ກອງປະຊຸມສຳມະນາວຽກງານຕິດຕາມກວດກາຜູ້ພິພາກສາ

12/03/2019 00:00 -

(ສພຊ) ລະຫວ່າງວັນທີ 6-7 ມີນາ 2019 ທີ່ເມືອງແກ້ວອຸດົມ ແຂວງວຽງຈັນ ກໍາມາທິການຍຸຕິທຳ (ກມຍທ) ສະພາແຫ່ງຊາດ ໄດ້ຈັດກອງປະຊຸມສຳມະນາກ່ຽວກັບວຽກງານການຕິດຕາມກວດກາຜູ້ພິພາກສາ ໂດຍໄດ້ຮັບການສະໜັບສະໜູນຈາກມູນນິທິເວສມິນສເຕີ  ເພື່ອປະຊາທິປະໄຕ (WFD) ໂດຍການເປັນປະທານຂອງທ່ານ ນາງ ບົວຄຳ ທິບພະວົງ ປະທານກໍາມາທິການຍຸຕິທໍາ ສະພາແຫ່ງຊາດ; ເຂົ້າຮ່ວມມີຮອງປະທານກຳມາທິການ, ຜູ້ຊ່ຽວຊານຈາກປະເທດອິນໂດເນເຊຍ, ຮອງຫົວໜ້າອົງການໄອຍະການປະຊາຊົນສູງສຸດ, ຮອງປະທານສານປະຊາຊົນສູງສຸດ, ຮອງປະທານອົງການກວດກາລັດຖະບານ, ປະທານ-ຮອງປະທານສານປະຊາຊົນແຂວງວຽງຈັນ, ປະທານ-ຮອງປະທານຄະນະກຳມະການຍຸຕິທຳ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງວຽງຈັນ ແລະ ແຂວງບໍລິຄຳໄຊ, ຫົວໜ້າ-ຮອງຫົວໜ້າກົມຈັດຕັ້ງສານປະຊາຊົນ ແລະ ພະນັກງານລັດຖະກອນທີ່ກ່ຽວຂ້ອງ.

          ທັງນີ້, ເພື່ອຮັບປະກັນໃຫ້ແກ່ການເຄື່ອນໄຫວຕິດຕາມກວດກາຂອງ ກມຍທ ຂອງສະພາແຫ່ງຊາດ ໂດຍສະເພາະແມ່ນການຕິດຕາມກວດກາ ແລະ ຄົ້ນຄວ້າການບັນຈຸຊັບຊ້ອນ, ຍົກຍ້າຍ, ແຕ່ງຕັ້ງ, ປະຕິບັດລະບຽບວິໄນ ແລະ ປົດຕຳແໜ່ງ ຜູ້ພິພາກສາຂອງສານປະຊາຊົນແຕ່ລະຂັ້ນ ໃຫ້ຖືກຕ້ອງຕາມກົດໝາຍທີ່ໄດ້ກຳນົດໄວ້ໃນກອງປະຊຸມສະພາແຫ່ງຊາດ ໃຫ້ມີຄວາມວ່ອງໄວ ແລະ ຮັບປະກັນຄຸນນະພາບດີຂຶ້ນ.

          ໃນກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງບົດຮຽນກ່ຽວກັບຜູ້ພິພາກສາຂອງກຳມະການວຽກງານຕຸລາການຂອງປະເທດອິນໂດເນເຊຍ; ການນຳສະເໜີຄະນະປະຈຳສະພາແຫ່ງຊາດພິຈາລະນາບັນຈຸຊັບຊ້ອນ, ຍົກຍ້າຍ, ແຕ່ງຕັ້ງ, ລົງວິໄນ ແລະ ປົດຕຳແໜ່ງຜູ້ພິພາກສາ ຂອງ ກມຍທ ສະພາແຫ່ງຊາດ ແລະ ສະພາປະຊາຊົນແຂວງ; ກົນໄກ ແລະ ວິທີການໃນການຕິດຕາມກວດກາຜູ້ພິພາກສາຂອງສານແຕ່ລະຂັ້ນຂອງ ກມຍທ ສະພາແຫ່ງຊາດ ແລະ ສະພາປະຊາຊົນແຂວງ ຕາມກົດໝາຍ ແລະ ມະຕິຂອງສະພາແຫ່ງຊາດ; ພ້ອມທັງປະກອບຄຳຄິດຄຳເຫັນຢ່າງກົງໄປກົງມາ, ມີລັກສະນະສ້າງສັນ ແລະ ເປັນຮູບປະທຳຕໍ່ບົດຮຽນທີ່ນຳມາສຳມະນາໃນຄັ້ງນີ້.

          ໃນກອງປະຊຸມ, ທ່ານ ນາງ ບົວຄຳ ທິບພະວົງ ໄດ້ມີຄໍາເຫັນວ່າ: ເນື້ອໃນກອງປະຊຸມສຳມະນາແລກປ່ຽນບົດຮຽນໃນຄັ້ງນີ້ ແມ່ນມີຄວາມໝາຍຄວາມສຳຄັນ ເພື່ອຮັບໃຊ້ເຂົ້າໃນວຽກງານພາຍໃນຂອງ ກມຍທ ແລະ ອົງການຕຸລາການ ແລະ ການຈັດຕັ້ງປະຕິບັດວຽກງານໃນຂົງເຂດຍຸຕິທຳໃຫ້ຖືກຕ້ອງຕາມທີ່ກົດໝາຍກຳນົດໄວ້ ພ້ອມທັງຈະຊ່ວຍໃຫ້ບັນດາພາກສ່ວນທີ່ກ່ຽວຂ້ອງມີຄວາມເຂົ້າໃຈ ແລະ ເປັນເອກະພາບຕໍ່ວຽກງານໃນການຕິດຕາມກວດກາຜູ້ພິພາກສາຂອງ ກມຍທ ສະພາແຫ່ງຊາດ ແລະ ບັນດາພາກສ່ວນທີ່ກ່ຽວຂ້ອງໃຫ້ກວ້າງຂວາງ ໂດຍສະເພາະວຽກງານຕິດຕາມກວດກາຜູ້ພິພາກສາໃຫ້ຖືກຕ້ອງ ແລະ ສອດຄ່ອງກັບພາລະບົດບາດ ແລະ ໜ້າທີ່ ຂອງພາກສ່ວນກ່ຽວຂ້ອງບົນພື້ນຖານທີ່ກົດໝາຍກຳນົດໄວ້.

(ນ. ອາລິນ ສຸພິມມະປະດິດ)