ເລຂາທິການສະພາແຫ່ງຊາດ ຕ້ອນຮັບຜູ້ອຳນວນການໂຄງການ ຈາກອົງການມູນນິທິເວັດມີນສເຕີ ເພື່ອປະຊາທິປະໄຕ (WFD)

27/02/2019 00:00 -

(ສພຊ) ຕອນບ່າຍວັນສຸກ ທີ 22 ກຸມພາຜ່ານມາ ທີ່ສະພາແຫ່ງຊາດ (ສພຊ) ທ່ານ ນາງ ສວນສະຫວັນ ວິຍະເກດ ເລຂາທິການ ສພຊ ໄດ້ຕ້ອນຮັບ ທ່ານ ເດວິນ ໂອຊໍແນດຊີ (Devin O`Shuaghnessy) ຜູ້ອໍານວຍການໂຄງການ ຈາກອົງການມູນນິທິເວັດມິນສເຕີ ເພື່ອປະຊາທິປະໄຕ (WFD) ເນື່ອງໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ໃນລະຫວ່າງວັນທີ 20-24 ກຸມພາ 2019; ເພື່ອຮັບຟັງຄໍາຄິດເຫັນຈາກ ສພຊ ລາວ ກ່ຽວກັບການຊ່ວຍເຫລືອຈາກມູນນິທິເວັດສເຕີໃນໄລຍະຜ່ານມາຈົນເຖິງປັດຈຸບັນ ແລະ ປຶກສາຫາລືກັບເລຂາທິການ ສພຊ ກ່ຽວກັບບາດກ້າວຕໍ່ໄປຂອງການສະໜັບສະໜູນ ສພຊ ແລະ ສະພາປະຊາຊົນແຂວງ.

ທ່ານ ນາງ ສວນສະຫວັນ ວິຍະເກດ ໄດ້ສະແດງຄວາມຍິນດີຕ້ອນຮັບອັນອົບອຸ່ນຕໍ່ທ່ານ ເດວິນ ໂອຊໍແນດຊີ ທັງຕີລາຄາສູງຕໍ່ການເຂົ້າພົບປະໃນຄັ້ງນີ້ ແລະ ຂອບໃຈທີ່ມູນນິທິເວັດສເຕີ ທີ່ໄດ້ໃຫ້ການສະໜັບສະໜູນໂຄງການຊ່ວຍເຫລືອໃນໄລຍະຜ່ານມາຈົນເຖິງປັດຈຸບັນ. ທ່ານຍັງໄດ້ລາຍງານກ່ຽວກັບ ສພຊ ລາວ ໂດຍສັງເຂບ ພ້ອມທັງສະເໜີໃຫ້ມູນນິທິຈົ່ງສືບຕໍ່ສະໜັບສະໜູນ ນອກຈາກສອງກໍາມາທິການ (ກໍາມາທິການຍຸຕິທໍາ ແລະ ກໍາມາທິການກົດໝາຍ) ໃຫ້ເຂົ້າສູ່ລວງເລິກ ແລະ ຂໍໃຫ້ສະໜັບສະໜູນບັນດາກໍາມາທິການອື່ນໆ ໂດຍສະເພາະແມ່ນພາຍໃນຂົງເຂດ 3 ພາລະບົດບາດ ແລະ ໃຫ້ມີການປະເມີນຜົນຄືນ, ປະຊຸມຮ່ວມກັນລະຫວ່າງມູນນິທິກັບສອງກໍາມາທິການ. ນອກຈາກນັ້ນ ຕາງໜ້າກໍາມາທິການຍຸຕິທໍາ ແລະ ກໍາມາທິການກົດໝາຍໄດ້ມີຄໍາເຫັນຕໍ່ມູນນິທິ ທີ່ໄດ້ສະໜັບສະໜູນຜ່ານມາ ແລະ ສະເໜີໃຫ້ສືບຕໍ່ຊ່ວຍທຶນຮອນຍົກລະດັບວຽກງານແກ້ໄຂຄວາມຮ້ອງທຸກ ແລະ ວຽກງານການຕິດຕາມກວດກາໃຫ້ແກ່ກໍາມາທິການ ຕັ້ງແຕ່ສູນກາງຮອດທ້ອງຖິ່ນ, ສະເໜີໃຫ້ນໍາຊ່ຽວຊານມາປະກອບຄໍາເຫັນທາງດ້ານເນື້ອໃນການສ້າງນິຕິກໍາ.

ທ່ານ ເດວິນ ໂອຊໍແນດຊີ ກໍໄດ້ສະແດງຄວາມຂອບໃຈຕໍ່ທ່ານ ນາງ ສວນສະຫວັນວິຍະເກດ ພ້ອມດ້ວຍຄະນະ ທີ່ໄດ້ເສຍສະຫລະເວລາອັນມີຄຸນຄ່າໃຫ້ການຕ້ອນຮັບອັນອົບອຸ່ນ ແລະ ທັງຢືນຢັນວ່າຈະສືບຕໍ່ສົ່ງເສີມສະໜັບສະໜູນ ສພຊ ລາວ ແລະ ສະເໜີໃຫ້ການນໍາ ສພຊ ລາວ ໄປຢ້ຽມຢາມ ແລະ ພົບແລກປ່ຽນບົດຮຽນກັບລັດຖະສະພາອັງກິດ.

(ສອນສັກ ວັນວິໄຊ)