ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງແຂວງໄຊຍະບູລີ.

06/03/2019 00:00 -

​(ສພຊ) ໃນລະຫວ່າງວັນທີ 14-21 ກຸມພາ 2019 ທ່ານ ພົຈ. ຄໍາສຸກ ວີອິນທະວົງ ປະທານກໍາມາທິການ ປ້ອງກັນຊາດ-ປ້ອງກັນຄວາມສະຫງົບ (ກປຊສ) ທັງເປັນສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງ, ທ່ານ ເພັກ ອ່ອນດາວົງ ສສຊ ປະຈຳເຂດເລືອກຕັ້ງ ແລະ ທ່ານ ຈັດຕະວາ ແກ້ວຄຳເພັດ ສສຊ ປະຈຳເຂດເລືອກຕັ້ງ ພ້ອມດ້ວຍຄະນະ ໄດ້ເຄື່ອນໄຫວເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ຢູ່ 6 ເມືອງ ແລະ 1 ກໍາລັງປະກອບອາວຸດ ຄື: ເມືອງໄຊຍະບູລີ, ເມືອງຄອບ, ເມືອງຊຽງຮ່ອນ, ເມືອງເງິນ, ເມືອງຫົງສາ, ເມືອງໄຊສະຖານ ແລະ ກອງບັນຊາການປ້ອງກັນຄວາມສະຫງົບແຂວງ ເຊິ່ງລວມມີ 19 ຈຸດ, 18 ກຸ່ມບ້ານພັດທະນາ ແລະ 25 ບ້ານ, ມີຜູ້ເຂົ້າຮ່ວມຮັບຟັງລວມທັງໝົດ 6.780 ຄົນ, ຍິງ 2.430 ຄົນ. 

ໃນການເຄື່ອນໄຫວເຜີຍແຜ່ຜົນສໍາເລັດຂອງກອງປະຊຸມດັ່ງກ່າວ, ບັນດາທ່ານ ສສຊ ໄດ້ນໍາເອົາບັນຫາທີ່ສໍາຄັນ ແລະ ພົ້ນເດັ່ນທີ່ກອງປະຊຸມໄດ້ພິຈາລະນາຮັບຮອງເອົາ ເປັນຕົ້ນແມ່ນພິຈາລະນາ ແລະ ຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2018 ແລະ ທິດທາງແຜນການ ປີ 2019, ພິຈາລະນາ ແລະ ຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ 9 ເດືອນ, ຄາດຄະເນປະຕິບັດໝົດປີ 2018 ແລະ ທິດທາງແຜນການ ປີ 2019, ພິຈາລະນາ ແລະ ຮັບຮອງເອົາບົດລາຍງານຂອງອົງການກວດສອບແຫ່ງລັດ ກ່ຽວກັບການເຄື່ອນໄຫວວຽກງານ ປະຈໍາປີ 2018 ແລະ ທິດທາງແຜນການ ປີ 2019; ບົດລາຍງານຜົນການກວດສອບບົດສະຫລຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປີ 2017 ແລະ ບົດລາຍງານຂອງອົງການກວດກາລັດຖະບານ ກ່ຽວກັບຜົນການກວດກາຕາມຜົນຂອງການກວດສອບ, ພິຈາລະນາ ແລະ ຮັບຮອງເອົາບົດລາຍງານຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ກ່ຽວກັບການເຄື່ອນໄຫວວຽກງານກາງສະໄໝ ຂອງແຜນການ 5 ປີ (2016-2020), ວຽກງານປະຈໍາປີ 2018 ແລະ ທິດທາງແຜນການຮອດ ປີ 2020, ແຜນວຽກຈຸດສຸມ ປີ 2019 ຂອງສະພາແຫ່ງຊາດ ຊຸດທີ VIII, ພິຈາລະນາ ແລະ ຮັບຮອງເອົາແຜນການສ້າງ ແລະ ປັບປຸງກົດໝາຍ ປະຈໍາປີ 2019,  ພິຈາລະນາ ແລະ ຮັບຮອງເອົາການຈັດຕັ້ງປະຕິບັດສິດ ແລະ ໜ້າທີ່ຕິດຕາມກວດກາໃນໄລຍະຜ່ານມາ ແລະ ແຜນການຕິດຕາມກວດກາ ປີ 2019 ຂອງສະພາແຫ່ງຊາດ; ພິຈາລະນາ ແລະ ຮັບຮອງເອົາການຊີ້ແຈງຂອງລັດຖະບານຕໍ່ຄໍາຊັກຖາມຂອງ ສສຊ ກ່ຽວກັບສະພາບການກໍ່ສ້າງ ແລະ ສ້ອມແປງຖະໜົນຫົນທາງ ໃນໄລຍະຜ່ານມາ ແລະ ທິດທາງແກ້ໄຂໃນຕໍ່ໜ້າ, ພິຈາລະນາ ແລະຮັບຮອງເອົາການຊີ້ແຈງຂອງລັດຖະບານຕໍ່ຄໍາຊັກຖາມຂອງສະມາຊິກສະພາແຫ່ງຊາດ ກ່ຽວກັບຄຸນນະພາບການບໍລິການການປິ່ນປົວໂຮງໝໍ, ສຸກສາລາ ແລະ ທິດທາງແກ້ໄຂໃນຕໍ່ໜ້າ,  ພິຈາລະນາ ແລະ ຮັບຮອງເອົາການຊີ້ແຈງຂອງອົງການໄອຍະການປະຊາຊົນສູງສຸດຕໍ່ຄໍາຊັກຖາມຂອງສະພາແຫ່ງຊາດ ກ່ຽວກັບການລະເມີດສັນຍາກູ້ຢືມທີ່ມີຫລັກຊັບຄໍ້າປະກັນແຕ່ນໍາມາດໍາເນີນເປັນຄະດີອາຍາ ໃນຂໍ້ຫາສໍ້ໂກງຊັບພົນລະເມືອງ, ພິຈາລະນາ ແລະ ຮັບຮອງເອົາການແຕ່ງຕັ້ງ ລັດຖະມົນຕີກະຊວງປ້ອງກັນຄວາມສະຫງົບ; ພິຈາລະນາ ແລະ ຮັບຮອງເອົາການແຕ່ງຕັ້ງຜູ້ວ່າການທະນາຄານ ແຫ່ງ ສປປລາວ  ພິຈາລະນາ ແລະ ຮັບຮອງເອົາຊົນເຜົ່າບຣູ; ພິຈາລະນາ ແລະ ຮັບຮອງເອົາການສ້າງ ແລະ ປັບປຸງກົດໝາຍ ຈໍານວນ 9 ສະບັບ.

          ການລົງເຄື່ອນໄຫວຄັ້ງນີ້, ເຮັດໃຫ້ປະຊາຊົນບັນດາເຜົ່າ, ບັນດາຈຸດຕ່າງໆທີ່ລົງພົບປະນັ້ນ ເຂົ້າໃຈແຈ້ງຂື້ນຕື່ມກ່ຽວກັບພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ ໃນການເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ;  ນອກນັ້ນ, ກໍຍັງໄດ້ເປີດໂອກາດໃຫ້ຜູ້ເຂົ້າຮ່ວມຮັບຟັງໄດ້ສະເໜີແລກປ່ຽນຄໍາຄິດເຫັນຕື່ມອີກ.

          ໃນໂອກາດດຽວກັນ, ຄະນະ ຍັງໄດ້ນໍາເອົາວັດຖຸປັດໄຈ ແລະ ເງິນຈໍານວນ 3 ລ້ານກີບ ແລະ ເຄື່ອງນຸ່ງຫົ່ມຈຳນວນໜຶ່ງ ມອບໃຫ້ແກ່ອໍານາດການປົກຄອງເມືອງຄອບ ເພື່ອນໍາໄປມອບໃຫ້ພໍ່ແມ່ປະຊາຊົນຜູ້ທີ່ຖືກຜົນກະທົບໄພທໍາມະຊາດຢູ່ພາຍໃນເມືອງດັ່ງກ່າວ ແລະ ໄດ້ມອບເຄື່ອງນຸ່ງຫົ່ມອີກຈຳນວນໜຶ່ງ ໃຫ້ປະຊາຊົນບ້ານໂຮມໄຊເໜືອ ເມືອງຊຽງຮ່ອນ  ເຊິ່ງລວມມູນຄ່າທັງໝົດ 8 ລ້ານກວ່າກີບ.

(ອິນທີ ຂຽວສີຟ້າ)