27/02/2019 00:00 -

(ສພຊ) ເພື່ອເຮັດໃຫ້ອໍານາດການປົກຄອງບ້ານຕະຫລອດຮອດພໍ່ແມ່ປະຊາຊົນຢູ່​ທ້ອງ​ຖີ່​ນ-ຮາກ​ຖານ ໄດ້ມີຄວາມຮັບຮູ້, ເຂົ້າໃຈຕໍ່ແນວທາງແຜນນະໂຍບາຍຂອງພັກ ເວົ້າລວມ,​ ເວົ້າສະເພາະກໍຄື ວຽກງານຂອງສະພາແຫ່ງຊາດ (ສພຊ) ແລະ ສະພາປະຊາຊົນແຂວງ (ສພຂ), ທັງເປັນການເກັບກໍາສະພາບການ, ຄໍາຄິດຄໍາເຫັນຂອງປະຊາຊົນ, ຄໍາສະເໜີຕ່າງໆຂອງປະຊາຊົນໃນເຂດເລືອກຕັ້ງຕໍ່ການປົກປັກຮັກສາ ແລະ ສ້າງສາພັດທະນາປະເທດຊາດ.

ໃນລະຫວ່າງວັນທີ 18-22 ກຸມ​ພາ 2019 ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 7 ແຂວງໄຊຍະບູລີ ນໍາໂດຍທ່ານ ນາງ ບົວພັນ ລີໄກຢາ ປະທານກໍາມາທິການບັນດາເຜົ່າ (ກບຜ)ສະພາແຫ່ງຊາດ; ທ່ານ ນາງອິດມະນີ ຈັນທະຄູນ ຮອງປະທານຄະນະສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງ; ທ່ານ ບຸນໄທ ສີເທບ   ສສຊ ປະຈໍາເຂດເລືອກຕັ້ງ ພ້ອມດ້ວຍສະມາຊິກ ສພຂ ປະຈໍາເມືອງ ໄດ້ລົງເຄື່ອນໄຫວເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ VIII ແລະ ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງ ສພຂ ຊຸດທີ I ຢູ່ 5 ເມືອງຄື: ເມືອງພຽງ, ປາກ​ລາຍ, ແກ່ນ​ທ້​າວ, ​ບໍ່​ແຕນ ແລະ ທົ່ງ​ມີ​ໄຊ ລວມທັງໝົດ 15 ຈຸດ, ກວມ​ເອົາ 35 ບ້ານ, ມີອຳ​ນາດ​ການ​ປົກ​ຄອງ​ບ້ານ​ ແລະ ພໍ່​ແມ່​ປະ​ຊາ​ຊົນ​ເຂົ້າຮ່ວມຮັບຟັງ 3.376 ຄົນ, ຍິງ 2.273 ຄົນ.

ໃນການເຄື່ອນໄຫວຄັ້ງນີ້, ໄດ້ຮັບຟັງລາຍງານສະພາບການພັດທະນາເສດຖະກິດ-ສັງຄົມຂອງບ້ານໂດຍຫຍໍ້; ຈາກນັ້ນ, ສສຊ ໄດ້ເຜີຍແຜ່ກ່ຽວ​ກັບລະບົບກົງຈັກການຈັດຕັ້ງ, ພາລະບົດບາດ, ສິດ ແລະ ໜ້າທີ່ ຂອງ ສພຊ ກໍຄື ສພຂ; ບາງບັນດາເນື້ອໃນຈິດໃຈຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ VIII ແລະ ສພຂ ຊຸດທີ I ເປັນ​ຕົ້ນ​ແມ່ນ​ມະ​ຕິ​ກອງ​ປະ​ຊຸມ​​ ສພຊ​ ວ່າ​ດ້ວຍການ​ຮັບ​ຮອງເ​ອົາ​ບົດ​ລາຍ​ງານ​ຂອງ​ລັດ​ຖະ​ບານ ​ກ່ຽວ​ກັບ​ການ​ຈັດ​ຕັ້ງ​ປະ​ຕິ​ບັດ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ ປະ​ຈຳ​ປີ 2018 ແລະ ທິດ​ທາງ ປະ​ຈຳ​ປີ 2019 ແລະ ມະ​ຕິ​ກອງ​ປະ​ຊຸມ​​ ສພຂ​ ວ່າ​ດ້ວຍການ​ຮັບ​ຮອງເ​ອົາ​ບົດ​ລາຍ​ງານ​ຂອງ​ອົງ​ການ​ປົກ​ຄອງ​ແຂວງ ກ່ຽວ​ກັບ​ການ​ຈັດ​ຕັ້ງ​ປະ​ຕິ​ບັດ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ ປະ​ຈຳ​ປີ 2018 ແລະ ທິດ​ທາງ ປະ​ຈຳ​ປີ 2019; ພ້ອມດຽວກັນນັ້ນ, ຍັງໄດ້ຍົກໃຫ້ເຫັນບາງມາດຕາຂອງກົດໝາຍວ່າດ້ວຍຄອບຄົວ; ວຽກ​ງານ​ຊົນ​ເຜົ່າ ແລະ ສາ​ສະ​ໜາ; ວຽກງານບົດບາດຍິງ-ຊາຍ; ໄພ​ຄຸກ​ຄາມ ແລະ ຜົນຮ້າຍຂອງຢາເສບຕິດ ແລະ ໄດ້​ເນັ້ນໜັກໃຫ້ທຸກຄົນ ຈົ່ງມີຮັກສາໄດ້ຄວາມສາມັກຄີເປັນປຶກແຜ່ນ, ບຸກບືນສ້າງເສດຖະກິດຄອບຄົວເອົາໃຈໃສ່ໃນການປູກ-ການລ້ຽງທີ່ເປັນມູນເຊື້ອ ໃຫ້ກາຍເປັນສິນຄ້າ ເພື່ອໃຫ້ຄອບຄົວຮັ່ງ​ມີ​ຂື້ນ​ເປັນ​ກ້າວໆ.

ໃນ​ຕອນ​ທ້າຍ, ສ​ສ​ຊ ໄດ້ເປີດໂອກາດໃຫ້ຜູ້ເຂົ້າຮ່ວມໄດ້ມີຄໍາຄິດຄໍາເຫັນແລກປ່ຽນ ແລະ ສະ  ເໜີບັນຫາ, ຂໍ້ຂັດຂ້ອງໝອງໃຈຕ່າງໆ ເຊິ່ງບັນຫາທີ່ພໍ່ແມ່ປະຊາຊົນຊົນສົນໃຈຫລາຍທີ່ສຸດແມ່ນບັນຫາການກໍ່ສ້າງໂຄງລ່າງພື້ນຖານ ແລະ ​ ບັນຫາລາຄາຜົນຜະລິດຕົກຕໍ່າ ແລະ ໃນໂອກາດລົງເຄື່ອນໄຫວໃນຄັ້ງນີ້, ຄະນະຍັງໄດ້ນໍາເອົາກະ​ຕິກ​ນ້ຳ ແລະ ຈອກ​ແກ້ວ ມອບໃຫ້ບັນ​ດາ​ບ້ານເພື່ອ​ນໍ​າໃຊ້​ເຂົ້າ​ໃນ​ວຽກ​ງານ​ລວມ​ຂອງ​ບ້ານ ຈໍານວນ 35 ຊຸດ ລວ​ມມູນຄ່າ 3 ລ້ານກວ່າກີບ​.

(ນີ່​ຕູ່ ປະ​ສິດ​ທິ​ພົງ)