ສະຫຼຸບວຽກງານ ໂຄງການກໍ່ສ້າງຫໍສະພາແຫ່ງ ປະຈຳໄຕມາດ 1

21/03/2019 00:00 -

(ສພຊ) ວັນສຸກທີ 15 ມີນາ 2019 ທີ່ສະພາແຫ່ງຊາດ, ໄດ້ມີກອງປະຊຸມສະຫລຸບວຽກງານໂຄງການກໍ່ສ້າງຫໍສະພາແຫ່ງຊາດ ປະຈໍາໄຕມາດທີ 1 ໂດຍການເຂົ້າຮ່ວມຂອງທ່ານ ນາງ ສວນສະຫວັນ ວິຍະເກດ ຄະນະປະຈໍາສະພາແຫ່ງຊາດ, ເລຂາທິການສະພາແຫ່ງຊາດ; ມີບັນດາທ່ານຄະນະຄຸ້ມຄອງໂຄງການສອງຝ່າຍລາວ ແລະ ຫວຽດນາມ, ຕາງໜ້າຈາກບັນດາບໍລິສັດທີ່ປຶກສາທັງລາວ ແລະ ຫວຽດນາມ, ຜູ້ຮັບເໝົາກໍ່ສ້າງ, ແມ່ທັບນ້ອຍ 11, ກະຊວງປ້ອງກັນປະເທດ ສສ.ຫວຽດນາມ ແລະ ພາກສ່ວນທີ່ກ່ຽວຂ້ອງ.

          ທັງນີ້, ກໍເພື່ອສະຫລຸບຕີລາຄາຄວາມຄືບໜ້າໃນການຈັດຕັ້ງປະຕິບັດໂຄງການໄລຍະ 3 ເດືອນຕົ້ນປີ 2019 ຜ່ານມາ; ເພື່ອເປັນບ່ອນອີງໃນການລາຍງານຄະນະປະຈໍາສະພາແຫ່ງຊາດ ມີທິດຊີ້ນໍາໃນການຈັດຕັ້ງປະຕິບັດແຕ່ລະໄຕມາດ ແລະ ເພື່ອຊອກວິທີການແກ້ໄຂບັນຫາຮ່ວມກັນທີ່ສອງຝ່າຍສາມາດຈັດຕັ້ງປະຕິບັດໄດ້, ຂໍ້ຫຍຸ້ງຍາກ ແລະ ຄ້າງຄາ; ຈາກນັ້ນ, ຈຶ່ງຈະໄດ້ພ້ອມກັນສືບຕໍ່ວາງແຜນການຈັດຕັ້ງປະຕິບັດໄຕມາດຕໍ່ໄປໃຫ້ມີປະສິດທິຜົນ ແນໃສ່ໃຫ້ແຕ່ລະຝ່າຍເອົາໃຈໃສ່ໃນການຕິດຕາມ, ກວດກາ ແລະ ຊຸກຍູ້ວຽກງານໂຄງການ ໃຫ້ສໍາເລັດໃນທ້າຍປີ 2020 ຕາມແຜນທີ່ວາງໄວ້.

          ກອງປະຊຸມໄດ້ຮັບຟັງການລາຍງານ ແລະ ປຶກສາຫລືຫລາຍບັນຫາ ດັ່ງນີ້: ລາຍງານສັງເຂບ ສະພາບການຈັດຕັ້ງປະຕິບັດ ປະຈໍາໄຕມາດທີ 1 ປີ 2019 ຂອງຄະນະຮັບຜິດຊອບໂຄງການຝ່າຍ ລາວ ແລະ ຝ່າຍຫວຽດນາມ; ລາຍງານກ່ຽວກັບການຈັດຕັ້ງປະຕິບັດການອອກແບບຂອງບໍລິສັດ ອັກຄີ ເນຍ ແລະ ບໍລິສັດອອກແບບ VNCC; ລາຍງານກ່ຽວກັບການຈັດຕັ້ງປະຕິບັດວຽກຄຸມພາກສະ ໜາມຂອງບໍລິສັດທີ່ປຶກສາຍີ່ປຸ່ນ OCG ແລະ ບໍລິສັດທີ່ປຶກສາຍີ່ປຸ່ນ IBST; ລາຍງານກ່ຽວກັບ ການຈັດຕັ້ງປະຕິບັດວຽກງານຢູ່ພາກສະໜາມກໍ່ສ້າງ ແລະ ວຽກງານອື່ນໆທີ່ຕິດພັນ ແລະ ປິ່ນອ້ອມ ໃນການກໍ່ສ້າງ ໂດຍແມ່ທັບນ້ອຍ 11; ພ້ອມກັນກໍໄດ້ປຶກສາຫາລື ແລະ ແລກປ່ຽນຄໍາຄິດຄໍາເຫັນໃນບັນຫາຕ່າງໆຮ່ວມກັນ.

(ສົມນຶກ ແກ້ວໄຊຍະຈັກ)