ຮອງປະທານກຳມາທິການວັດທະນະທຳ-ສັງຄົມ ພົບປະປະຊາຊົນ ແຂວງຫົວພັນ.

02/04/2019 00:00 -

(ສພຊ) ເພື່ອປະຕິບັດຕາມພາລະບົດບາດ, ສິດ ແລະ ໜ້າທີ່ຂອງສະມາຊິກສະພາແຫ່ງຊາດທີ່ໄດ້ກຳນົດໃນກົດໝາຍວ່າດ້ວຍສະພາແຫ່ງຊາດ, ໃນລະຫວ່າງວັນທີ 09-18 ມີນາ 2019 ທີ່ຜ່ານມານີ້, ທ່ານ ນ. ມະນີວັນ ເຢຽປາວເຮີ ຮອງປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8 ແຂວງຫົວພັນ ພ້ອມດ້ວຍຄະນະ, ໄດ້ເຄື່ອນໄຫວພົບປະປະຊາຊົນ ແລະ ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ແລະ ຜົນສຳເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ (ສພຂ) ຫົວພັນ ຊຸດທີ I ຢູ່ 02 ເມືອງ ຄື: ເມືອງຊຳໃຕ້ ແລະ ເມືອງກວັນ, ລວມມີ 04 ກຸ່ມບ້ານ, ກວມເອົາ 18 ບ້ານ: ກຸ່ມບ້ານວຽງພັນ, ກຸ່ມບ້ານຊຽງດີ, ກຸ່ມບ້ານເມືອງນາ ແລະ ເທດສະບານເມືອງກວັນ, ມີອໍານາດການປົກຄອງບ້ານ ແລະ ພໍ່ແມ່ປະຊາຊົນບັນດາເຜົ່າເຂົ້າຮ່ວມຮັບຟັງທັງໝົດ 892 ຄົນ, ຍິງ 461 ຄົນ.

          ໃນການໄປເຄື່ອນໄຫວພົບປະປະຊາຊົນ ກໍຄືຜູ້ມີສິດເລືອກຕັ້ງໃນຄັ້ງນີ້ ຄະນະໄດ້ແມ່ນຮັບຟັງການລາຍງານສະພາບການພັດທະນາເສດຖະກິດ-ສັງຄົມຂອງບັນດາກຸ່ມບ້ານໂດຍຫຍໍ້, ຈາກນັ້ນ ກໍໄດ້ເຜີຍແຜ່ພາລະບົດບາດ, ສິດ ແລະ ໜ້າທີ່ຂອງສະພາແຫ່ງຊາດຂອງສະພາແຫ່ງຊາດ,  ຜົນສຳເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ແລະ ຜົນສຳເລັດກອງປະຊຸມສະໄໝສາມັນເທື່ອທີ 6 ສະພາປະຊາຊົນແຂວງ (ສພຂ) ຫົວພັນ ຊຸດທີ I ເປັນຕົ້ນ: ບັນດາມະຕິຂອງກອງປະຊຸມສະພາແຫ່ງຊາດວ່າດ້ວຍການຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປີ 2018 ແລະ ທິດທາງແຜນພັດທະນາເສດຖະກິດ-ສັງຄົມ ປີ 2019, ມະຕິຂອງກອງປະຊຸມສະພາແຫ່ງຊາດວ່າດ້ວຍການຮັບຮອງເອົາບົດລາຍງານຂອງລັດຖະບານກ່ຽວກັບການສະພາບການຈັດຕັ້ງປະຕິບັດແຜນງົບປະມານ 9 ເດືອນຜ່ານມາ, ຄາດຄະເນປະຕິບັດໝົດປີ 2018 ແລະ ແຜນການປະຈຳປີ 2019, ມະຕິຂອງກອງປະຊຸມສະພາແຫ່ງຊາດວ່າດ້ວຍການຮັບຮອງບົດລາຍງານການເຄື່ອນໄຫວວຽກງານກວດສອບປະຈໍາປີ 2018 ແລະ ແຜນການ ເຄື່ອນໄຫວວຽກງານກວດສອບປະຈໍາປີ 2019, ບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2017 ແລະ ບົດລາຍງານອົງການກວດກາລັດຖະບານກ່ຽວກັບຜົນການກວດກາຕາມຜົນຂອງການກວດສອບ, ມະຕິຂອງກອງປະຊຸມສະພາແຫ່ງຊາດວ່າດ້ວຍການຮັບຮອງເອົາການເຄື່ອນໄຫວວຽກງານກາງສະໄໝຂອງແຜນການ 5 ປີ(2016-2020), ວຽກງານປະຈຳປີ 2018 ແລະ ທິດທາງແຜນການຮອດປີ 2020,  ວຽກງານຈຸດສຸມປີ 2019 ຂອງໄອຍະການປະຊາຊົນສູງສຸດ, ມະຕິຂອງກອງປະຊຸມສະພາແຫ່ງຊາດວ່າດ້ວຍການຮັບຮອງເອົາການຊີ້ແຈງຂອງລັດຖະບານຕໍ່ຄໍາຊັກຖາມຂອງສະພາແຫ່ງຊາດກ່ຽວກັບສະພາບການກໍ່ສ້າງ ແລະ ສ້ອມແປງຫົນທາງໃນໄລຍະທີ່ຜ່ານມາ ແລະ ທິດທາງແກ້ໄຂຕໍ່ໜ້າ, ມະຕິຂອງກອງປະຊຸມສະພາແຫ່ງຊາດວ່າດ້ວຍການຮັບຮອງເອົາການຊີ້ແຈງຂອງລັດຖະບານກ່ຽວກັບຄຸນນະພາບການບໍລິການປິ່ນປົວຢູ່ໂຮງໝໍ, ສຸກສາລາ ແລະ ທິດທາງແກ້ໄຂໃນຕໍ່ໜ້າ, ມະຕິກອງປະຊຸມສະພາແຫ່ງຊາດວ່າດ້ວຍການຮັບຮອງເອົາການແຕ່ງຕັ້ງລັດຖະມົນຕີກະຊວງປ້ອງການຄວາມສະຫງົບ ແລະ ຜູ້ວ່າການທະນາຄານແຫ່ງ ສປປ ລາວ, ມະຕິວ່າດ້ວຍການເຄື່ອນໄຫວວຽກງານກາງສະໄໝ (2016-2018) ແລະ ປີ 2018, ທິດທາງຮອດປີ 2020 ແລະ ແຜນວຽກຈຸດສຸມປ ະຈຳປີ 2019ຂອງສະພາແຫ່ງຊາດຊຸດທີ VIII.  ພ້ອມນີ້ ຍັງໄດ້ເຜີຍແຜ່ບາງຈິດໃຈເນື້ອໃນຂອງມະຕິກອງປະຊຸມສະໄໝສາມັນເທື່ອທີ 6 ສະພາປະຊາຊົນແຂວງຫົວພັນ ຊຸດທີ I ເປັນຕົ້ນ: ມະຕິວ່າດ້ວຍການຮັບຮອງເອົາບົດລາຍງານຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດປະຈຳປີ 2018 ແລະທິດທາງແຜນການປະຈຳປີ 2019, ມະຕິວ່າດ້ວຍການຮັບຮອງເອົາການເຄື່ອນໄຫວວຽກງານຂອງອົງການກວດສອບແຫ່ງລັດປະຈຳພາກເໜືອ ປະຈຳປີ 2018 ແລະ  ທິດທາງແຜນການການເຄື່ອນໄຫວວຽກງານການກວດສອບປະຈຳປີ 2019, ບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2017, ບົດລາຍງານຂອງພະແນກກວດກາລັດກ່ຽວກັບຜົນການກວດກາຕາມຜົນການກວດສອບ, ມະຕິກອງປະຊຸມສະພາປະຊາຊົນແຂວງຫົວພັນວ່າດ້ວຍການຮັບຮອງເອົາບົດລາຍງານການເຄື່ອນໄຫວວຽກງານກາງສະໄໝ (2016-2018) ຂອງອົງການໄອຍະການປະຊາຊົນ, ສານປະຊາຊົນແຂວງຫົວພັນ ແລະ ທິດທາງແຜນການຮອດປີ 2020 ແຜນວຽກງານຈຸດສຸມປີ 2019, ມະຕິວ່າດ້ວຍການຮັບຮອງເອົາການແຕ່ງຕັ້ງຫົວໜ້າພະແນກການ, ຫົວໜ້າອົງການລັດທຽບເທົ່າຈຳນວນໜຶ່ງຂອງແຂວງຫົວພັນ, ລາຍງານຜົນສຳເລັດການເຄື່ອນໄຫວວຽກງານຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ປະຈຳປີ 2018 ແລະ ແຜນການປີ 2019. ພ້ອມດຽວກັນນັ້ນ ຍັງໄດ້ຍົກໃຫ້ເຫັນ ບາງມາດຕາຂອງກົດໝາຍ ເປັນຕົ້ນ: ກົດໝາຍວ່າດ້ວຍຄອບຄົວ, ກົດໝາຍວ່າດ້ວຍການໃຫ້ວັກຊິນກັນພະຍາດ, ກົດໝາຍວ່າດ້ວຍປະກັນສັງຄົມ  ແລະ ກົດໝາຍວ່າດ້ວຍການປະກັນສຸຂະພາບ, ຄວາມສະເໝີພາບລະຫວ່າງຍິງ-ຊາຍ ໃຫ້ປະຊາຊົນບັນດາເຜົ່າໄດ້ຮັບຊາບຕື່ມອີກ.

            ໃນໂອກາດນີ້ ຍັງໄດ້ຮັບຟັງຄຳຄິດຄຳເຫັນ, ຄຳສະເໜີຕ່າງໆ ຂອງປະຊາຊົນບັນດາເຜົ່າ, ຊຶ່ງຄຳສະເໜີສ່ວນຫຼາຍ ແມ່ນກ່ຽວກັບການພັດທະນາຢູ່ທ້ອງຖິ່ນ, ບັນຫາການກໍ່ສ້າງເສັ້ນທາງ, ກໍ່ສ້າງຫ້ອງການປົກຄອງຂອງກຸ່ມບ້ານ,  ການຈັດສັນທີ່ດິນປູກຝັງ-ລ້ຽງສັດ, ການອຸດໜູນຂອງຕໍ່ຜູ້ທີ່ມີຜົນງານຄຸນງາມຄວາມດີໃນການປະຕິວັດຊາດປະຊາທິປະໄຕ, ການປະຕິບັດຂໍ້ຕົກລົງວ່າດ້ວຍລະບອບອຸດໜູນໃຫ້ແກ່ພະນັກງານຂັ້ນບ້ານທີ່ບໍ່ມີເງິນເດືອນ ສະບັບເລກທີ 79/ນຍ ລົງວັນທີ 13 ທັນວາ 2018, ການນຳໃຊ້ບັດປະກັນສັງຄົມຂອງທະຫານຕຳຫຼວດ, ການແບ່ງເຂດແດນລະຫວ່າງເມືອງຊຳໃຕ້ ແລະ ເມືອງກວັນ, ການຂາດນຳ້ລິນ ແລະ ນຳ້ສະອາດ,  ການຕິດຕັ້ງສັນຍານການສື່ສານສັນຍານໂທລະສັບ ຢູ່ 5 ກຸ່ມບ້ານໃນເມືອງກວັນ, ການຂໍທຶນຊຸກຍູ້ໃຫ້ແກ່ໜ່ວຍສະຫະພັນແມ່ຍິງບ້ານນ້ຳອີ້ນ ເມືອງຊຳໃຕ້ ຕໍ່ການປູກມອນ-ລ້ຽງມ້ອນ ແລະ ຕຳ່ຫູກ.            ຕໍ່ກັບຄຳຄິດຄຳເຫັນ ແລະ ຄຳສະເໜີຂ້າງເທິງນັ້ນ, ທ່ານໄດ້ຮ່ວມກັນກັບການນຳຂອງເມືອງຊີ້ແຈງອະທິບາຍຕໍ່ບັນຫາຕ່າງໆ ຕອບດ້ວຍເຫດ ແລະ ຜົນ ໂດຍອີງໃສ່ນະໂຍບາຍຂອງພັກ, ກົດໝາຍ ກໍຄືມະຕິຂອງກອງປະຊຸມສະພາແຫ່ງຊາດ. ພ້ອມກັນນັ້ນກໍ່ໄດ້ປຸກລະດົມໃຫ້ປະຊາຊົນບັນດາເຜົ່າເອົາເອົາໃຈໃສ່ໃນການຈັດຕັ້ງປະຕິບັດລັດຖະທຳມະນູນ ແລະ ກົດໝາຍຢ່າງເຂັ້ມງວດ, ຊຸກຍູ້ລູກຫຼານໃຫ້ໄດ້ເຂົ້າໂຮງຮຽນຕາມເກນອາຍຸ,  ເສີມຂະຫຍາຍຫົວຄິດປະດິດສ້າງ ແລະ ພູມປັນຍາຄວາມຮູ້ຂອງທ້ອງຖິ່ນ ເພື່ອຜະລິດເປັນສິນຄ້າ ແກ້ໄຂຄວາມທຸກຍາກຂອງປະຊາຊົນບັນດາເຜົ່າ. ພ້ອມນັ້ນກໍ່ໄດ້ຮຽກຮ້ອງບັນດາຄູອາຈານ, ພໍ່ແມ່ຜູ້ປົກຄອງເດັກ, ອຳນາດການປົກຄອງຂອງບ້ານ ຈົ່ງມີສະຕິລະວັງຕົວໃນການເປັນເຈົ້າການ ຕ້ານປະກົດຫຍໍ້ທໍ້ໃນສັງຄົມ ໂດຍສະເພາະການຕົວະຍົວະນັກຮຽນ-ຊາວໜຸ່ມໄປເຄື່ອນໄຫວແນວບໍ່ດີ, ຄ້າປະເວນີ, ມົ້ວສຸມຢາເສບຕິດ ແລະ ອື່ນໆ ຂອງຄົນບໍ່ດີ. ພ້ອມນີ້ ຄຳສະເໜີໃດທີ່ກ່ຽວຂ້ອງກັບຄວາມຮັບຜິດຊອບຂອງອົງການປົກຄອງທ້ອງຖິ່ນ ກໍສະເໜີໃຫ້ອົງການປົກຄອງຂອງເມືອງ ແລະ ກຸ່ມບ້ານ ຄົ້ນຄ້ວາແກ້ໄຂຢ່າງເໝາະສົມ.

ໃນເຄື່ອນໄຫວໃນຄັ້ງນີ້, ທ່ານຍັງໄດ້ນຳເອົາເຄື່ອງຊ່ວຍເຫຼືອຈຳນວນໜຶ່ງມອບໃຫ້ ຄະນະພັກເມືອງ, ກຸ່ມບ້ານ ແລະ ປະຊາຊົນທຸກຍາກຈຳນວນໜຶ່ງ ລວມມີ: ເຄື່ອງລຳໂພງ ຈຳນວນ 03 ຊຸດ, ເຄື່ອງນຸ່ງຫົ່ມ ຈຳນວນ 25 ແກັດ ແລະ ຜ້າຫົ່ມ ຈຳນວນ 30 ຜືນ, ລວມມູນຄ່າ 6,250,000 ກີບ.