ຂະບວນການແຂ່ງຂັນກິລາມິດຕະພາບ ລະຫວ່າງ ສາມອົງການຈັດຕັ້ງມະຫາຊົນ ຂອງກໍາມາທິການວັດທະນະທໍາ-ສັງຄົມ ສະພາແຫ່ງຊາດ ກັບ ສະຖາບັນການທະນາຄານ

04/03/2019 00:00 -

(ສພຊ)ໃນຕອນແລງຂອງວັນທີ 19 ກຸມພາ 2019 ທີ່ເດີນກິລາ ສະຖາບັນການທະນາຄານ ໄດ້ມີຂະບວນການແຂ່ງຂັນກິລາມິດຕະພາບ (ບານເຕະ ແລະ ເປຕັງ) ລະຫວ່າງ ສາມອົງການຈັດຕັ້ງມະຫາຊົນຂອງກໍາມາທິການວັດທະນະທໍາ-ສັງຄົມ ສະພາແຫ່ງຊາດ ກັບ ສາມອົງການຈັດຕັ້ງມະຫາຊົນຂອງສະຖາບັນການທະນາຄານ ເພື່ອ​ເປັນການສ້າງຂະບວນການຂໍ່ານັບຊົມເຊີຍ ​ວັນສ້າງຕັ້ງກອງທັບປະຊາຊົນລາວ  ຄົບຮອບ 70 ປີ (20 ມັງກອນ 1949-20 ມັງກອນ 2019), ຂໍ່ານັບຮັບຕ້ອນ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 64 ປີ (22 ມີນາ 1955-22 ມີນາ 2019), ຂໍ່ານັບຊົມເຊີຍ ວັນສ້າງຕັ້ງກໍາມະບານລາວ ຄົບຮອບ 63 ປີ (1 ກຸມພາ 1956-1 ກຸມພາ 2019), ຂໍ່ານັບຮັບຕ້ອນ ວັນແມ່ຍີງສາກົນ ຄົບຮອບ 109 ປີ (8 ມີນາ 1910-8 ມີນາ 2019)  ທັງເປັນການພົບປະແລກປ່ຽນບົດຮຽນ ແລະ ຮັດແໜ້ນຄວາມສາມັກຄີຮັກແພງ ລະຫວ່າງ ກໍາມາທິການວັດທະນະທໍາ-ສັງຄົມ ສະພາແຫ່ງຊາດ ກັບ ສະຖາບັນການທະນາຄານ ໂດຍການເຂົ້າຮ່ວມຂອງທ່ານ ສົມພູ ດວງສະຫວັນ ກໍາມະການຄະນະປະຈໍາສະພາແຫ່ງຊາດ ປະທານກໍາມາທິການວັດທະນະທໍາ-ສັງຄົມ, ທ່ານນາງ  ດວງດີ ພິມວົງສາ ຫົວໜ້າສະຖາບັນການທະນາຄານ, ຄະນະນໍາ ແລະ ສະມາຊິກ ກໍາມະບານ, ຊາວໜຸ່ມ, ແມ່ຍິງ ແລະ ພະນັກງານ ຂອງທັງສອງພາກສ່ວນ.

 

ການແຂ່ງຂັນໄດ້ດໍາເນີນໄປດ້ວຍບັນຍາກາດທີ່ເບີກບານມ່ວນຊື່ນ, ຄວາມສາມັກຄີຮັກແພງ ແລະ ມີນໍ້າໃຈນັກກິລາ ເຊິ່ງກັນ ແລະ ກັນ ເພື່ອຮັດແໜ້ນຄວາມສໍາພັນຂອງທັງສອງພາກສ່ວນໃຫ້ແໜ້ນແຟນຍິ່ງຂຶ້ນ ແລະ ເພື່ອເຮັດໃຫ້ການພົວພັນຮ່ວມມືວຽກງານ ລະຫວ່າງ ສອງພາກສ່ວນ ມີຄວາມຄ່ອງຕົວ ແລະ ປະສົບຜົນສໍາເລັດ.