ກອງປະຊຸມຮ່ວມລະຫວ່າງ ກຜງສ ກັບອົງການການກວດສອບແຫ່ງລັດ

20/02/2019 00:00 -

(ສພຊ) ໃນວັນສຸກທີ 15 ກຸມພາຜ່ານມາ, ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6) ນະຄອນຫລວງວຽງຈັນ ໄດ້ມີກອງປະຊຸມຮ່ວມລະຫວ່າງກຳມາທິການແຜນການ ການເງິນ ແລະ ການກວດສອບ (ກຜງສ) ກັບອົງການກວດສອບແຫ່ງລັດ ປະຈຳປີ 2018 ເຊິ່ງຝ່າຍ ກຜງສ ນຳໂດຍທ່ານ ວິໄລວົງ ບຸດດາຄຳ ປະທານ ກຜງສ ແລະ ຝ່າຍອົງການກວດສອບແຫ່ງລັດ ນຳໂດຍທ່ານ ນາງ ວຽງທອງ ສີພັນດອນ ປະທານອົງການກວດສອບແຫ່ງລັດ ເຊິ່ງມີບັນດາທ່ານປະທານຮອງກຳມາທິການ, ຮອງປະທານອົງການກວດສອບແຫ່ງລັດ, ຫົວໜ້າ-ຮອງຫົວໜ້າກົມ, ຄະນະພະແນກ ແລະ ວິຊາການກ່ຽວຂ້ອງຂອງສອງຝ່າຍເຂົ້າຮ່ວມຢ່າງພ້ອມພຽງ.

          ກອງປະຊຸມໄດ້ປຶກສາຫາລື ແລະ ສະຫລຸບຖອດຖອນບົດຮຽນ ກ່ຽວກັບການຈັດຕັ້ງປະຕິບັດວຽກງານຮ່ວມກັນລະຫວ່າງສອງຝ່າຍໃນປີ 2018 ທີ່ຜ່ານມາ ແລະ ປຶກສາຫາລືທິດທາງແຜນການປະຕິບັດໜ້າທີ່ວຽກງານຮ່ວມກັນໃນປີ 2019 ແລະ ທັງສອງຝ່າຍໄດ້ຜັດປ່ຽນກັນຂຶ້ນຜ່ານບົດປະເມີນ ແລະ ຖອດຖອນບົດຮຽນໃນການການຈັດຕັ້ງປະຕິບັດວຽກງານຮ່ວມກັນໃນປີ 2018 ທີ່ຜ່ານມາ ແລະ ປຶກສາຫາລືທິດທາງແຜນການປະຕິບັດໜ້າທີ່ວຽກງານຮ່ວມກັນໃນປີ 2019; ພ້ອມນັ້ນ, ໄດ້ປະເມີນການຈັດຕັ້ງປະຕິບັດບາງມາດຕາຂອງກົດໝາຍວ່າດ້ວຍການກວດສອບແຫ່ງລັດ (ມາດຕາ 7 ແລະ 19) ແລະ ກົດໝາຍທີ່ກ່ຽວຂ້ອງ ທີ່ເຫັນວ່າຍັງບໍ່ທັນໄດ້ຈັດຕັ້ງປະຕິບັດຢ່າງເປັນຮູບປະທຳ ເຊິ່ງຈະຕ້ອງໄດ້ສືບຕໍ່ຄົ້ນຄວ້ານຳສະເໜີຄະນະປະຈຳສະພາແຫ່ງຊາດ ເພື່ອປັບປຸງໃຫ້ສອດຄ່ອງກັບເວລາ ແລະ ເນື້ອໃນຈິດໃຈຂອງກົດໝາຍ; ຂັ້ນຕອນ ແລະ ວິທີການລາຍງານຜົນການກວດສອບບົດສະຫລຸບຂາດຕົວງົບປະມານແຫ່ງລັດຕໍ່ກອງປະຊຸມສະພາແຫ່ງຊາດ ຕາມມາດຕາ 77 ຂອງກົດໝາຍວ່າດ້ວຍງົບປະມານແຫ່ງລັດ ໂດຍສະເພາະການກວດສອບ, ການລາຍງານ ແລະ ການພິຈາລະນາຮັບຮອງຜົນການກວດສອບບົດສະຫລຸບຂາດຕົວການຈັດຕັ້ງປະຕິບັດງົບປະມານຂອງສູນກາງ ແລະ ທ້ອງຖິ່ນ ແລະ ບັນຫາສຳຄັນອື່ນໆອີກຈຳນວນໜຶ່ງ; ນອກນັ້ນ, ບັນດາທ່ານທີ່ເຂົ້າຮ່ວມກອງປະຊຸມຍັງໄດ້ປະກອບຄຳຄິດຄຳເຫັນແລກປ່ຽນບົດຮຽນຢ່າງກົງໄປກົງມາ, ມີລັກສະນະສ້າງສັນ ແລະ ສາມາດຖອດຖອນບົດຮຽນທີ່ດີ.

(ນາງ ປາກາລັກ ພົມມີໄຊ)