ຄະນະຜູ້ແທນ ສພຊ ສໍາເລັດການເຂົ້າຮ່ວມກອງປະຊຸມທີ່ ສສ.ຫວຽດນາມ

21/03/2019 00:00 -

(ສພຊ) ໃນລະຫວ່າງວັນທີ 26-28 ກຸມພາ 2019 ຄະນະຜູ້ແທນສະພາແຫ່ງຊາດ (ສພຊ) ນໍາໂດຍ ທ່ານ ນາງ ພອນເພັດ ບຸບຜາ ຮອງປະທານກຳມາທິການວັດທະນະທໍາ-ສັງຄົມ ທັງເປັນຮອງປະທານຄະນະສະມັດຊາລັດຖະສະພາຝຣັ່ງໂກໂຟນີ ຂອງ ສພຊ ລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມກຳມາທິການການສຶກສາ, ການສື່ສານ ແລະ ວັດທະນາທຳ ແລະ ກອງປະຊຸມເຄືອຂ່າຍສະມາຊິກລັດຖະສະພາເພດຍິງທີ່ໃຊ້ພາສາຝຣັ່ງ ຂອງສະມັດຊາລັດຖະສະພາຝຣັ່ງໂກໂຟນີ ທີ່ຮ່າໂນ່ຍ ສສ.ຫວຽດນາມ ເຂົ້າຮ່ວມກອງປະຊຸມ ຍັງມີຄະນະຜູ້ແທນທີ່ມາຈາກບັນດາປະເທດສະມາຊິກຂອງສະມັດຊາລັດຖະສະພາຝຣັ່ງໂກໂຟນີ (APF) ຈໍານວນ 21 ປະເທດ ແລະ 3 ອົງການຈັດຕັ້ງສາກົນຄື: ອົງການ OIF, UN ແລະ UNICEF ເຊິ່ງມີຜູ້ເຂົ້າຮ່ວມທັງໝົດ 70 ທ່ານ.

          ໃນພິທີ, ທ່ານ ນາງ ຫວງຽນ ທິ ກີມ ເງີນ ປະທານສະພາແຫ່ງຊາດ ແຫ່ງ ສສ ຫວຽດນາມ ໄດ້ໃຫ້ກຽດເຂົ້າຮ່ວມ ແລະ ມີຄໍາເຫັນ ໂດຍກ່າວເຖິງຄວາມສໍາຄັນຂອງລັດຖະສະພາຝຣັ່ງໂກໂຟນີ ຕໍ່ການຊຸກຍູ້ໃຫ້ລັດຖະບານໄດ້ກ້າວໄປຂ້າງໜ້າພາຍຫລັງທີ່ໄດ້ສ້າງຕັ້ງ ແລະ ພັດທະນາອົງການ APF ມາໄດ້ 50 ປີ ທີ່ມີສະມາຊິກ 87 ປະເທດ ແລະ ເນັ້ນໜັກເຖິງການຮ່ວມມືກັບປະເທດສະມາຊິກຂອງສະມັດຊາລັດຖະສະພາຝຣັ່ງໂກໂຟນີ ໃນຂົງເຂດວັດທະນະທໍາ-ສັງຄົມ ແລະ ເຄື່ອຂ່າຍສະມາຊິກລັດຖະສະພາເພດຍິງ ທີ່ໃຊ້ພາສາຝຣັ່ງເພື່ອແກ້ໄຂບັນຫາ ເຊິ່ງຕິດພັນກັບເປົ້າໝາຍການພັດທະນາແບບຍືນຍົງ.

ໃນກອງປະຊຸມຄັ້ງ​ນີ້, ຄະນະຜູ້ແທນໄດ້ປະກອບສ່ວນມີຄໍາເຫັນ, ປຶກສາຫາລື ແລະພິຈາລະນາຫລາຍບັນຫາທີ່ພົ້ນເດັ່ນໃນພາກພື້ນ ແລະ ສາກົນ ເປັນຕົ້ນແມ່ນການສຶກສາໃນບັນດາປະເທດທີ່ໃຊ້ພາສາຝຣັ່ງ ເພື່ອຮັບປະກັນການສຶກສາໃຫ້ມີຄຸນນະພາບ, ເທົ່າທຽມກັນ ແລະ ທົ່ວເຖິງ ແລະ ສົ່ງເສີມກາລະໂອກາດໃນການຮຽນຮູ້ຕະຫລອດຊີວິດສຳລັບຫມົດທຸກຄົນ; ການສົ່ງເສີມຄວາມຫລາກຫລາຍທາງດ້ານວັດທະນະທຳ, ບັນລຸຄວາມສະເໝີພາບລະ ຫວ່າງຍິງ-ຊາຍ ເພື່ອເສີມສ້າງພາລະບົດບາດ, ສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ເດັກຍິງ, ສົ່ງເສີມການແລກປ່ຽນປະສົບການ ຄວາມສາມັກຄີລະຫວ່າງແມ່ຍິງ ແລະ ການປະ ກອບສ່ວນໃນການປົກປ້ອງສິດທິຂອງແມ່ຍິງ ແລະ ເດັກໃນເວທີສະມັດຊາລັດຖະສະພາ ຝຣັ່ງໂກໂຟນີ ແລະ ອົງການຈັດຕັ້ງສາກົນ; ການມີວຽກເຮັດງານທຳທີ່ມີປະສິດທິຜົນ, ເຕັມສ່ວນ ແລະ ວຽກງານທີ່ມີກຽດສຳລັບຫມົດທຸກຄົນໃນສັງຄົມ; ນອກນີ້, ກອງປະຊຸມຍັງຮຽກຮ້ອງໃຫ້ບັນດາປະເທດສະມາຊິກເຜີຍແຜ່ ແລະ ໂຄສະນາສື່ຕ່າງໆທີ່ເປັນພາສາຝຣັ່ງໃຫ້ຫລາຍຂື້ນ, ສົ່ງເສີມຄວາມສະເໝີພາບຍິງ-ຊາຍໃນເວທີສະມັດຊາລັດຖະສະພາຝຣັ່ງໂກໂຟນີ ແລະ ອົງການຈັດຕັ້ງສາກົນ ເພື່ອເສີມສ້າງພາລະບົດບາດ ແລະ ຄວາມເຂັ້ມແຂງໃຫ້ແກ່ແມ່ຍິງໃຫ້ມີຄວາມເທົ່າທຽມກັນຢ່າງເຕັມສ່ວນ ໃນການເຄື່ອນໄຫວປະຕິບັດໜ້າທີ່ ແລະຮຽກຮ້ອງໃຫ້ບັນດາປະເທດສະມາຊິກຊຸກຍູ້ລັດຖະບານຂອງຕົນສ້າງກົນໄກໃນການເກັບກໍາການລົງທະບຽນການເກີດຂອງເດັກນ້ອຍຢ່າງເປັນລະບົບ ແລະ ບໍ່ເສຍຄ່າບໍລິການ ແລະບັນຫາອື່ນໆ; ນອກນີ້, ກອງປະຊຸມຍັງໄດ້ຮັບຮອງເອົາຖະແຫລງການ 3 ສະບັບ ແລະ ບົດລາຍງານການເຄື່ອນໄຫວຂອງກຳມາທິການການສຶກສາ, ການສື່ສານ ແລະ ວັດທະນາທຳ ແລະ ເຄືອຂ່າຍສະມາຊິກລັດຖະສະພາເພດຍິງທີ່ໃຊ້ພາສາຝຣັ່ງ ຂອງສະມັດຊາລັດຖະສະພາ ຝຣັ່ງໂກໂຟນີ 2 ສະບັບ.