ສ້າງຄວາມເຂັ້ມແຂງໃຫ້ພະນັກງານ-ລັດຖະກອນ ກົມການເງິນ ຂອງ ສພຊ

21/03/2019 00:00 -

(ສພຊ) ລະຫວ່າງວັນທີ 15-17 ມີນາ 2019 ທີ່ຫ້ອງປະຊຸມສະໂມສອນໄຟຟ້ານໍ້າງື່ມ I ເມືອງແກ້ວອຸດົມ ແຂວງວຽງຈັນ, ກົມການເງິນ ຄະນະເລຂາທິການສະພາແຫ່ງຊາດ ໄດ້ຈັດກອງປະຊຸມເຝິກອົບຮົມສ້າງຄວາມເຂັ້ມແຂງວຽກງານການເງິນໃຫ້ພະນັກງານ-ລັດຖະກອນກົມການເງິນ ແລະ ກົມກ່ຽວຂ້ອງພາຍໃນສະພາແຫ່ງຊາດ (ສພຊ)​ ໂດຍການເປັນປະທານຂອງທ່ານ ສຸບັນ ສະວະບຸດ ຮອງເລຂາທິການສະພາແຫ່ງຊາດ ທັງເປັນຜູ້ຊີ້ນຳວຽກງານການເງິນ; ເຂົ້າຮ່ວມມີທ່ານ ນາງ ດາວເພັດ ສີຫາວົງ ວ່າການຫົວໜ້າກົມການເງິນ, ມີຫົວໜ້າກົມເລຂານຸການ, ວິທະຍາກອນຈາກກົມສຳເນົາເອກະສານແຫ່ງຊາດ, ບັນດາຫົວໜ້າ-ຮອງຫົວໜ້າພະແນກ ແລະ ພະນັກງານ-ລັດຖະກອນຈາກກົມທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງການສະເໜີເອກະສານກ່ຽວກັບການສ້າງແຜນເຄື່ອນໄຫວຂອງກົມ, ວິທີການບັນທຶກກອງປະຊຸມ, ການຮ່າງບົດສະຫລຸບ ແລະ ການສ້າງບົດລາຍງານ; ຫລັກການ, ລະບຽບການເກັບມ້ຽນ ແລະ ເກັບສຳເນົາເອກະສານທີ່ຖືກຕ້ອງ; ພ້ອມນັ້ນ, ໄດ້ຮັບຟັງການເຜີຍແຜ່ເອກະສານຄຳແນະນຳກ່ຽວກັບການຈັດຕັ້ງປະຕິບັດແຜນງົບປະມານລາຍຈ່າຍແຫ່ງລັດປະຈຳປີ 2019 ສະບັບເລກທີ 0018/ກງ, ລົງວັນທີ 3 ມັງກອນ 2019, ເອກະສານຄຳແນະນໍາກ່ຽວກັບການຈັດຕັ້ງປະຕິບັດການເບີກຈ່າຍເງິນເດືອນ, ອຸດໜູນ ແລະ ເງິນນະໂຍບາຍພະນັກງານ-ລັດຖະກອນຜ່ານລະບົບທະນາຄານ ສະບັບເລກທີ 3143/ກງ, ລົງວັນທີ 4 ຕຸລາ 2018; ຈາກນັ້ນ, ບັນດາຜູ້ເຂົ້່າຮ່ວມກອງປະຊຸມໄດ້ແລກປ່ຽນຄຳຄິດຄຳເຫັນເຊິ່ງກັນ ແລະ ກັນຢ່າງກົງໄປກົງມາ ເຊິ່ງໄດ້ຍົກໃຫ້ເຫັນເຖິງບັນຫາຕ່າງໆ ເພື່ອເປັນການຖອດຖອນ ແລະ  ແລກປ່ຽນບົດຮຽນກັບວິທະຍາກອນ ແນໃສ່ເປັນການປັບປຸງແກ້ໄຂວຽກງານຕ່າງໆ ເປັນຕົ້ນແມ່ນການສ້າງແຜນເຄື່ອນໄຫວ, ການຮ່າງບົດສະຫລຸບ ແລະ ການສ້າງບົດລາຍງານ ແລະ ອື່ນໆດ້ວຍບັນຍາກາດຟົດຟື້ນ ແລະ ມີເນື້ອໃນທີ່ອຸດົມສົມບູນຄົບຖ້ວນ.

ໂອກາດດັ່ງກ່າວ, ປະທານກອງປະຊຸມໄດ້ຮຽກຮ້ອງໃຫ້ສຳມະນາກອນ ຈົ່ງນຳເອົາບົດຮຽນທີ່ໄດ້ເຝິກອົບຮົມໃນຄັ້ງນີ້ ໄປຈັດຕັ້ງຜັນຂະຫຍາຍເຂົ້າໃນວຽກງານຕົວຈິງໃຫ້ເກີດດອກອອກຜົນ ແລະ ມີປະສິດທິພາບສູງຍິ່ງຂຶ້ນ; ພ້ອມນັ້ນ, ຍັງໄດ້ເນັ້ນໜັກໃຫ້ພະນັກງານ-ລັດຖະກອນເອົາໃຈໃສ່ໃນການຄົ້ນຄວ້າສຶກສາຮ່ຳຮຽນ, ຊອກຫາຊ່ອງທາງໃນການພັດທະນາຕົນເອງໃຫ້ສາມາດເປັນຜູ້ທີ່ມີຄວາມຮູ້ຄວາມສາມາດໃນອະນາຄົດ.

 (ນາງ ກົງໃຈ ແສງອຳພັນ)