ສສຊ ແລະ ສສຂ ເຄື່ອນໄຫວເຜີຍແຜ່ຜົນສຳເລັດກອງປະຊຸມສະໄໝສາມັນ ຢູ່ແຂວງຈຳປາສັກ

02/04/2019 00:00 -

(ສພຊ)​ ລະຫວ່າງວັນທີ 18-22 ມີນາ 2019, ທ່ານ ສຸບັນ ສະວະບຸດ ຮອງເລຂາທິການສະພາແຫ່ງຊາດ, ສະມາຊິກສະພາແຫ່ງຊາດ (ສສຊ)​ ປະຈໍາເຂດເລືອກຕັ້ງທີ 15 ແຂວງຈໍາປາສັກ ພ້ອມດ້ວຍບັນດາທ່ານສະມາຊິກສະພາປະຊາຊົນແຂວງ (ສສຂ) ປະຈໍາເຂດເລືອກຕັ້ງເມືອງບາຈຽງຈະເລີນສຸກ ໄດ້ເຄື່ອນໄຫວເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII ແລະ ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຊຸດທີ I ເຊິ່ງການເຄື່ອນໄຫວໃນຄັ້ງນີ້ມີທັງໝົດຈໍານວນ 8 ຈຸດ ຄື: ຫ້ອງວ່າການປົກຄອງເມືອງ, ບ້ານກະຈີດ, ບ້ານໜອງໃສ, ບ້ານໂນນໄຊ, ບ້ານພູທອງເທິງ, ບ້ານທົ່ງອຸດົມ, ບ້ານນາແກ ແລະ ບ້ານໂນນສອນ.

          ໃນການເຄື່ອນໄຫວແຕ່ລະຈຸດ  ບັນດາທ່ານ ສສຊ ແລະ  ສສຂ ໄດ້ພັດປ່ຽນກັນສະເໜີເອກະສານຕ່າງໆຂອງກອງປະຊຸມສະພາແຫ່ງຊາດ ແລະ ສະພາປະຊາຊົນແຂວງ ຕາມສິດ ແລະ ໜ້າທີ່ ໂດຍໄດ້ຍົກໃຫ້ເຫັນບັນຍາກາດຂອງການດໍາເນີນກອງປະຊຸມ, ບັນດາເນື້ອໃນທີ່ໄດ້ນໍາມາພິຈາລະນາ ແລະ ຮັບຮອງເອົາໃນກອງປະຊຸມ ເປັນຕົ້ນ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ໃນປີ 2018 ແລະ ທິດທາງແຜນການໃນປີ 2019, ການເຄື່ອນໄຫວວຽກງານຂອງອົງການກວດສອບແຫ່ງລັດ, ອົງການກວດກາລັດຖະບານ, ອົງການໄອຍະການປະຊາຊົນ, ສານປະຊາຊົນ, ການພິຈາລະນາຕໍ່ການສ້າງ ແລະ ປັບປຸງກົດໝາຍ, ຂໍ້ຕົກລົງຂອງເຈົ້າແຂວງ ເຊິ່ງພາກສ່ວນກ່ຽວຂ້ອງໄດ້ລາຍງານຕໍ່ກອງປະຊຸມສະພາແຫ່ງຊາດ ແລະ ກອງປະຊຸມສະພາປະຊາຊົນແຂວງຈໍາສັກ; ນອກນັ້ນ, ຍັງໄດ້ສະເໜີໃຫ້ຜູ້ເຂົ້າຮ່ວມໄດ້ຮັບຮູ້ແຈ້ງຂຶ້ນຕື່ມ ກ່ຽວກັບສິດ, ໜ້າທີ່ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ພ້ອມທັງໄດ້ຮຽກຮ້ອງໃຫ້ທຸກພາກສ່ວນປະກອບສ່ວນຈັດຕັ້ງປະຕິບັດບັນດາມະຕິກອງປະຊຸມສະພາແຫ່ງຊາດ ຕາມຂອບເຂດຄວາມຮັບຜິດຊອບຂອງແຕ່ລະພາກສ່ວນ ແນໃສ່ເພື່ອຮັບປະກັນ ເຮັດໃຫ້ບັນດາຄາດໝາຍທີ່ກໍານົດໃນມະຕິຂອງກອງປະຊຸມສະພາແຫ່ງຊາດ ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ ແລະ ບັນລຸຄາດໝາຍທີ່ວາງໄວ້; ພ້ອມດຽວກັນນັ້ນ, ຍັງໄດ້ຮັບຟັງຄໍາສະເໜີຂອງພໍ່ແມ່ປະຊາຊົນ ແລະ ບັນຫາຕ່າງໆ ທີ່ຕິດພັນກັບການດໍາລົງຊີວິດຂອງພໍ່ແມ່ປະຊາຊົນ ເພື່ອນໍາເອົາຂໍ້ສະເໜີຕ່າງໆ ສະເໜີໄປຍັງອໍານາດການປົກຄອງທ້ອງຖິ່ນ ແລະ ພາກສ່ວນກ່ຽວຂ້ອງ ເພື່ອຄົ້ນຄວ້າແກ້ໄຂ.