອງລາວ ແລະ ຊ່ຽວຊານຂັ້ນອາວຸໂສຈາກຕ່າງປະເທດ ໂດຍຕິດພັນກັບການຄົ້ນຄວ້າ ເພື່ອປະກອບຄຳຄິດຄຳເຫັນແລກປ່ຽນເຊິ່ງກັນ ແລະ ກັນ ຢ່າງເລິກເຊິ່ງ.

(ສຸພາວັນ ຫອມສະນິດ)