ສະພາແຫ່ງຊາດ ສະຫຼຸບວຽກງານ ປະຈຳປີ 2018

04/03/2019 00:00 -

ຄະນະເລຂາທິການສະພາແຫ່ງຊາດ ຮ່ວມກັບບັນດາອົງການຈັດຕັ້ງພາຍໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໄດ້ຈັດກອງປະຊຸມສະຫຼຸບວຽກງານປະຈໍາປີ 2018 ແລະ ວາງແຜນ ການປີ 2019 ໃນວັນທີ 28 ກຸມພານີ້ ທີ່ສະພາແຫ່ງຊາດ ໂດຍມີທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ, ທ່ານ ນາງ ສວນສະຫວັນ ວິຍະເກດ ຄະນະປະຈໍາສະພາແຫ່ງຊາດ ເລຂາທິການສະພາແຫ່ງຊາດ, ມີພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ສວນສະຫວັນ ວິຍະເກດ ກ່າວວ່າ: ກອງປະຊຸມຄັ້ງນີ້ ບັນດາຜູ້ເຂົ້າຮ່ວມ ຈະໄດ້ຮັບຟັງ ແລະ ປະກອບຄຳເຫັນໃສ່ບາງເນື້ອໃນຕົ້ນຕໍ ຄື: ບົດສະຫຼຸບການເຄື່ອນໄຫວວຽກງານ ປະຈໍາປີ 2018 ແລະ ທິດທາງແຜນການ ປະຈໍາປີ 2019 ຂອງຄະນະເລຂາທິການສະພາແຫ່ງຊາດ; ຮັບຟັງການໂອ້ລົມຂອງທ່ານ ຮອງປະທານສະພາແຫ່ງຊາດ, ຜູ້ຊີ້ນໍາຄະນະເລຂາທິການສະພາແຫ່ງຊາດ; ຮັບຟັງການເຜີຍແຜ່ນິຕິກໍາຈໍານວນໜຶ່ງ ທີ່ພົວພັນເຖິງການເຄື່ອນໄຫວວຽກງານຂອງຄະນະເລຂາທິການສະພາແຫ່ງຊາດ ແລະ ທ່ານຍັງໄດ້ຮຽກຮ້ອງໃຫ້ບັນດາຜູ້ເຂົ້າຮ່ວມຈົ່ງຍົກສູງຄວາມຮັບຜິດຊອບ ໃນການຄົ້ນຄວ້າ, ປະກອບຄໍາເຫັນໃສ່ເນື້ອໃນກອງປະຊຸມໃຫ້ແທດເໝາະກັບຄວາມເປັນຈິງ. 
ນອກຈາກນັ້ນ, ທ່ານ ສຸບັນ ສະວະບຸດ ຮອງເລຂາທິການສະພາແຫ່ງຊາດ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານປະຈໍາປີ 2018 ແລະ ຜ່ານທິດທາງແຜນການປີ 2019 ຊຶ່ງທ່ານ ໄດ້ຍົກໃຫ້ເຫັນ ດ້ານດີ,ດ້ານອ່ອນ, ຂໍ້ຂາດຕົກບົກຜ່ອງ ແລະ ບົດຮຽນທີ່ຖອດຖອນໄດ້, ດ້ວຍການຊີ້ນໍາ-ນໍາພາຢ່າງໃກ້ຊິດຂອງຄະນະປະຈໍາສະພາແຫ່ງຊາດ, ຄະນະພັກຮາກຖານ ແລະ ຄະນະເລຂາທິການສະພາແຫ່ງຊາດ ໄດ້ເອົາໃຈໃສ່ສຶກສາອົບຮົມການເມືອງ, ນໍາພາແນວຄິດພະນັກງານ-ລັດຖະກອນ ເວົ້າລວມ, ເວົ້າສະເພາະ ໃນຂອບເຂດການຊີ້ນໍາ-ນໍາພາຂອງຕົນ ດ້ວຍຫຼາຍຮູບການ ເປັນຕົ້ນ ແມ່ນຊຸກຍູ້ພະນັກງານ-ລັດຖະກອນ ເຂົ້າຮ່ວມເຊື່ອມຊຶມແນວທາງນະໂຍບາຍ,ບັນດາມະຕິ, ຄໍາສັ່ງ, ລັດຖະທໍາມະນູນ, ກົດໝາຍ, ຮັບຟັງປາຖະກະຖາ ເລົ່າມູນເຊື້ອວັນສໍາຄັນຂອງຊາດ ແລະ ອື່ນໆ. 
ສາເຫດທີ່ພາໃຫ້ການປະຕິບັດວຽກງານໄດ້ຮັບຜົນສໍາເລັດ ຍ້ອນໄດ້ຮັບການຊີ້ນໍາຢ່າງໃກ້ຊິດ ຈາກຄະນະພັກສະພາແຫ່ງຊາດ, ຄະນະປະຈໍາສະພາແຫ່ງຊາດ ໂດຍຄະນະເລຂາທິການສະພາແຫ່ງຊາດ ໄດ້ເປັນເຈົ້າການຜັນຂະຫຍາຍທິດທາງວຽກງານຢ່າງມີຈຸດສຸມ ແລະ ນໍາພາຈັດຕັ້ງປະຕິບັດດ້ວຍຄວາມຮັບຜິດຊອບສູງ; ກົງຈັກການຈັດຕັ້ງພາຍໃນ ສະພາແຫ່ງຊາດ ແລະ ພາກ ສ່ວນກ່ຽວຂ້ອງ ໄດ້ໃຫ້ການຮ່ວມມື, ຊ່ວຍເຫຼືອ ເພື່ອເຮັດໃຫ້ຄະນະເລຂາທິການສະພາແຫ່ງຊາດ ສາມາດປະຕິບັດວຽກງານຕ່າງໆ ໃຫ້ບັນລຸຕາມສິດ ແລະ ໜ້າທີ່ຂອງຕົນ; ໄດ້ປັບປຸງແບບແຜນວິທີເຮັດວຽກດີຂຶ້ນ ເປັນຕົ້ນ ການກໍານົດແຜນການລະອຽດ, ມີການປະ ຊຸມປຶກສາຫາລື, ຄົ້ນຄວ້າຮໍ່າຮຽນ, ຝຶກຝົນ, ບຸກບືນຫ້າວຫັນ ໃນການປະຕິບັດໜ້າທີ່ວຽກງານ ຕາມພາລະບົດບາດຂອງຕົນ ຕາມທີ່ໄດ້ກໍານົດໄວ້ໃນນິຕິກໍາທີ່ກ່ຽວຂ້ອງ, ປະຕິບັດກົດໝາຍວ່າດ້ວຍລັດຖະກອນ ແລະ ລະບຽບການຂອງຂັ້ນເທິງວາງອອກ.