ກອງປະຊຸມຄະນະກຳມະການວັດທະນະທຳ-ສັງຄົມຂອງສະມັດຊາລັດຖະສະພາອາຊີ (APA)

27/02/2019 00:00 -

(ສພຊ) ໃນ​ລະ​ຫວ່າງວັນ​ທີ 12-15 ກຸມ​ພາ 2019 ຄະນະຜູ້ແທນສະພາແຫ່ງຊາດລາວ ນໍາໂດຍທ່ານ ນາງ ພອນ​ເພັດ ບຸບ​ຜາ ຮອງ​ປະ​ທານ​ກຳ​ມາ​ທິ​ການ​ວັດ​ທະ​ນະ​ທຳ-ສັງ​ຄົມ ພ້ອມ​ດ້ວຍ​ຄະ​ນະ ໄດ້​ເຂົ້າ​ຮ່ວມກອງ​ປ​ະ​ຊຸມ​ຄະ​ນະ​ກຳ​ມະ​ການ​ວັ​ດ​ທະ​ນະ​ທຳ-ສັງ​ຄົມ ​ຂອງ​ສະ​ມັດ​ຊາ​ລັດ​ຖະ​ສະ​ພາ​ອາ​ຊີ (Asian Parliamentary Assembly-APA) ທີ່​ບາງກອກ, ຣາ​ຊະ​ອາ​ນາ​ຈັກ​ໄທ ເຊິ່ງເຂົ້າ​ຮ່ວມກອງ​ປະ​ຊຸມ​ດັ່ງ​ກ່າວ​ມີ​ບັນ​​ດາ​ຄະ​ນະ​ຜູ້​ແທນ​ຈາກ​ບັນດາປະ​ເທດ​ສະ​ມາ​ຊິກຂອງ​ອົງ​ການ​ສະ​ມັດ​ຊາ​ລັດ​ຖະ​ສະ​ພາ​ອາ​ຊີ ຈຳ​ນວນ 22 ປະ​ເທດ.

ໃນກອງປະຊຸມ, ຄະ​ນະ​ຜູ້​ແທນລາວ​ໄດ້​ເຂົ້າ​ຮ່ວມ​ປຶກ​ສາ​ຫາ​ລື​ ແລະ ພິ​ຈາ​ລະ​ນາ​ຫຼາຍ​ບັນ​ຫາ ເປັນ​ຕົ້ນ​ແມ່ນການ​ສົ່ງ​ເສີມ​ຄວາ​ມ​ຫລາກ​ຫລາຍ​ທາງ​ດ້ານ​ວັ​ດ​ທ​ະ​ນະ​ທຳ, ການ​ຮ່ວມ​ມື​ກ່ຽວ​ກັບ​ການ​ສ້າງ​ຄວາມ​ສະ​ເໜີ​ພາບ​ດ້ານ​ສາ​ທາ​ລະ​ນະ​ສຸກ, ສັງ​ຄົມ​ຜູ້​ສູງ​ອາ​ຍຸ​ໃນ​ອາ​ຊີ, ​ການ​ສົ່ງ​ເສີມ​ຄຸນ​ນະ​ພາບ​ຂອງ​ການ​ພັດ​ທະ​ນາ​ເດັກ​ນ້ອຍ ແລະ ຊາວ​ໜຸ່ມ​ເພື່ອ​ສັງ​ຄົມ​ທີ່​ຍືນ​ຍົງ, ການ​ຮ່ວມ​ມື​ດ້ານ​ກົດ​ໝາຍ ແລະ ນິ​ຕິ​ບັນ​ຍັດ ​ໃນ​ການ​ຕໍ່​ຕ້ານ​ການ​ຄ້າ​ຂາຍ​ວັດ​ຖຸ​ທາງ​ດ້ານ​ວັດ​ທະ​ນະ​ທຳ​, ການ​ປົກ​ປ້ອງ ແລະ ສົ່ງ​ເສີມ​ສິດ​ທິ​ແຮງ​ງານ​ເຄື່ອນ​ຍ້າຍ, ການ​ຕ້ານ​ການ​ສໍ້​ລາດ​ບັງ​ຫລວງ, ການ​ຮ່ວມ​ມື​ໃນ​ການ​​ຕ້ານ​ການ​ຄ້າ​ຢາ​ເສບ​ຕິດ, ການ​ເຊື່ອມ​ໂຍງ​ອາ​ຊີ​ໂດຍ​ຜ່ານ​ຂໍ້​ມູນ-ຂ່າວ​ສານ​ເຕັກ​ໂນ​ໂລ​ຊີ​ດ້ານ​ຄົມ​ມະ​ນາ​ຄົມ​ສື່​ສານ ແລະ ບັນ​ຫາ​ອື່ນໆ. ​ກອງ​ປະ​ຊຸມຍັງ​ໄດ້​ຮັບ​ຮອງ​ເອົາ​ມະ​ຕິ​ຈຳ​ນວນ 13 ສະ​ບັບ ໂດຍ​ຮຽກ​ຮ້ອງ ແລະ ສະ​ເໜີ​ໃຫ້​ບັນ​ດາ​ປະ​ເທດ​ສະ​ມາ​ຊິກມີ​ການ​ຮ່ວມ​ມື​ກັນ ແລະ ຈັດ​ຕັ້ງ​ປະ​ຕິ​ບັດ​​ບັນ​ດາມະ​ຕິ​ໃນ​ຂົງ​ເຂດ​ວັດ​ທະ​ນະ​ທຳ-ສັງ​ຄົມ ໂດຍ​ເລັ່ງ​ໃສ່​ບັນ​ຫາ​ສຸ​ຂະ​ພາບ, ຜູ້​ສູງ​ອາ​ຍຸ, ການ​ປົກ​ປ້ອງ​ແຮງ​ງານ​ ແລະ ອື່ນໆ; ນອກ​ຈາກ​ນັ້ນ, ຍັງ​ຊຸກ​ຍູ້​ໃຫ້​ບັນ​ດາ​ປະ​ເທດ​ສະ​ມາ​ຊິກ​ສົ່ງ​ເສີມ​ການ​ສ້າງ​ ແລະ ​ປັບ​ປຸງ​ກົດ​ໝາຍ​ທີ່​ເຫັນ​ວ່າ​ມີ​ຄວາມ​ຈຳ​ເປັນ​ເພື່ອ​ຮັບ​ປະ​ກັນ​ການ​ປົກ​ປ້ອງ​ເດັກ​ນ້ອຍ ແລະ ຊາວ​ໜຸ່ມ​ຈາ​ກ​ການ​ໃຊ້​ຄວາມ​ຮຸນ​ແຮງ​ທຸກ​ຮູບ​ແບບ; ຊຸກ​ຍູ້​ໃຫ້​ລັດ​ຖະ​ບານ​ຂອງ​ຕົນ​ ສ້າງ ແລະ ປະ​ຕິ​ບັດ​ນະ​ໂຍ​ບາຍ​ທີ່​ມີ​ຄວາມ​ຊັດ​ເຈນ ແລະ ຖືກ​ເປົ້າ​ໝາຍ​ຫລາຍ​ຂຶ້ນ ​ເພື່ອ​ຮັບ​ປະ​ກັນ​ໃຫ້​ມີ​ຜົນ​ສຳ​ເລັດ​ໃນ​ການ​ບັນ​ລຸ​ເປົ້າ​ໝາ​ຍ​ການ​ພັດ​ທະ​ນາ​ແບບ​ຍືນ​ຍົງ ລວມທັງ​ການ​ປົກ​ຄຸມ​ສຸ​ຂະ​ພາບ​ແບບ​ທົ່ວ​ເຖິງ, ການ​ເຂົ້າ​ເຖິງ​ຢາ​ທີ່​ມີ​ຄຸນ​ນະ​ພາບ, ມີປະ​ສິດ​ທິ​ຜົນ, ປອດ​ໄພ ແລະ ມີລາ​ຄາ​ຖືກ ແລະ ​ເຂົ້າ​ເຖິງ​ເຕັກ​ໂນ​ໂລ​ຊີ​ທາງ​ການ​ແພດ.

ພ້ອມ​ດຽວ​ກັນ​ນັ້ນ, ກອງປະຊຸມໄດ້ຮຽກ​ຮ້ອງ​ໃຫ້​ພິ​ຈາ​ລະ​ນາ​ການ​ໃຫ້​ສັດ​ຕະ​ຍາ​ບັນ​ແກ່​ບັນ​ດາ​ສົນ​ທິ​ສັນ​ຍາ​ທີ່ກ່ຽວ​ຂ້ອງ​ກັບ​ການ​ປົກ​ປ້ອງ​ມໍ​ລະ​ດົກ​ທາງ​ດ້ານ​ວັດ​ທະ​ນະ​ທຳ ແລະ ມໍ​ລະ​ດົກ​ທາງ​ດ້ານທຳ​ມະ​ຊາດ ແລະ ພິ​ຈາ​ລະ​ນາ​ການ​ສ້າງ​ນິ​ຕິ​ກຳ​ ກ່ຽວ​ກັບ​ການ​ປົກ​ປ້ອງ​ສັງ​ຄົມ, ການ​ບໍ​ລິ​ການ​ທາງ​ດ້ານ​ສຸ​ຂະ​ພາບ, ການ​ໃຫ້​ໂອ​ກາດ​ແກ່​ຜູ້​ສູງ​ອາ​ຍຸ ​ເພື່ອ​ໃຫ້​ມີ​ວຽກ​ເຮັດ​ງານ​ທຳ ແລະ ອື່ນໆ.