ປະທານ ກປຊສ ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ VIII ຢູ່ໄຊຍະບູລີ

27/02/2019 00:00 -

(ສພຊ) ວັນທີ 20 ກຸມພາຜ່ານມາ, ທ່ານ ພົນຈັດຕະວາ ຄໍາສຸກ ວີອິນທະວົງ ປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ (ກປຊສ) ທັງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 7 ແຂວງໄຊຍະບູລີ ພ້ອມດ້ວຍຄະນະ ໄດ້ເຄື່ອນໄຫວເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 6 ຂອງສະແຫ່ງຊາດ (ສພຊ) ຊຸດທີ VIII ຢູ່ເມືອງເງິນ ແຂວງໄຊຍະບູລີ

          ການເຄື່ອນໄຫວເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ VIII ໃນຄັ້ງນີ້ ແມ່ນໄດ້ແບ່ງອອກເປັນ 3 ຈຸດໃຫຍ່ຄື: ຈຸດທີ 1 ແມ່ນຢູ່ຫໍປະຊຸມບ້ານເພຍງາມ, ຈຸດທີ່ 2 ຢູ່ຫໍປະຊຸມບ້ານບີໝີ ແລະ ຈຸດທີ 3 ຢູ່ຫໍປະຊຸມບ້ານກາງ, ມີບັນດາທ່ານຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ, ຫ້ອງການ- ກົມກອງ, ນາຍບ້ານ ແລະ ປະຊາຊົນ ທັງ 3 ບ້ານ ເຊິ່ງມີຜູ້ເຂົ້າຮ່ວມຮັບຟັງທັງໝົດ 601 ຄົນ, ຍິງ 309 ຄົນ.

ໃນໂອກາດທີ່ລົງມາເຜີຍແຜ່ຜົນສໍາເລັດຂອງກອງປະຊຸມສະໄໜສາມັນເທື່ອທີ 6 ຂອງ ສພຊ ຊຸດທີ VIII ທ່ານປະທານ ກປຊສ ໄດ້ຍົກໃຫ້ເຫັນຜົນງານທີ່ພົ້ນເດັ່ນໃນໄລຍະຜ່ານມາ ເປັນຕົ້ນແມ່ນແຜນພັດທະນາເສດຖະກິດ-ສັງຄົມປະຈຳ 2018 ແລະ ທິດທາງແຜນການປີ 2019 ຂອງລັດຖະບານ ບົດລາຍງານຂອງອົງການກວດສອບແຫ່ງລັດ ປະຈໍາປີ 2018 ແລະ ທິດທາງແຜນການປີ 2019, ພິຈາລະນາ ແລະ ຮັບຮອງເອົາການສ້າງ ແລະ ປັບປຸງກົດໜາຍ ຈໍານວນ 9 ສະບັບ ແລະ ການຈັດຕັ້ງປະຕິບັດແຜນງົບປະມານແຫ່ງລັດ 9 ເດືອນ ຄາດຄະເນປີ 2018 ແລະ ທິດທາງປີ 2019; ຈາກນັ້ນ, ກໍໄດ້ເຜີຍແຜ່ຜົນສໍາເລັດຂອງກອງປະຊຸມສະໄໜສາມັນເທື່ອທີ 6 ຂອງສະພາປະຊາຊົນແຂວງ ຊຸດທີ I ເພື່ອແນໃສ່ເຮັດໃຫ້ພະນັກງານ, ທະຫານ, ຕໍາຫລວດ ແລະ ປະຊາຊົນ ໄດ້ຮັບຮູ້ບັນດາຄາດໜາຍຕ່າງໆເພື່ອນໍາໄປຈັດຕັ້ງປະຕິບັດໃຫ້ເກີດດອກອອກຜົນ.

 

(ອິນແປງ ແຫວນຄຳ)