ກອງປະຊຸມຄົບຄະນະກຳມາທິການ ປກຊ-ປກສ ປະຈຳປີ 2018

06/03/2019 00:00 -

(ສພຊ) ໃນລະຫວ່າງວັນທີ 26-27 ກຸມພາ 2019 ຜ່ານມາ ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ສພຊ) ຫລັກ 6 ນະຄອນຫລວງວຽງຈັນ ກໍາມາທິການປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ສພຊ ໄດ້ຈັດກອງປະຊຸມຄົບຄະນະປະຈໍາປີ 2018 ໂດຍການເປັນປະທານຂອງ ທ່ານ ພົຈ. ຄໍາສຸກ ວີອິນທະວົງ ປະທານກໍາມາທິການ ປກສ-ປກຊ ສະພາແຫ່ງຊາດ; ເຂົ້າຮ່ວມໂດຍທ່ານ ພົທ. ແສງນວນ ໄຊຍະລາດ ຮອງປະທານ ສພຊ ຜູ້ຊີ້ນໍາວຽກງານ ປກຊ-ປກສ, ມີບັນດາປະທານ- ຮອງປະທານກຳມາທິການ ພາຍໃນສະພາແຫ່ງຊາດ, ບັນດາທ່ານ ກໍາມະການຂອງກໍາມາທິການ ປກຊ-ປກສ ຈາກ 18 ເຂດເລືອກຕັ້ງທົ່ວປະເທດ; ທ່ານ ຮອງລັດຖະມົນຕີກະຊວງ ປກຊ, ຮອງລັດຖະມົນຕີກະຊວງ ປກສ ຕະຫລອດຮອດແຂກ​ທີ່​ມີ​ກຽດເຂົ້າຮ່ວມ.

ທັງນີ້ ກໍເພື່ອເປັນການພິຈາລະນາ ປະກອບຄໍາເຫັນໃສ່ບົດສະຫລຸບບການເຄື່ອນໄຫວວຽກງານ ຂອງກຳມາທິການ ປກຊ -ປກສ ປະຈຳປີ 2018 ແລະ ແຜນການເຄື່ອນໄຫວປະຈຳປີ 2019 ແລະ ຄົ້ນຄວ້າປະກອບຄຳເຫັນໃສ່ຮ່າງມະຕິກອງປະຊຸມຄົບຄະນະຂອງກຳມາທິການ ປກຊ-ປກສ ປະຈຳປີ 2018.

ກອງປະຊຸມໄດ້ຮັບຟັງການຜ່ານບົດສະຫລຸບການເຄື່ອນໄຫວວຽກງານປະຈໍາປີ 2018 ແລະ ທິດທາງແຜນການປະຈໍາປີ 2019 ຈາກຮອງປະທານກໍາມາທິການ ປກຊ-ປກສ; ຮັບຟັງການປະກອບຄໍາເຫັນຈາກຜູ້ຕາງໜ້າກະຊວງ ປກຊ, ກະຊວງ ປກສ, ຜູ້ຕາງໜ້າຈາກເຂດເລືອກຕັ້ງທີ 4, 5, 13, 17 ແລະ ຈາກຜູ້ແທນເຂົ້າຮ່ວມກອງປະຊຸມ ແລະ ຮັບຟັງການໂອ້ລົມ ແລະ ການໃຫ້ທິດຊີ້ນຳຂອງຮອງປະທານຄະນະປະຈຳສະພາແຫ່ງຊາດ ຕໍ່ການເຄື່ອນໄຫວວຽກງານຂອງກຳມະການ, ກຳມາທິການໃນປີ 2019 ຕໍ່ໜ້າ.

          ໃນພິທີອັດກອງປະຊຸມ, ທ່ານປະທານກໍາມາທິການ ປກຊ-ປກສ ໄດ້ມີຄໍາເຫັນວ່າ:  ພາຍຫລັງທີ່ໄດ້ຮັບຟັງການສະເໜີ​ບົດສະຫລຸບການເຄື່ອນໄຫວ ແລະ ການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງກຳມາທິການ ປກຊ-ປກສ ປະຈຳປີ 2018, ແຜນການ ປະຈຳປີ 2019 ແລະ ການສະເໜີບັນຫາຕ່າງໆ, ບັນດາຜູ້ແທນກອງປະຊຸມ ແລະ ກຳມະການຂອງກຳມາທິການ ແມ່ນໄດ້ພ້ອມກັນປະກອບຄຳຄິດ-ຄຳເຫັນ, ເປັນເຈົ້າການເສີມຂະຫຍາຍສິດ​ປະຊາທິປະ​ໄຕ, ຍົກສູງຄວາມຮັບຜິດຊອບຂອງຕົນໃນຖານະທີ່ເປັນຕົວແທນແຫ່ງສິດຜົນປະໂຫຍດອັນຊອບທຳຂອງປະຊາຊົນລາວບັນດາເຜົ່າ ໃນການປະກອບຄຳຄິດ-ຄຳເຫັນໃສ່ຫລາຍບັນຫາດ້ວຍຄວາມຫ້າວຫັນ, ມີ​ລັກສະນະ​ສ້າງສັນບົນພື້ນຖານຄວາມເຂົ້າໃຈເປັນເອກະພາບ ແລະ ຖືກກັບສະພາບຄວາມເປັນຈິງ, ຂອງກົມກອງ-ທ້ອງຖິ່ນກ່ຽວກັບສະພາບທີ່ເກີດຂຶ້ນໃນປັດຈຸບັນ. ທັງນີ້, ກໍເພື່ອເຮັດໃຫ້ກອງປະຊຸມເຫັນໄດ້ບັນຫາ ແລະ ສິ່ງທ້າທາຍ ເພື່ອພ້ອມກັນຊອກຫາວິທີແກ້ໄຂຢ່າງຖືກຕ້ອງເໝາະສົມ ແລະ ອັນສຳຄັນກົມ ປກຊ, ກົມ ປກສ ວິຊາການ ໜ່ວຍງານປ້ອງກັນ ໜ່ວຍງານບໍລິຫານຮັບໃຊ້ ໄດ້ມີການກະກຽມທີ່ດີ, ຮັບປະກັນໃຫ້ກອງປະຊຸມຄົບຄະນະເທື່ອນີ້ສຳເລັດລົງດ້ວຍດີ.  ຮຽກຮ້ອງໃຫ້ບັນດາທ່ານສະມາຊິກສະພາແຫ່ງຊາດ ທີ່ເປັນກຳມະການຂອງກຳມາທິການ ທ່ານຜູ້ແທນ ຈົ່ງນຳເອົາເນື້ອໃນຈິດໃຈຂອງກອງປະຊຸມຄັ້ງນີ້ ໄປຈັດຕັ້ງປະຕິບັດ ແລະ ຜັນຂະຫຍາຍຢູ່ໃນເຂດເລືອກຕັ້ງ ແລະ ກົມກອງຂອງຕົນໃຫ້ໄດ້ຮັບໝາກຜົນສູງສຸດ. ພ້ອມກັນນີ້, ກໍຂໍໃຫ້ເອົາໃຈໃສ່ໃນການປະສານສົມທົບລະຫວ່າງ ກຳມາທິການ ປກຊ-ປກສ ກັບບັນດາທ່ານທີ່ເປັນກຳມະການຂອງກຳມາທິການ ທີ່ປະຈຳຢູ່ບັນ​ດາເຂດເລືອກຕັ້ງ ກໍຄືຂະແໜງການທີ່ກ່ຽວຂ້ອງໃຫ້ສາມາດປະຕິບັດໄດ້ ແລະ ຄ່ອງຕົວ, ທີ່​ໄດ້​ເປັນ​ເອກະ​ພາບ​ກັນທິດ​ທາງ​ໃນ​ການ​ປະຕິບັດ ​ແລ​ະ ຊ່ວຍ​ເຝິກ​ອົບຮົມ ຍົກ​ສູງ​ຄວາມ​ຮູ້ ​ໃຫ້​ກຳມະການ ປກຊ-ປກສ ສະພາ​ປະຊາຊົນ​ຂັ້ນ​ແຂວງ ໃນຫົວ​ຂໍ້​ທີ່​ເໝາະ​ສົມ.

(ສອນສັກ ວັນວິໄຊ)