ປະທານ ກຜງສ  ຊຸກຍູ້ ແລະ ກວດກາໂຄງການຢູ່ແຂວງໄຊຍະບູລີ

27/02/2019 00:00 -

(ສພຊ) ໃນລະຫວ່າງວັນທີ 21-23 ກຸມພາຜ່ານມາ, ທ່ານ  ວິໄລວົງ ບຸດດາຄໍາ ປະທານກໍາມາທິການແຜນການ ການເງິນ ແລະ ການກວດສອບ (ກຜງສ) ພ້ອມດ້ວຍຄະນະ ໄດ້ລົງຊຸກຍູ້ບັນດາໂຄງການລົງທຶນຂອງລັດ ຢູ່ 3 ເມືອງຄື: ບໍ່ແຕນ, ແກ່ນທ້າວ ແລະ ປາກລາຍ ໂດຍມີທ່ານ ເພັງນິລັນ ຄໍາພັນເພັງ ຮອງເລຂາພັກແຂວງ, ທ່ານ ຈັດຕະວາ ແກ້ວຄໍາເພັດ ສະມາຊິກສະພາແຫ່ງຊາດ ປະທານຄະນະກໍາມະການເສດຖະກິດ, ແຜນການ ແລະ ການເງິນ, ມີເລຂາພັກເມືອງ, ສະມາຊິກສະພາປະຊາຊົນແຂວງ, ຫົວໜ້າພະແນກການທີ່ກ່ຽວຂ້ອງ, ຫົວໜ້າບໍລິສັດ ແລະ ພະນັກງານ-ວິຊາການທີ່ກ່ຽວຂ້ອງເຂົ້າຮ່ວມ.

ເພື່ີອເປັນການກະຕຸກຊຸກຍູ້ ແລະ ເກັບກໍາບັນດາຂໍ້ມູນ ຂອງບັນດາໂຄງການລົງທຶນຂອງສູນກາງຄຸ້ມຄອງ ທີ່ພວມຈັດຕັ້ງປະຕິບັດຢູ່ພາຍໃນແຂວງໄຊຍະບູລີ ປະຈໍາປີ 2018 ໃຫ້ໄດ້ຮັບການຈັດຕັ້ງປະຕິບັດບັນລຸຕາມລະດັບຄາດໝາຍ ຄະນະດັ່ງກ່າວໄດ້ລົງຕິດຕາມໂຄງການກໍ່ສ້າງຕາຝັ່ງຕ້ານເຈື່ອນ ຈຸດບ້ານນາຄ່າ ຕອນເໜືອ (ດ່ານປະເພນີ) ເມືອງບໍ່ແຕນ ເຊິ່ງໄດ້ເຊັນສັນຍາຮັບເໝົາການກໍ່ສ້າງວັນທີ 19 ກໍລະກົດ 2017 ເຖິງວັນທີ 5 ກໍລະກົດ 2019 ມີມູນຄ່າ 8,83 ຕື້ກີບ, ລວງຍາວ 820 ແມັດ, ຜູ້ຮັບເມົາແມ່ນບໍລິສັດ ສີປະເສີດ ກໍ່ສ້າງຈໍາກັດ ມາຮອດປະຈຸບັນປະຕິບັດໄດ້ທັງໝົດ 35%; ໂຄງການກໍ່ສ້າງຕາຝັ່ງຕ້ານເຈື່ອນຈຸດບ້ານນາຄ່າ ຕອນໃຕ້ ໄດ້ຮັບອະນຸມັດ ແລະ ເຊັນສັນຍາຮັບເໝົາກໍ່ສ້າງເລີ່ມແຕ່ວັນທີ 28 ທັນວາ 2015 ເຖິງວັນທີ 8 ພຶດສະພາ 2016, ມີມູນຄ່າການກໍ່ສ້າງທັງໝົດ 9.176 ຕື້ກີບ, ມີລວງຍາວ 460 ແມັດ ໄດ້ເລີ່ມລົງມືຈັດຕັ້ງປະຕິບັດ ວັນທີ 23 ທັນວາ 2015 ໂດຍແມ່ນບໍລິສັດ ພັນທະມິດ ກໍ່ສ້າງ-ຂົວທາງ ຈໍາກັດ ເປັນຜູ້ຮັບເໝົາກໍ່ສ້າງ ມາຮອດປັດຈຸບັນແມ່ນປະຕິບັດໄດ້ 41,16%; ໂຄງການກໍ່ສ້າງຕາຝັ່ງເຈື່ອນນໍ້າເຫືອງ ບ້ານທ້າວແກ່ນ ເມືອງແກ່ນທ້າວ ມີມູນຄ່າຫລາຍກວ່າ 20 ຕື້ກີບ ເຊີ່ງເລີ່ມແຕ່ວັນທີ 28 ທັນວາ 2015 ເຖິງວັນທີ 8 ສິງຫາ 2016 ໂດຍແມ່ນບໍລິສັດ ພັນທະມິດ ກໍ່ສ້າງ-ຂົວທາງ ຈໍາກັດ ເປັນຜູ້ຮັບເໝົາກໍ່ສ້າງ ມາຮອດປະຈຸບັນທາງບໍລິສັດແມ່ນບໍ່ໄດ້ດໍາເນີນການກໍ່ສ້າງແຕ່ຢ່າງໃດ ໄດ້ພຽງ 34,9% ແລະ ໝົດກໍານົດສັນຍາການກໍ່ສ້າງແລ້ວ; ໂຄງການກໍ່ສ້າງຕາຝັ່ງຕ້ານເຈື່ອນນໍ້າເຫືອງ ບ້ານຈອມແກ້ວ ເມືອງແກ່ນທ້າວ (ກ້ອງຂົວມິດຕະພາບ) ເລີ່ມແຕ່ວັນທີ 11 ກໍລະກົດ 2017 ເຖິງວັນທີ 5 ກໍລະກົດ 2019 ມີມູນຄ່າ 16,55 ຕື້ກີບ, ມີລວງຍາວ 1,100 ແມັດ ໂດຍແມ່ນ ບໍລິສັດ SLK ກໍ່ສ້າງ-ຂົວທາງ ເປັນຜູ້ຮັບເໝົາກໍ່ສ້າງ ມາຮອດປະຈຸບັນປະຕິບັດໄດ້ 30,14% ແລະ ໂຄງການກໍ່ສ້າງຕາຝັ່ງຕ້ານເຈື່ອນນໍ້າຂອງ ເມືອງປາກລາຍ ເລີ່ມແຕ່ວັນທີ 26 ກໍລະກົດ 2018 ເຖິງວັນທີ 26 ກໍລະກົດ 2021 ມີມູນຄ່າການກໍ່ສ້າງ 21,53 ຕື້ກີບ, ລວງຍາວທັງໝົດ 900 ແມັດ ປັດຈຸບັນພວມເລີ່ມລົງມືຈັດຕັ້ງປະຕິບັດຍັງບໍ່ທັນໄດ້ປະເມີນຄວາມສໍາເລັດຂອງໜ້າວຽກຈາກຂະແໜງການທີ່ກ້ຽວຂ້ອງ.

ຈາກນັ້ນ, ທ່ານ ວິໄລວົງ ບຸດດາຄໍາ ຍັງໄດ້ມີຄໍາຄິດຄໍາເຫັນ ໃຫ້ສະພາປະຊາຊົນແຂວງລົງຕິດຕາມກວດກາເປັນແຕ່ລະໄລຍະພ້ອມທັງລາຍງານໃຫ້ຂັ້ນເທິງເປັນປົກກະຕິ  ແລະ ໃຫ້ພະແນກ ການທີ່ກ່ຽວຂ້ອງເອົາໃຈໃສ່ຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດບັນດາໂຄງການໃນຂົງເຂດຄວາມຮັບຜິດຊອບຂອງຕົນ ເພີ່ມກົນໄກການປະສານງານຂອງແຕ່ລະຂະແໜງການທີ່ກ່ຽວຂ້ອງ ລະຫວ່າງຂັ້ນສູນກາງ ແລະ ຂັ້ນແຂວງ; ຂັ້ນແຂວງ  ແລະ ຂັ້ນເມືອງຕື່ມ ເພື່ອໃຫ້ກົມກຽວກັນ ແລະ ແລກປ່ຽນຂໍ້ມູນຂ່າວສານ ເຊິ່ງກັນ ແລະ ກັນໃຫ້ທົ່ວເຖິງ ເພື່ອພ້ອມກັນຈັດຕັ້ງປະຕິບັດໃຫ້ສໍາເລັດຕາມກໍານົດສັນຍາການກໍ່ສ້າງ ທັງໝົດເຫລົ່ານີ້ກໍເພື່ອເປັນການກະຕຸກຊຸກຍູ້ບັນດາໂຄງການ, ການປະກອບສ່ວນຂອງບັນດາພະແນກການ, ອົງການ ຕະຫລອດຮອດອໍານາດການປົກຄອງໄດ້ມີສ່ວນຮ່ວມໃນການປົກປັກຮັກສາ ແລະ ສ້າງສາພັດທະນາປະເທດຊາດ; ເວົ້າລວມ, ເວົ້າສະເພາະກໍຄືຂອງແຂວງໄຊຍະບູລີ ໃຫ້ມີຄວາມຈະເລີນຮຸ່ງເຮື່ອງຂຶ້ນເປັນກ້າວໆ.

(ອິນທີ ຂຽວສີຟ້າ)